Read bura-pabir Ezra 5 Bible Online

Ezra 5 - bura-pabir bible

Ezra 5

¹Akwa saka ndaga antə Hyel pəla aka naɓi Haggai ka naɓi Zakariya na ɓzər Iddo abbər ka da hara naɓikur aka mjir Yahudi na ahar Yahuda ka Urushalima.

²Sakatə Zerubbabel na ɓzər Sheyaltiyel ka Yeshuwa na ɓzər Yozadak nggatə labar ni, antə da jaktə baɗitə ləkəma ka hən mbwar vəngkər səli na akwa Urushalima ni. Tsuwa naɓiyayeri na suɗə ni ku ndzi adzə ɗa ka dlar ɗa.

³Tsuwa tsu akwa saka nda antə Tattenai na gwamnar lardu na aɓəla bwanda Thlyagha Yufiretis ni, ka Shethlar Bozenai, kəga pazhayeri arɗa ku si ahar Urushalima, ka yu ɗa abbər, “Wan na ala giri lakur hən mbwa ngəni har tə giri jaktə namtə ni ɓɗaku apani ka damwa ri?

⁴Tsuwa man thləma mji na hən mbwa ngəni ri?”

⁵Amma nca Hyelər mjir Yahudi akwa wul kəra mji na ol'olər ɗa, har tə mda aɗi mzhi thləthlatə ka kəthlər ar hən mbwa ni wa, tar aghəla sakatə labar ni ku mzhitə Kuthli Dariyus, tə mdə wuta amsar wasika ni akəlari.

⁶Ngəni an su na akwa wasika natə Tattenai na gwamnar lardu na aɓəla bwanda Thlyagha Yufiretis, ka Shethlar Bozenai, kəga pazhayeri arɗa natə da an gwamnayeri na aɓəla bwanda Thlyagha Yufiretis ni, thlenta aka Dariyus ni.

⁷Da thlenta alari labar ni rəbutə rəbutari abbər, “Aka Kuthli Dariyus, ka Hyel na gə msərakur!

⁸Ka barkar nga, yeru akwa bara ka gə sənda abbər yeru ku mwari akwa lardu ar Yahuda adzə mbwar Hyel na ol ni. Antə yeru wutə mda akwa jaktə hənari ka pelayeri na ol'ola, har ka peruwa gangayeri akwa banggwayerari ni. Tsuwa kəthlər ni akwa mwa ka ləkəma ɓɗaku akwa tsiya ɗa.

⁹Antə yeru yu mjir ɗa na ol'ola ka gari ala ɗa abbər, ‘Wan na ala giri laku abbər ka giri hən mbwa ngəni, har ka giri kuri ɓɗaku apani nə ri?’

¹⁰Tsuwa yeru ku yu thləma ɗa, kamnyar ka yeru rəbuta, ka pəla ala gə thləma mji na pwar ɗa akwa kəthlər ni.

¹¹Antə da shinau ala yeru abbər, ‘Yeru an buɗayeri ar Hyel na hara vəi na amtazi ka duniya. Tsuwa yeru akwa jaktə hən mbwa natə mdə hənta akwa məvayeri hang na təramta, mbwa natə kuthli laga na ola ar Israila ku həntə ka kuri shang.

¹²Amma kamnyar tə kəkayeri ar yeru na waci ku ɓzamtə ɗəffa Hyel na amtazi, antə tsa ku hamta ɗa aka Nebukadnezzar na kuthlir Babila, mdər Kaldiya na huzamta mbwa ni, ka fatə mji ni ka mwantə ɗa ahar Babila.

¹³Amma wala apani, akwa məva na ntangkəma ar Sairus na kuthlir Babila, Kuthli Sairus ku hamta tsawa abbər ka mdə jaktə həntə mbwar vəngkər səli ni.

¹⁴Har ma, Kuthli Sairus vu tə mdə ngka ka kariyayeri natə mdə nam ka dinar kəga na ka adzərfa na akwa mbwar vəngkər səli aka Hyel ni, kariyayeri natə Nebukadnezzar fwaɓəla akwa mbwar vəngkər səli na ahar Urushalima ka mwanta akwa mbwar vəngkər səli aka haptərni na ahar Babila ni. Sairus fwaɓəla su nayeri ni ka pu ɗa akwa tsiya mdə laga ka thləmari Sheshbazzar natə tsa vəi ni gwamna ata kəra Yahuda.

¹⁵Kuthli Sairus pəla aka Sheshbazzar abbər, “Fatə kariyayeri ngəni ka gə ra puyari akwa mbwar vəngkər səli na ahar Urushalima, tsuwa ka mdə jaktə həntə mbwar vəngkər səli ni tsu akwa vəyari na hwatu.”

¹⁶Antə Sheshbazzar ku si ka vəi səla mbwar vəngkər səli aka Hyel ni akwa Urushalima. Antə baɗitə ka vir nda har ka sənta aka vir na ashina, mdə tsu akwa ləkəma ka hən ni, amma ba kulini aɗi kur wa.’

¹⁷Antə usa ma akəs kəra kuthli, ka barkarni vu ka mdə wulha akwa kakaɗər kuthlyayeri na akwa Babila, ka mdə nggaɓəla nuhum Kuthli Sairus ku hamta tsawur jaktə hən mbwar vəngkər səli na akwa Urushalima ni jiri. Ka kuthli ni thlenta ala yeru su tə tsa bara ka yeru hara ata kəra su ngəni.”