Read bura-pabir Ezra 6 Bible Online

Ezra 6 - bura-pabir bible

Ezra 6

¹Apani Kuthli Dariyus ku hamta tsawa, antə mdə ku wulha akwa kakaɗayeri na akwa mbwar pwi kakaɗu na akwa Babila.

²Akwa Ekbatana na di gwamnakur ar Mediya, antə mdə sə ra wutə kakaɗə ngəni pərpərari ni ka rəbutə ngəni, Sur Ɗangta.

³“Akwa məva na ntangkəma ar Kuthli Sairus, antə kuthli ni hamta tsawa ata kəra mbwar Hyel na akwa Urushalima, abbər ka mdə jaktə həntə mbwa ni, mbwa tə mda ana hamta saɗakayeri akwa. Antə ka nalkurərni ndzi dzartsi ngkwakumari, ka baukurərni tsuwa ndzi dzartsi ngkwakumari.

⁴Tsuwa mda ata hara və makər ar banggwa ni ka pelayeri na ol'ola, ka vəngkər və pal ar udzəm. Tsuwa akwa thləvur kuthlikur antə mda ata kəɓəla kwabar ntə mjir kəthlər ni.

⁵Tsuwa kariyayeri tə mdə nam ka dinar wala ka adzərfa natə Kuthli Nebukadnezzar fwaɓəla akwa mbwar vəngkər səli aka Hyel ahar Urushalima, ka sənta ahar Babila ni, ka mdə ngka ka da akwa vəi ndzəndziyir ɗa akwa mbwar vəngkər səli na ahar Urushalima ni. Ka mdə pwi ɗa akwa mbwar Hyel.”

⁶Antə Dariyus thlenta amsa ngəni abbər, “Ala ga Tattenai, gə na gwamnar lardu na aɓəla bwanda Thlyagha Yufiretis ni, ka Shethlar Bozenai, ka shanga giri na pazhir ɗa, watau giri na ol'ola akwa lardu na aɓəla bwanda Thlyagha Yufiretis ni, sharar girdzi kazhar vəi ni!

⁷Zhar giri kəthlərər mbwar Hyel ni tsəɗaku! Zhar giri gwamnar mjir Yahuda kəga mji ol'olər ɗa, ka da jaktə həntə mbwar vəngkər səli aka Hyel ni tsu akwa vəyari na hwatu.

⁸Tsuwa I akwa hamta tsawa ata kəra su tə kalkal ka giri hara kamnyar dlar mjir Yahudi ngəni ol'ol ni, akwa jaktə həntə mbwar vəngkər səli aka Hyel tə da akwa harari ni. Ka mdə ntəmta watsəɓər mjir kəthlər ni ka kwaba na akwa kəi kuthlikur ni, watau ka kwabar tsəma tə mdə tsapta akəla mjir lardu na aɓəla bwanda Thlyagha Yufiretis ni. Tsuwa ka mdə ntəmta ala ɗa kwabar ɗa cipcippu, kula shamta saka.

⁹Tsuwa ka giri hamta aka pristayeri na akwa Urushalima ni shanga su tə da ata turari tədək viri, giri aɗiya tsamta wa. Ka giri hamta ala ɗa maɗa' gyal, wala gamayeri, wala malgum təmayeri, kamnyar hamta saɗaka mbamba aka Hyel na amtazi. Tsuwa ka giri na ɗa alkama, wala una, wala yimər anap, wala mal zaitun.

¹⁰Ka giri hara apani kamnyar ka da mzhi hamta saɗakayeri na ata kəskəra Hyel na amtazi, ka da hara adduwar kiɗə barka ata kəri kəga maɗa'na.

¹¹Tsuwa I ku vəi tsawa abbər kəlara mdə na ku ɓəli tsawu ngəni, mda ata ntsuɓəla udzəmər kəyirni, ka mdə ntsəvtə ni ata. Antə kəyirni ata sə ndzi kumba.

¹²Ka Hyel na ɗəmha abbər ka mdə vəngkər səli alari akwa Urushalima ni, pthli kəlara kuthli wala mji, na ku pali tsawu ngəni, wala huzamta mbwar vəngkər səli aka Hyel na akwa Urushalima ni. I na Kuthli Dariyus an vəi tsawu ngəni ni, antə ka waskəi vədzə hangkalari ka ɓəlatə tsawu ngəni!”

¹³Antə Tattenai na gwamnar lardu na aɓəla bwanda Thlyagha Yufiretis ni, ka Shethlar Bozenai, ka shanga pazhayeri arɗa, ku vədzə hangkala ɗa, ka nu su tə Kuthli Dariyus ku tsawu ni.

¹⁴Antə mji na ol'ola ar mjir Yahudi ku ləkəma ka kəthlər ar hən mbwa ni, tsuwa naɓi Haggai ka naɓi Zakariya na ɓzər Iddo akwa dunautə ɗa ka labarər Hyel. Antə da ku kuri həntə mbwa ni kalkal apatə Hyelər Israila ku tsawa aka Sairus, ka Dariyus, ka Artashasta, na kuthlyayeri ar Parsiya.

¹⁵Antə mdə kuri həntə mbwar vəngkər səli aka Hyel ni akwa vira thliya makər ar thliya makər, watau akwa thliyar Adar, akwa məva na ngkwakur ar zamanər Kuthli Dariyus.

¹⁶Antə mjir Israila na pristayeri, ka mjir Lawi, ka mambila mji na thlata akwa mafakur ka ngka ni, ku hara kucalər hamta mbwar vəngkər səli ni aka Hyel.

¹⁷Akwa sakatə mda akwa hamta mbwa ngəni aka Hyel ni, mji ku hamta thla aru pal, ka gam aru suɗa, ka maɗa' təma aru nfwar. Tsuwa da ku hamta nciwa kumnya suɗa kamnyar saɗakar kəcə biku, kamnyar nyarmbwayeri na kumnya suɗa akwa Israila ni.

¹⁸Antə da ndəkəi pristayeri ni akwa bwayeri zumzum, ka ndəkəi mjir Lawi tsuwa zara zara waskəi ka mnya kəthlərər ɗa, kamnyar hara kəthlər aka Hyel akwa Urushalima ni, tsu apatə mdə ku rəbuta akwa kakaɗər Musa.

¹⁹Akwa vir na kumnya nfwarkur ar thliya na ntangkəma, antə mji na səɓəla akwa tsəɗi mafakur ni səm susəmər Fəlɓəla Kəi ni.

²⁰Kamnyar shanga pristayeri, ka mjir Lawi ku kəcimta kərɗa ka ndzi kəcəkəcari ata kəma duku. Antə da ku tsi təma ar kucalər Fəlɓəla Kəi kamnyar shanga mji na thlata akwa mafakur ka si lapiya ni, kamnyar pristayeri nvwa ɗa, ka tsuwa kamnyar da ka kəra ɗa.

²¹Antə mji na səm susəma ngəni an mjir Israila na thlata akwa mafakur ni, ka kəlara mdə na ku paktə kər kəga da, mdə na ku zhar hara sur adiyakur ar mjir tsəɗi ni kamnyar vəngkər səli aka MTHLAKU na Hyelər Israila.

²²Antə da ku ɓəlatə Vir Kucalər kwasə Buradi na Kula Yist ni ar vir murfa ka kucali, kamnyar MTHLAKU ku vu tə da ku hara kucali atar ndəkərtə hangkala kuthlir Assiriya, tə tsa ku dlar ɗa akwa kəthlər ar jaktə həntə mbwar vəngkər səli aka Hyel na ar Israila ni.