Read bura-pabir Ezra 7 Bible Online

Ezra 7 - bura-pabir bible

Ezra 7

¹Aghəla nda, akwa sakatə Artashasta an kuthlir Parsiya, antə Ezra zhar Babila ka si ahar Urushalima. Ezra an ɓzər Seraiya, na ɓzər Azariya, na ɓzər Hilkiya,

²na ɓzər Shallum, na ɓzər Zadok, na ɓzər Ahitub,

³na ɓzər Amaliya, na ɓzər Azariya, na ɓzər Meraiyoth,

⁴na ɓzər Zerahiya, na ɓzər Uzzi, na ɓzər Bukki,

⁵na ɓzər Abishuwa, na ɓzər Finehas, na ɓzər Eleyazar, na ɓzər Haruna na olər pristayeri.

⁶Ezra ngəni an thlata ahar Babila ni. Tsa an maləm na ka sənda akwa tsawu natə MTHLAKU na Hyelər Israila ku hamta aka Musa. Antə kuthli ku hamta alari shanga su tə tsa ku yuwa, kamnyar tə mambələr MTHLAKU na Hyelərni an ata kərari.

⁷Akwa məva na murfəkur ar Artashasta, antə Ezra ka bwadukwa mjir Israila ku zhar Babila ka mwari ahar Urushalima, ata kəma duku kəga mjir Israila laga. Mji ngəni an ku paktə ka pristayeri, ka mjir Lawi, ka mjir ha, ka mjir sək nyarfu, ka mjir kəthlər akwa mbwar vəngkər səli.

⁸Antə Ezra ku mzhitə Urushalima akwa thliya na ntəfkur akwa məva na murfəkur ar kuthli Artashasta ni.

⁹Tsa zhar Babila akwa vir na ntangkur ar thliya na ntangkəma, ka sə mzhitə Urushalima akwa vir na ntangkur ar thliya na ntəfkur, kamnyar mambələr Hyel na ana hara ɓɗakkur an ata kərari.

¹⁰Kamnyar Ezra ku vu hangkalari akwa thlipə tsawur MTHLAKU, ka kəthlər kəgari. Tsuwa tsa ku thlipə tsawayeri ni aka mjir Israila.

¹¹Ngəni an wasika natə Kuthli Artashasta hamta aka Ezra na prist ka tsuwa maləm na ola. Tsa an mdə na ka səndə hang ata kəra tsawayeri natə MTHLAKU ku hamta aka mjir Israila.

¹²Wasika ni akwa pəla, “Thlata akəla Artashasta kuthli na olta shang, ka mwari aka Ezra na prist, maləm ar thlipə tsawur Hyel na amtazi. I akwa thlawar nga.

¹³I akwa hamta tsawa abbər kəlara mdər Israila, wala pristayeri, wala mjir Lawi, na akwa kuthlikurərna, kəlara mdə na ata hir ngka akwa Urushalima, tsa ata mzhi nu nga ka giri mwari.

¹⁴Kamnyar kuthli ka mjir hamta alari sauri da murfa an thlentə nga ka gə ra nggaɓəla laku tə mjir Yahuda ka Urushalima akwa ɓəla tsawu natə Hyelər nga hamta ala gə ni.

¹⁵Tsuwa ka gə fata adzərfa ka dinar natə I na kuthli ka mjir hamta ali sauri ku hamta ar hirər ɗəffu aka Hyelər Israila na ka ndzi akwa Urushalima.

¹⁶Ka gə fatə shanga adzərfa ka dinar natə ga ku tsapta akwa tsəɗiyir Babila, ata kəma duku ka sur hamta ar hirər ɗəffu natə mji kəga pristayeri ku hamta, suayeri tə da kətə alkawalər hamtari kamnyar mbwar vəngkər səli aka Hyelər ɗa na akwa Urushalima.

¹⁷Ka gə kəthlər ka kwaba ngəni kamnyar mastə thlayeri, ka gamayeri, ka mbəkəl təmayeri, kəga sur saɗakar ɗa na ar mthli, ka na ar sur sa na ata ndzi kalkal, ka gə hamta ɗa ata bagaɗiyir hamta saɗaka na ar mbwar vəngkər səli aka Hyelər nga na akwa Urushalima.

¹⁸Aghəla nda, ga ka mjir nga ata mzhi hara kəlara su tə giri hir ka mambila kwaba ni, akwa laku na ata kəskəra Hyelər giri.

¹⁹Tsuwa shanga suayeri tə mdə na ala gə kamnyar kəthlər akwa mbwar vəngkər səli aka Hyel, ka gə mwantə ɗa shang akəma Hyelər Urushalima.

²⁰Tsuwa kəlara suayeri damwa tə ga ata turari kamnyar mbwar vəngkər səli aka Hyelər ngə ni, ga ata mzhi kəɓəlari akwa vəi pwi kwabar kəi kuthlikur.

²¹I na kuthli Artashasta, ku hamta tsawu ngəni aka shanga mji na ata kəra kwaba na akwa lardu na aɓəla bwanda Thlyagha Yufiretis abbər, ‘Kəlara su tə Ezra na prist ku bara akəla giri, ka giri hamta alari kula mtirmnya, kamnyar Ezra an prist, tsuwa tsa maləm na ola ar tsawur Hyel na amtazi.

²²Ka giri hamta alari adzərfa natə kəgəɓkurari ku mwantə kilogram dəpu makər ka aru nfwar, ka alkama ar kilogram dəpu kuma, ka yimər anap lita dəpu suɗa, ka mal zaitun lita dəpu suɗa, ka hangkur una kalkal apatə mda ata turari.

²³Kəlara su tə Hyel na amtazi ku tsawa abbər ka mdə hara ata kəra mbwa ni, ka mdə haratə ni cipcippu, ta ɗəffa Hyel asə ɓza adzə ra kəga maɗa'na.

²⁴Tsuwa yeru akwa pəla ala giri abbər tsawa ku ngkatə ta giri adlu tsəma, wala kwabar ləɓəla ka səvi, wala kwabar kəra laku, akəla pristayeri, wala mjir Lawi, wala mjir ha, wala mjir səka, wala mji na ana kəthlər akwa mbwar vəngkər səli aka Hyel.’

²⁵Apani tsuwa gə na Ezra, ka gə kəthlər ka ɗəɗukur tə Hyelər nga na ala ga, ka gə putə mjir shariya ka alkaliyayeri na ata thlamta shariya aka shanga mjir lardu na aɓəla bwanda Thlyagha Yufiretis, ka shanga ɗa ndzi mji na asəndə tsawur Hyelər nga. Tsuwa mji na aɗi səndə tsawayeri ni wa, ka gə thlipa ala ɗa.

²⁶Kəlara mdə na aɗi nu tsawur Hyelər ngə ni wa, wala tsawur kuthli ni wa, to, mda ata hara alari shariya, wala ka mdə tsi ni, wala ka mdə kədləmta ni, wala ka mdə dlutsə kariyirni, wala ka mdə mbwi ni akwa pərsəna.”

²⁷Antə Ezra pəla, “Hu gir MTHLAKU na Hyelər kəkayeri ar mburu! Kamnyar tsa an vu dzam ngəni akwa ɗəffa kuthli, abbər ka tsa haptə səliyir mbwar vəngkər səli aka MTHLAKU na akwa Urushalima, atar jaktə həntə ni ni.

²⁸Tsuwa atar kətadzərni, antə tsa ku hara tə I ku wutə mdəkur akəma kuthli ka mjir hamta alari sauri, ka akəma shanga sojayeri arni na ol'ola. MTHLAKU na Hyelərna ku dlar ra, antə I ku wutə duna, ka tsaptə mji ol'olər Israila tə yeru ku ngka kəga da akwa Urushalima.”