Read bura-pabir Ezra 8 Bible Online

Ezra 8 - bura-pabir bible

Ezra 8

¹Nayeri ni an mji na ol'ola akwa nyarmbwayeri na thlata akwa mafakur akwa tsəɗi Babila, ka ngka ata kəma duku ka Ezra ahar Urushalima akwa zamanər Kuthli Artashasta.

²Akwa nyarmbwar Finehas, Gershom an ola. Akwa nyarmbwar Ithlamar, Daniyel an ola. Akwa nyarmbwar Dauda, Hattush

³na ɓzər Shekaniya an ola. Akwa nyarmbwar Parosh, Zakariya an ola. Tsuwa tsa si ka mji shili damwa aru pal ka ntəfkumari, natə thləma ɗa aɗi akwa kakaɗu ar nyarmbwar ɗa.

⁴Akwar nyarmbwar Pahath Moab, Eliyehoyenai na ɓzər Zerahiya an ola, tsuwa tsa si ka mji shili damwa aru suɗa.

⁵Akwa nyarmbwar Zattu, Shekaniya na ɓzər Yahaziyel an ola. Tsuwa tsa si ka mji shili damwa aru makər.

⁶Akwa nyarmbwar Adin, Ebed na ɓzər Jonathlan an ola. Tsuwa tsa si ka mji shili damwa ntəfkumari.

⁷Akwa nyarmbwar Elam, Yeshaiya na ɓzər Athlaliya an ola. Tsuwa tsa si ka mji shili damwa murfəkumari.

⁸Akwa nyarmbwar Shefatiya, Zebadiya na ɓzər Mikayel an ola. Tsuwa tsa si ka mji shili damwa nciskumari.

⁹Akwa nyarmbwar Yowab, Obadiya na ɓzər Yehiyel an ola. Tsuwa tsa si ka mji shili damwa aru suɗa ka kumnya ncisu.

¹⁰Akwa nyarmbwar Bani, Shelomith na ɓzər Yosifiya an ola. Tsuwa tsa si ka mji shili damwa aru pal ka ngkwakumari.

¹¹Akwa nyarmbwar Bebai, Zakariya na ɓzər Bebai an ola. Tsa si ka mji shili damwa sərkumari ka ncisu.

¹²Akwa nyarmbwar Azgad, Yahwanan na ɓzər Hakkatan an ola. Tsa si ka mji shili damwa aru pal ka kuma.

¹³Akwa nyarmbwar Adonikam, Elifelet, ka Yeyiyel, ka Shemaiya an mji ol'ola. Tsuwa da si ka mji shili damwa ngkwakumari. Amma ar mji ngəni da sə nu ɗa aghəli.

¹⁴Akwa nyarmbwar Bigva, Uthlai ka Zakkur an mji na ol'ola. Tsuwa da si ka mji shili damwa murfəkumari.

¹⁵Apani antə I tsaptə shanga mji ngəni ata mnya thlyagha na ana hwi ka mwari ahar Ahava. Antə yeru ku fəli anda mnyar vir makər. Antə I wulhə shanga mji ni kəga pristayeri, amma I aɗi wutə mjir Lawi akwa nca ɗa wa.

¹⁶Antə I thlentə ka mdə kəga ali Eliyezer, ka Ariyel, ka Shemaiya, ka Elnathlan, ka Yarib, ka Elnathlan, ka Nathlan, ka Zakariya, ka Meshullam, natə da an mji na ol'ol ni. Tsuwa I ku thlentə ka mdə kəga ali Yoyarib ka Elnathlan, mji na ɗəɗu suɗə ni,

¹⁷ka thlentə ɗa adzə Iddo, mdə na olər mjir Lawi na ahar Kasifiya ni. I pəla ala ɗa su tə ka da pəla aka Iddo ka maɗama'ni na ana kəthlər akwa mbwar vəngkər səli aka Hyel, abbər ka da thlenta ala yeru mji na ata kəthlər akwa mbwar vəngkər səli aka Hyelər mburu akwa Urushalima.

¹⁸Antə təng tə tsiya Hyelər yeru na ana hara ɓɗakkur aɗi ata kəra yeru, da ku thlenta ala yeru Sherebiya, mdər Lawi laga na ɗəɗu akwa nyarmbwar Mahli, ka maɗashilərni ka yangkurayerari, shanga ɗa kumnya ncisu.

¹⁹Tsuwa da ku thlenta ala yeru Hashabiya ka Yeshaiya na akwa nyarmbwar Merari, ka yangkurayerari, ka maɗashilər ɗa, shanga ɗa sərkumari.

²⁰Ata kəra mji nayeri ni, da ku jaktə thlenta ala yeru mji aru suɗa ka sərkumari na ata hara kəthlər akwa mbwar vəngkər səli, apatə Kuthli Dauda kəga mjirni na ol'ola ku ɗəmhə kamnyar dlar mjir Lawi ni. Shanga mji nayeri ni mdə ku rəbutə thləma ɗa.

²¹Anda ata mnya Thlyagha Ahava ni, antə I psəmnya abbər ka yeru kəl asham, ka tərghəi kəra yeru akəma Hyelər yeru, ka yeru kiɗə ni ka tsa pwar yeru akwa laku, ka tsa ɓəlatə yeru kəga maɗa' yeru, ka shanga kariyir yeru.

²²Kamnyar tə I akwa ngga səliyir yu kuthli ka tsa thlenta ali sojayeri ka mjir fəl taku na ata ɓəlatə yeru ta dawar yeru ata laku. Kamnyar yeru ku kurtə pəla aka kuthli abbər Hyelər yeru ana hara ɓɗakkur aka mji na ana mbərsa ka tsa, amma ɗəffari ana ɓza ata kəra mji na ku fwari ata kərari.

²³Antə yeru ku kəl asham, ka kiɗə Hyel abbər ka tsa ɓəlatə yeru. Antə tsa ku nggatə adduwar yeru.

²⁴Antə I carɓəla mji kumnya suɗa akwa nca pristayeri na ol'ola, natə da an Sherebiya, ka Hashabiya, ka maɗada' ɗa kuma.

²⁵Antə I ngkərɓəla ala ɗa adzərfa, ka dinar, ka kari damwa natə kuthlyayeri, ka mjir hamta ala ɗa sauri, ka mji ol'ola, ka shanga mjir Israila, ku hamta kamnyar mbwar vəngkər səli aka Hyel.

²⁶Ngəni an hangkur suayeri natə I ngkərɓəla ka pu tsiya pristayeri ni. Kəgəɓkur adzərfa ton sərkumari ka suɗa. Suayeri tə mdə nam ka adzərfa aru pal, antə kəgəɓkurər ɗa kilogram murfəkumari. Kəgəɓkur dinar an kilogram dəpu makər ka aru nfwar.

²⁷Tasayeri na ol'ola natə mdə nam ka dinar sərkumari, kəgəɓkurər ɗa kilogram ncisu ka reta. Tasayeri damwa suɗa ar əmza tə mdə nggiləmta ɓɗaku laga tə darajarni ku mwanta ar dinar.

²⁸Antə I pəla ala ɗa, “Mdə ku hamta aka Hyel antə giri ku ndzi ɓɗakkarkara, tsu apatə mdə ku hamta kariyayeri ngəni aka Hyel ka ndzi ɓɗakkarkara ni. Tsuwa suayeri tə mdə nam ka adzərfa wala dinar ni an sur hamta ar hirər ɗəffu aka MTHLAKU, na Hyelər kəkayeri ar giri.

²⁹Ka giri wulwul kəra ɗa, ka giri kəsi ɗa ɓɗaku, har tar ma giri ku mzhitə mbwar vəngkər səli ni, ka ngkərtə kəgəɓkur suayeri ni akəma pristayeri na ol'ola, ka mjir Lawi, ka mji na ol'ola akwa nyarmbwayeri ar Israila na ahar Urushalima.”

³⁰Antə pristayeri ka mjir Lawi ni ku dlu suayeri ngəni tə mdə nam ka adzərfa wala dinar ni, ka mwantə ɗa ahar Urushalima akwa mbwar vəngkər səli aka Hyelər mburu.

³¹Antə yeru thlata ata mnya Thlyagha Ahava ni akwa vir na kumnya suɗkur ar thliya na ntangkəma, kamnyar mwari ahar Urushalima. Tsuwa Hyel ku ndzi ata kəra yeru, ka ɓəlatə yeru ta dawar yeru ka mjir thla laku.

³²Sakatə yeru ku mzhitə Urushalima, antə yeru ghərəmtaghəra ar vir makər.

³³Akwa vir na nfwarkur antə yeru mwari akwa mbwar vəngkər səli aka Hyelər yeru, ka ngkərɓəla adzərfa ni ka dinar ni, ka kari ni, ka hamta ɗa aka Meremoth na prist, ɓzər Uriya. Mji na ata vəi duku ka tsa an Eleyazar na ɓzər Finehas, ka mjir Lawi damwa suɗa, watau Yozabad na ɓzər Yeshuwa ka Nowadiya na ɓzər Binnuwi.

³⁴Mdə ku jikatə shanga suayeri ni ka ngkərtə ɗa, ka rəbwamta shanga su tə mdə jikatə ni ka hangkurər ɗa.

³⁵Antə shanga mji na thlata akwa mafakur ka si ni ku hamta saɗaka mbamba aka Hyelər Israila. Da hamta gyal kumnya suɗa kamnyar shanga mjir Israila, ka hamta gam əmdləkumari ka ngkwa, ka maɗa' təma murfəkumari ka murfa, ka nciwa kumnya suɗa kamnyar tifəmtar biku. Antə mdə ku mbamta shanga mwaɓiyayeri ngəni apa saɗaka mbamba aka MTHLAKU.

³⁶Apani tsuwa da ku hamta kakaɗər kuthli ni aka gwamnayeri kəga mji na ol'ola na aɓəla bwanda Thlyagha Yufiretis ni. Antə da ku hamta dlarər ɗa aka mji ni ka akwa hən mbwar vəngkər səli aka Hyel ni.