Read bura-pabir Ezra 9 Bible Online

Ezra 9 - bura-pabir bible

Ezra 9

¹Aghəla tə mdə ku kuri suayeri ngəni antə mji na ol'ola ar Israila ku si adzə ra ka pəla ali abbər mjir Israila, ka pristayeri, ka mjir Lawi ni aɗi ndəkɓəla kərɗa ka sur hara mjir tsəɗi ni wa. Da aɗi ndəkəmta kərɗa ka suayeri na adiya adiya ar mjir tsəɗi ni wa, watau mjir Kanana, ka mjir Hitti, ka mjir Perizzi, ka mjir Yebusi, ka mjir Ammon, ka mjir Mowab, ka mjir Masar, ka mjir Amor ni wa.

²Kamnyar mjir Israila ku kəl mwala akwa durayeri ngəni, har ka kəl ɗa aka maɗashilər ɗa! Antə apani hwulfər dur na ɓɗakkarkara ni ku gwartədzi ka durayeri na akwa tsəɗi ni. Tsuwa har mji na ol'ola akwa kəthlər kəga mji na ol'ola ar tsəɗi an akəma akwa hara sur cikə ngəni ni.

³Sakatə I nggatə su ngəni, antə I kwahəmta ləptərna kamnyar ɗəffə ɓzəɓza, ka ntsutə shishir kəri ka shishir kumi, ka ndzəndzi tsahumma

⁴har ka mwanta aka sakar hamta saɗaka na tahaku. Tsuwa shanga mji na nggatə ndərər Hyelər Israila, ka yakata kamnyar dlərpəkur ar mji na thlata akwa tsəɗi mafakur ka si ni, ku tsaptədzi adzə ra.

⁵Sakatə sakar hamta saɗaka na tahaku ni ku hara, antə I thlata akwa ndzi kula səm susəm ni, tsu ka ləptərna ka alkyabarna kwahəkwahari ni, ka zuzuri ka ɓunji, ka haptə tsi aka MTHLAKU na Hyelərna,

⁶ka hara adduwa abbər, “Hyelərna, səli ku ngkəi ra, har tə I amzhi haptə kəmi akəma gə wa, kamnyar bikər yeru ku təra kərathla yeru. Ɗimikurər yeru ku kəla apa gar har ka ləmtazi.

⁷Təng akwa zamanər kəkayeri ar yeru har ka vədza aka pci na ashina, yeru akwa hara biku na ol'ola. An su na hara tə mdə hamta yeru, kəga kuthlir yeru, kəga pristayeri ar yeru, aka kuthlyayeri damwa ni. Antə mdə ku tsəgəi bwadukwa yeru, ka fatə bwadukwa yeru, ka mwanta akwa tsəɗi mafakur, ka dlutsə kariyir yeru, ka kəli səli yeru, apatə yeru aɗi ashina.

⁸Amma kulini akwa saka laga raka, MTHLAKU na Hyelər yeru, ku hara ala yeru ɓɗakkur, ka zhar bwadukwa yeru tə yeru ndzi ka mpika. Tsuwa akwa vəi ndzəndzi arni na ɓɗakkarkara ni, tsa ku na ala yeru vəi ndzəndzi natə sur tsəkwarari aɗi wa. Kamnyar tsa ku na ala yeru shambar laga raka akwa mafakur bwani ni, ka hara tə nca yeru akwa wutə su parau.

⁹Kamnyar wala tə yeru ku ndzi mafayeri, Hyelər yeru aɗi fwari ata kəra yeru akwa mafakurər yeru ni wa. Amma tsa ku ncanta ala yeru hirkurərni atar vu tə kuthlyayeri ar Parsiya hara ala yeru ɓɗakkur. Tsuwa tsa vu tə kuthlyayeri ni ku dunautə yeru kamnyar ka yeru jaktə həntə mbwar vəngkər səli aka Hyelər yeru ni, ka yeru jaktə thlentə shanga vəyayeri na ku ndzi kumba, kamnyar ka yeru wutə katangga na ata mbuli yeru akwa Yahuda ka Urushalima.

¹⁰Antə kulini, Hyelər yeru, man tə ka yeru pəla aghəla shanga suayeri ngəni ri? Kamnyar yeru ku jaktə ɓəli tsawur nga,

¹¹natə buɗayeri ar nga na naɓi ku na ala yeru. Kamnyar ga ku pəla abbər tsəɗi natə yeru ata mwari akwa ka ndzi mthlakari ni, an tsəɗi na adiya. Kamnyar mjir tsəɗi ni ku nghyantə tsəɗi ni ka surharar ɗa na adiya ka sur cika.

¹²Antə yeru aɗiya hamta maɗangkwiyir yeru aka maɗashilər ɗa wa, wala kəl maɗangkwiyir ɗa aka maɗashilər yeru wa. Tsuwa ma yeru ata bara ka yeru ndzi ka duna, ka nggatə msərakur tsəɗi ni, har ka kəkayeri ar yeru sə fa kifari ba saka madi, to yeru aɗiya bara msərakur ka da wa, wala dlar ɗa wa.

¹³Aghəla tə shanga suayeri ngəni ku wutə yeru kamnyar ɗimikur tə yeru hara, ka bikayeri ar yeru na ku hara hang ni, antə yeru nggaɓəla abbər gə na Hyelər yeru ni aɗi ɗi yeru ka duna, na ku mwantə ɗimikurər yeru ni wa. Kamnyar wala apani ga ku zhar bwadukwa yeru ka mpika.

¹⁴Antə apa madi tə yeru ata jaktə ɓəli tsawur nga, ka kəldzi kəga mjir hara sur cikə ngəni ri? Ai ma yeru ku hara, ɗəffa ga ata ɓzi ata kəra yeru, har ka gə shamta yeru karkar, tə wala mdə duku aɗi ata msər wala mbil ka mpikə wa.

¹⁵MTHLAKU na Hyelər Israila, ga an ka jirkur! Kamnyar yeru na mbila ashina an mji na mbiləmta ni. Antə nggədza yeru akəma ga ka kələr bikər yeru, wala tə yeru aɗi ka dunar si akəma gə wa kamnyar bikər yeru ni.”