Read bura-pabir Neh 1 Bible Online

Neh 1 - bura-pabir bible

Neh 1

¹Ngəni an labar ar Nehemiya na ɓzər Hakaliya. Akwa thliyar Kislev akwa məva na sərkumarkur sakatə Artashasta an kuthlir Parsiya, sakanda I na Nehemiya akwa Shusan na di kuthlikur ar tsəɗi ni.

²Təng vir laga, pal akwa nca maɗama'na na ka thləmari Hanani si adzə ra ata kəma duku ka mjir Yahuda laga. Antə I yu ɗa ata kəra mjir Yahudi na mbil ka mpika, mji na thlata akwa mafakur ni, ka tsuwa ata kəra Urushalima.

³Antə da pəla ali abbər, “Mjir mburu na mbila ka mpika, na thlata akwa mafakur ka ngka akwa lardər Yahuda ni, akwa ɗar bwani ka duna, da akwa sur səli ka duna. Katanggar Urushalima ku ndlamtadzi, tsuwa u'u ku mbagamta nyarfayerari.”

⁴Sakatə I nggatə labar ngəni, antə I ndzəndzi ata di ka tuwa, ka hara vir hang akwa tuwa ni. Antə I ləkəma kula səm susəma kamnyar ɗəffə ɓzəɓza, akwa hara adduwa aka Hyel na amtazi,

⁵abbər, “MTHLAKU, Hyel na amtazi! Hyel na ola natə shanga mji ana thlivərari. Ga ana kəsi alkawalər tə gə kətə ka jirkur, ka ncantə hirkurər nga na ana palidzi wa ni aka mji na ana hir nga, ka ɓəla tsawur nga.

⁶Wul ra bu usa ka ncar kətadza, kara nggatə adduwar mafar nga, adduwa tə I akwa harari kulini pci ka viri akəma gə ni. I akwa hara adduwa ni ata vəya mjir nga Israila, akwa jikaɓəla bikayeri tə da hara ala ga. Jiri, I ka kəkayeri arna shang ku hara biku.

⁷Yeru ku hara su na ɗimi ala ga, kamnyar yeru aɗi ɓəlatə tsawayeri ar nga kəga suayeri natə gə tsawa aka Musa na buɗar nga abbər ka mdə hara ni wa.

⁸Ɗangta alkawal natə gə hara aka Musa na buɗar nga bu, abbər ma mjir Israila ku ndzi kula jirkur, ga ata titiləmta ɗa akwa nca durayeri damwa.

⁹Amma ma da ku ngka adzə nga ka ɓəlatə tsawayeri ar nga, to wala tə ga ku titiləmta ɗa bamama har akwa datər duniya ni, ga ata tsaptə ɗa ka ngka ka da akwa vəi tə ga ku carɓəla ka mdə vəngkər səli ala ga.

¹⁰Da an mjir nga, tsuwa buɗayeri ar nga, mji tə ga ku msərantə ɗa atar kuthlikurər nga ka dunar nga na ola.

¹¹MTHLAKU, nggatə adduwarna usa, ka adduwar buɗayeri ar nga na ana ngga msərakur ar haptə thləma ga, ka gə hamta ali nggyari su ashina, ka gə hara ka kuthli kətadzə ra.” Akwa saka na təramta I an mdər hamta sur sa aka kuthli.