Read bura-pabir Neh 11 Bible Online

Neh 11 - bura-pabir bible

Neh 11

¹Apani antə mji ol'olər Israila ku ndzəndzi akwa Urushalima. Antə mambila mji tsuwa ku ndzəh kuriya kamnyar ka mdə carɓəla kutakəi pal akwa kutakəyayeri kuma, ka mdə səntə kutakəi ngəni ka da ndzəndzi akwa Urushalima, bərni na ɓɗakkarkara. Amma mdə ku zhar ka mambila kəyayeri na əmdla ni ka da ndzi akwa bwadukwa diyayeri.

²Antə mji ni ku usar shanga mji na ku hir hamta kəra ɗa ka da ra ndzəndzi ahar Urushalima.

³Nayeri ni an thləma mji na ol'olər lardayeri na ndzi akwa Urushalima, wala tə bwar ola mjir Israila, kəga pristayeri, kəga mjir Lawi, kəga mjir kəthlər akwa mbwar vəngkər səli, kəga kəkayeri ar mjir kəthlər aka Solaman ni ku ndzi akwa diyayeri arɗa akwa Yahuda, waskəi akwa vəi kəyirni.

⁴Ngəni an thləma mji na ol'ola akwa nyarmbwayeri ar Yahuda ka Benjamin na ku ndzi akwa Urushalima ni. Akwa nyarmbwar Yahuda, an Ataiya na ɓzər Uzziya, na ɓzər Zakariya, na ɓzər Amaliya, na ɓzər Shefatiya, na ɓzər Mahalalel, na kəkar Perez.

⁵Ka tsuwa Maaseya na ɓzər Baruk, na ɓzər Kolhoze, na ɓzər Hazaiya, na ɓzər Adaiya, na ɓzər Yoyarib, na ɓzər Zakariya, na ɓzər mdər Shilo.

⁶Shanga mjir nyarmbwar Perez na ndzəndzi akwa Urushalima an mji aru nfwar ka ngkwakumari ka ncisu. Tsuwa shanga ɗa mjir duna.

⁷Akwa nyarmbwar Benjamin, an Sallu na ɓzər Meshullam, na ɓzər Yoyed, na ɓzər Pedaiya, na ɓzər Kolaiya, na ɓzər Maaseya, na ɓzər Ithliyel, na ɓzər Yeshaiya.

⁸Tsuwa maɗama'ni an Gabai ka Sallai. Shanga mjir nyarmbwar Benjamin na ndzi akwa Urushalima an mji aru əmdla ka sərkumari ka ncisu.

⁹Yowel na ɓzər Zikri an olər ɗa, tsuwa Yahuda na ɓzər Hassenuwa an mdər dlar ni akwa di nda.

¹⁰Akwa nca pristayeri, an Yedaiya na ɓzər Yoyarib, ka Yakin,

¹¹ka Seraiya na ɓzər Hilkiya, na ɓzər Meshullam, na ɓzər Zadok, na ɓzər Meraiyoth, na ɓzər Ahitub na ola ata kəra mbwar Hyel.

¹²Shanga ɗa kəga maɗama' ɗa na hara kəthlər akwa mbwar vəngkər səli an mji aru ncisu ka sərkumari ka suɗa. Prist na makərkur na ndzəndzi anda an Adaiya na ɓzər Yeroham, na ɓzər Pelaliya na ɓzər Amzi, na ɓzər Zakariya, na ɓzər Pashhur, na ɓzər Malkiya.

¹³Tsa kəga maɗama'ni natə da an ola akwa nyarmbwar kəkayeri arɗa, an mji aru suɗa ka nfwarkumari ka suɗa. Prist na nfwarkur na ndzəndzi anda an Amashsai na ɓzər Azarel, na ɓzər Ahzai, na ɓzər Meshillemoth na ɓzər Immer.

¹⁴Shanga ɗa kəga maɗama' ɗa an mji aru pal ka sərkumari ka ncisu. Tsuwa shanga ɗa an katsalayeri na ka duna. Mdə na ola ata kəra ɗa an Zabdiyel na ɓzər Haggedolim.

¹⁵Akwa nyarmbwar Lawi, an Shemaiya na ɓzər Hasshub, na ɓzər Azrikam, na ɓzər Hashabiya, na ɓzər Bunni.

¹⁶Antə Shebathlai ka Yozabad an mji na ol'olər mjir Lawi na akwa wul kəthlərayeri na aɓəlaɓəla mbwar Hyel ni.

¹⁷Tsuwa mdə damwa aɗi ka thləmari Mattaniya na ɓzər Mika, na ɓzər Zabdi, na ɓzər Asaf, tsa andər haptə ha ar usar Hyel akwa sakar adduwa, ka Bakbukiya pal akwa nca maɗama'ni na mdər dlar Mattaniya ni, ka Abda na ɓzər Shammuwa, na ɓzər Galal, na ɓzər Yeduthlun.

¹⁸Shanga mjir Lawi na ku ndzi akwa Urushalima an mji aru suɗa ka nciskumari ka nfwar.

¹⁹Akwa nca mjir sək nyarfu, an Akkub, ka Talmon, ata kəma duku kəga maɗama' ɗa na ana sək mbwar vəngkər səli, da aru pal ka murfəkumari ka suɗa.

²⁰Mambila mjir Israila, ka mambila pristayeri kəga mjir Lawi, ku ndzəndzi akwa shanga diyayeri na akwa Yahuda, waskəi akwa bwar kifərni.

²¹Amma mjir kəthlər akwa mbwar vəngkər səli ku ləkəma ka ndzəndzi ata Gar Ofel. Antə Ziha ka Gishpa an mji na ol'ola ata kəra mjir kəthlər akwa mbwar vəngkər səli ni.

²²Tsuwa mdə na ola ata kəra mjir Lawi na akwa Urushalima ni an Uzzi na ɓzər Bani, na ɓzər Hashabiya, na ɓzər Mattaniya, na ɓzər Mika, akwa nyarmbwar Asaf. Tsuwa mjir nyarmbwa ngəni an ata kəra mjir hara ha na akwa mbwar Hyel.

²³Kamnyar tsawa laga aɗi akəla kuthli na ku ɗəmhə suayeri tə mjir ha ni ata harari akwa kuta kəlara pci.

²⁴Tsuwa Pethlahiya na ɓzər Meshezabel, na akwa nyarmbwar Zera, na akwa nyarmbwar Yahuda, an wakilər kuthlir Parsiya ata kəra shanga wujir na ku tsəkwar mjir Israila.

²⁵Ata kəra diyayeri kəga bəbalayeri na kalaktə ɗa, bwadukwa mjir Yahuda ku ndzəndzi akwa Kiriyath Arba ka diyayeri na kalaktə ni, ka akwa Dibon ka diyayeri na kalaktə ni, ka akwa Yekabzeyel ka diyayeri arni, ka akwa Dibon ka diyayeri arni,

²⁶ka akwa Yeshuwa, ka akwa Molada, ka Beth Pelet,

²⁷ka akwa Hazar Shuwal, ka akwa Beyersheba ka diyayeri na kalaktə ni,

²⁸ka akwa Zigklag, ka akwa Mekona ka diyayeri na kalaktə ni,

²⁹ka akwa En Rimmon, ka akwa Zora, ka akwa Yarmuth,

³⁰ka akwa Zanowa, ka Adullam ka diyayeri na kalaktə ɗa, ka Lakish ka mtakayeri na kalaktə ni, ka Azeka ka diyayeri na kalaktə ni. Apani antə da ku ndzəndzi akwa su na baɗita adzə Beyersheba har ka mwanta adzə Mular Hinnom.

³¹Tsuwa mjir nyarmbwar Benjamin ku ndzəndzi ahar Geba, ka Mikmash, ka Ayya, ka Bethlel ka diyayeri na kalaktə ni,

³²ka ahar Anathloth, ka Nob, ka Ananiya,

³³ka Hazor, ka Rama, ka Gittayim,

³⁴ka Hadid, ka Zeboyim, ka Neballat,

³⁵ka Lod, ka Ono, ka akwa mular ar mjir nam su ka tsi.

³⁶Tsuwa mjir Lawi laga aɗi akwa Yahuda na ku ra ndzəndzi akwa nca mjir Benjamin.