Read bura-pabir Neh 13 Bible Online

Neh 13 - bura-pabir bible

Neh 13

¹Vir nda mdə ku karatə Kakaɗər Musa aka mji ni, tsuwa mdə ku wutə rəbutə rəbutari akwa kakaɗə ni abbər mdər Ammoni wala Mowab aɗi ata ləkwa tsaptədzər mjir Hyel wa,

²kamnyar da aɗi thlakəma mjir Israila ka susəm wala yimi sakatə da səɓəla akwa Masar wa. Ata vəya ndaga, da ntəmta Balaam ka tsa shuwumta mjir Hyel. Amma Hyelər yeru ku shinantə ɗimikur ni tə tsa ndzi barka.

³Sakatə mjir Israila ku nggatə tsawu ni, antə da fwaɓəla shanga mji na aɗi mamshir Israila wa kazhar nca mjir Israila.

⁴Akəmata saka ngəni mdə ku vəngkər Eliyashib na prist ata kəra mbwayeri na akwa kutakəyir Hyelər yeru, kamnyar tsa yangkura Tobiya.

⁵Antə Eliyab ku na ka Tobiya mbwa laga na ola natə akwa saka na təramta mda ana pwi sur hamta ar mpwa akwa, ka tulari, kəga sur pwi su tə mda ana hara kəthlər kəgari akwa mbwar vəngkər səli, ka tsuwa zaka ar mthli, ka yimər anap na bilənari, ka mal zaitun natə mdə tsawa abbər ka mdə na aka mjir Lawi, ka mjir ha, ka mjir sək nyarmbwar vəngkər səli, kəga sur hamta aka pristayeri.

⁶Sakatə su nayeri ni akwa hara I aɗi akwa Urushalima wa, kamnyar akwa məva na makkumari ka suɗkur ar Artashasta na kuthlir Babila, antə I mwari adzə kuthli ni kamnyar hamta alari labar ata kəra su ni. Aghəla saka laga raka antə I kiɗa abbər ka kuthli na ali laku, kəi ngka ahar Urushalima.

⁷Sakatə I ngka ahar Urushalima, antə I wutə ɗimikur tə Eliyashib hara ni, laku tə tsa kətə mbwa pal akwa bəbal kutakəyir Hyel, ka na aka Tobiya ni.

⁸Antə ɗəffi ku ɓzə ka duna, tə I fwaɓəla kariyir Tobiya kazhar kutambwa ni ka pumta aɓəla.

⁹Antə I tsawa abbər ka mdə kəcimta kutambwayeri ni. Antə I ngka ka kariyir kutambwar Hyel ni ata kəma duku kəga saɗakar mpwa, kəga tulari ni, ambwa akwa vəi ndzəndziyir ɗa.

¹⁰Tsuwa I ku nggaɓəla abbər mda aɗi hamta bwa tə mdə thlamta abbər mda ata hamta aka mjir Lawi ka mjir kəthlər akwa vəi vəngkər səli ni wa, antə mjir Lawi ka mjir hara ha ku təra ka mwari akwa fakayeri arɗa.

¹¹Antə I mpa aka mji ol'ol ni ka pəla, “Kamnyar mə tə mdə fwari ata kəra mbwar vəngkər səli nə ri?” Antə I tsaptə mjir Lawi ni kəga mjir hara ha ni ata kəma duku, ka pu ɗa akwa vəi kəthlərayeri arɗa.

¹²Antə shanga mjir Yahuda səntə zaka ar mthli, ka yimər anap, ka malər zaitun akwa mbwayeri ar pwi su.

¹³Antə I vətə Shelemiya na prist ni, ka Zadok na mdər rəbutə ni, ka Pedaiya na akwa nyarmbwar mjir Lawi, ka da wul mbwar pwi su ni. Tsuwa I ku vətə Hanan na ɓzər Zakkur, na ɓzər Mattaniya, ka tsa ndzi mdər dlar ɗa, kamnyar mdə ku wuta abbər da ka jirkur, antə mdə ku na ɗa kəthlər ar ndəkəmta kariyayeri tə mda akwa səntari ni aka maɗama' ɗa.

¹⁴“Aiyi Hyelərna, ɗangtə ra bu ata kəra su ngəni. Ga aɗiya fwavumta kəthlərayeri na ɓɗakɓɗaku tə I hara kamnyar mbwar nga ka tsuwa kəthlər ar vəngkər səli tə mda ana hara akwa mbwa ni wa.”

¹⁵Akwa virayeri na ndaga, I ku wutə mjir Yahuda laga akwa ntsar yimər anap akwa Vir Ghərəmtaghəra, tsuwa da akwa səntə bufayeri ar mthli, kəga yimər anap, ka yar anap, ka yar kamnda, kəga kəlayeri damwa zumzum, akwa puta ata kwarayeri, akwa səntari akwa Urushalima akwa Vir Ghərəmtaghəra ar Sati. Antə I tsaktə ɗa vir nda abbər da aɗiya ɗəl kari susəm ni akwa kuta pci ndagə wa.

¹⁶Tsuwa mjir bərni Taya na ka ndzi akwa Urushalima, ku səvəi ka kəlfa ka shanga kari fəli damwa akwa Urushalima, akwa ɗəlari akwa Vir Ghərəmtaghəra ni aka mjir Yahuda.

¹⁷Antə I mnya aka mji ol'olər Yahuda ni, ka pəla ala ɗa, “Ngəni jili ɗimikur madi tə giri akwa harari nə ri! Giri akwa ɓzamtə Vir Ghərəmtaghəra!

¹⁸Aɗi apani antə kəkayeri ar giri hara wa ya? Tsuwa aɗi kamnyar su ngəni antə Hyelər mburu akwa səntə shanga bwani ngəni ata kəra mburu ka ata kəra bərni ni wa ya? Amma ba sakani giri akwa səntə bwani na mwavər ata kəra Israila atar ɓzamtə Vir Ghərəmtaghəra!”

¹⁹Antə I hamta tsawa abbər ka mdə hagartə nyarfayeri ar Urushalima, baɗitə ka tahakər kurər Vir Ghərəmtaghəra ni. Tsuwa I ku hamta tsawa abbər ka mdə hagartə nyarmbwayeri ni, tsuwa mda aɗiya kəlar ɗa wa tar ma Vir Ghərəmtaghəra ni ku təramta. Antə I pu mji laga na ana hara ali kəthlər ka da sək nyarfu, abbər mda aɗiya səvəi ka kəl akwa Vir Ghərəmtaghəra wa.

²⁰Ka pal wala ka suɗa antə mjir fəli ka mjir ɗəl shanga jili kariyayeri damwa ku pi aɓəla katanggar Urushalima.

²¹Amma I ku tsaktə ɗa ka pəla, “Kamnyar mə tə giri ana pəpəi aɓəla katangga nə ri? Ma giri ku jakta, I ata fatə giri!” Baɗitə ka vir nda, da aɗi jaktə si ata Vir Ghərəmtaghəra kəra wa.

²²Antə I tsawa aka mjir Lawi abbər ka da kəcimta kərɗa ka da sə sək nyarfayeri ni, kamnyar ka mdə ɓəlatə Vir Ghərəmtaghəra ni ka tsa ndzi ɓɗakkarkara. “Antə Hyelərna, ɗangtə ra ata kəra su ngəni bu. Kətadzə ra kamnyar hirkurər nga na ola na ana palidzə wa ni.”

²³Tsuwa akwa sakayeri nda, I ku wutə mjir Yahuda na ku kəl mwankir tsəɗi Ashdod, ka Ammon, ka Mowab.

²⁴Retar maɗa' ɗa ana mnya durər Ashdod, da aɗi ana mzhi mnyar mjir Yahuda wa.

²⁵Antə I mpa ala ɗa, ka shuwumta ɗa, ka ɓu bwadukwa ɗa, ka ntsuntsumta shishir kəra ɗa, ka vu ɗa tə da kahyel abbər da aɗi ata hamta maɗangkwiyir ɗa aka maɗashilər mji ni wa, wala kəl maɗangkwiyir ɗa aka maɗashilər ɗa wa, wala aka kəra ɗa wa.

²⁶I pəla, “Aɗi kamnyar kəl jili mwanki ngəni antə Solaman na kuthlir Israila hara biku ni wa ya? Akwa shanga tsəɗiyayeri kuthli aɗi na apa Solaman wa, tsuwa Hyelərni ku hir ni, ka vətə ni tə tsa ndzi kuthlir shanga mjir Israila. Amma wala apani, mwanki na dur gapani ni ku vu har tə wala tsa ka kərari ku hara biku.

²⁷Kalkal ya ka yeru nu giri, ka hara su ngəni ɗimi kamtə ni, har ka yeru ndzi kula jirkur aka Hyelər yeru atar kəl mwankir dur gapani?”

²⁸Pal akwa nca maɗashilər Yehoyada, na ɓzər Eliyashib prist na ola, an sal ngkwar Sanballat na mdər Horon. Antə I kədləmta ni kazhar ra.

²⁹“Ɗangtə ɗa bu Hyelərna, kamnyar da ku hilantə kəthlər ar pristkur, ka alkawal na ar pristkur, ka ar ndzi lawikur.”

³⁰Atar apani antə I ku kəcimta pristayeri ka mjir Lawi ta shanga suayeri na ku ndzi surharar dur gapani, ka hamta ala ɗa kəthlərayeri tə ka da hara, waskəi ka mnya kəthlərərni.

³¹Tsuwa I ku ɗəmhə laku tə mda ata ləkəma ka səntə udzəm kamnyar hamta saɗaka ata sakayeri tə mdə thlamta, ka tsuwa kamnyar suayeri na ng'hə ntangkəma. “Aiyi Hyelərna, ɗangtə ɓɗakkur tə gə hara ali ni bu.”