Read bura-pabir Neh 2 Bible Online

Neh 2 - bura-pabir bible

Neh 2

¹Aghəla thliya nfwar, təng vir laga akwa thliya Nisan ar məva na sərkumarkur ar Kuthli Artashasta, sakatə mdə ku ɗəmha alari yimər anap, antə I mwari ka hamta alari. Tsuwa kuthli aɗi ɗar wutə ra ka kəmi hərhərari apani akəmari wa.

²Antə kuthli yu ra abbər, “Kamnyar mə tə kəma gə hərhərari ri? Nggədza I akwa wula apa aɗi nggawakur an akwa damitə ngə wa. I tamata aɗi su damwa wa, amma ɗəffa ga an ɓza.” Antə I thlivəra ka duna,

³ka pəla aka kuthli ni abbər, “Ka far ngə fəi! Kamnyar mə tə kəmi andzi hərhərari wa ri, təng tə mdə ku huzamta bərni tə mdə harəmta kəkayeri arna akwa, ka mbagamta nyarfayerari ka u'u?”

⁴Antə kuthli ni pəla ali abbər, “Man su tə ga akwa barari ri?” Antə I hara adduwa aka Hyel na amtazi.

⁵Aghəla nda antə I pəla aka kuthli ni abbər, “Ma akəs kəra ga, tsuwa ma I na mafar nga an ata wutə mdəkur ata nca ga, thlentə ra bu ahar Yahuda, akwa bərni tə mdə harəmta kəkayeri arna akwa, kəi ra jaktə həntari.”

⁶Akwa saka ndaga mwala' kuthli ni andzəndzi athlimbəlari. Antə sakatə kuthli ni yu ra abbər, “Kəthlər ni ata kətə vir yiɗauri, tsuwa nawa antə ga ata ngka ri?” Antə I pəla alari. Apani kuthli ni ku kələngkər ka thlentə ra. Antə I thlamta alari sakatə I ata sə ngka.

⁷Antə I pəla aka kuthli ni abbər, “Ga adlar ra ka kakaɗu ya, kəi mwanta aka gwamnayeri ar lardayeri na aɓəla bwanda Thlyagha Yufiretis ni, kamnyar ka da zhar ra kəi təramta akwa tsəɗiyir ɗa har kəi mzhitə Yahuda?

⁸Tsuwa dlar ra bu ka wasika kəi mwanta aka Asaf na mdər wul kuɓər nfur kuthli, kamnyar ka tsa mzhi na ali udzəmayeri na ɓəɓal, kəi namtə udzəm kəra mbwayeri na raka raka ar nyarmbwar katanggar mbwar vəngkər səli ni, ka katanggar bərni ni, ka tsuwa kamnyar mbwa tə I ata sə ndzəndzi akwa.” Antə kuthli ku na ali shanga su tə I yuwa akəlari, kamnyar mambələr Hyelərna na ka barka ata kəri.

⁹Antə kuthli thlenta ali mji ol'olər sojayeri, ka mjir fəl taku, ka yeru təra kəga da ata kəma duku. Antə I mwari adzə gwamnayeri ar lardu na aɓəla bwanda Thlyagha Yufiretis ni, ka hamta ala ɗa wasikar kuthli ni.

¹⁰Amma sakatə Sanballat na mdər Horon, ka Tobiya na wakilər Ammon, nggata abbər mdə laga ku si kamnyar dlar mjir Israila ni, antə ɗəffa ɗa ɓzi ka duna.

¹¹Apani I ku mzhitə Urushalima, ka hara vir makər anda.

¹²Antə I thlata aviri, ka təra kəga mji laga yiɗauwa, kula pəla ala ɗa su tə Hyelərna akwa bara kəi ra harari akwa Urushalima. Tsuwa mwaɓi na adzə yeru an təng kwara duku tə I akwa fəlari.

¹³Antə I ləɓəla aviri, ka nu təbwar Nyarfur Mular, ka mwari atar Jiɓər Kilamtaku, ka atar Nyarfur Kumba. Antə I wulɓəla katanggar Urushalima natə mdə ɓəgələmta ni, ka nyarfayerari natə mdə mbamta ka u'u ni.

¹⁴Antə I ləkəma ka mwari abwar Nyarfur Kucirkila ka atar Vəi Idlər Kuthli, amma vəi təramtar kwara tə I ata ni aɗi wa.

¹⁵Antə I nu təbwar mular aviri ni, ka wulhə katangga ni. Antə I ngka, ka ləvəi tsu atar laku tə I nu ntangkəma ni, atar Nyarfur Mular.

¹⁶Mda aɗi wala pal akwa nca mji na ol'ol ni na ku səndə vəi tə I mwari ata wa, wala su tə I akwa harari wa. Tsuwa I aɗi ka pəla aka maɗama'na na mjir Yahudi wa, wala aka pristayeri, wala aka mji ol'ola na ka səli, wala aka mji na ol'olər vəi kəthlər, wala aka mambila mji na ata hara kəthlər ni wa.

¹⁷Antə I pəla ala ɗa abbər, “Wul giri jili bwani tə mburu akwa, laku tə mdə huzamta Urushalima ka namtə ni apa kumba, ka mbagamta nyarfayerari ni. Asər giri, ka mburu jaktə həntə katanggar bərni Urushalima ni, ta mburu aləkəma ka ndzi akwa sur səli ni.”

¹⁸Antə I ngkərɓəla ala ɗa apatə Hyel ku ndzi ata kəri ka hara ali ɓɗakkur, ka suayeri natə kuthli pəla ali. Antə da pəla ali, “Mbura thlatə ka mburu baɗitə hən ni.” Antə da dunautə kərɗa akwa kəthlər ngəni na ɓɗaku ni.

¹⁹Amma sakatə Sanballat na mdər Horon, ka Tobiya na wakilər Ammon, ka Geshem na mdər Arab, nggatə su tə yeru ɗəmhə ni, antə da kumshi yeru ka hara mnya ɗimi ala yeru. Da pəla, “Ngəni man su tə giri akwa harari nə ri? Giri ata bara hara kər ɓəɓalkur aka kuthli ya?”

²⁰Antə I shinau ala ɗa abbər, “Hyel na amtazi ata hara ka yeru kuri su tə yeru akwa harari ni lapiya, kamnyar yeru an mjir kəthlər arni. Antə yeru ata thlatə ka baɗitə hən ni. Amma ar giri su aɗi tə giri ata ɗarari, wala wutari, wala an sur ɗangta ala giri akwa Urushalima wa.”