Read bura-pabir Neh 3 Bible Online

Neh 3 - bura-pabir bible

Neh 3

¹Nggədza laku tə mdə jaktə həntə bərni Urushalima ni akwa. Eliyashib na olər pristayeri kəga maɗama'ni na pristayeri an thlatə ka hənɓəla Nyarfur Təma ni, ka pu tapərayerari, ka hamta aka Hyel. Antə da həntə katanggari tsuwa saɓəl har ka vədza aka Mbwa na Nal ar Aru, har ka mwanta adzə Mbwa na Nal ar Hananel, ka hamta aka Hyel.

²Antə mjir Yariko vəmnya ata vəi tə Eliyashib thləthlatə ka hən ni. Antə Zakkur na ɓzər Imri tsuwa vəmnya ata vəi tə mjir Yariko thləthlata, ka ləkəma hən ni.

³Antə mjir nyarmbwar Hassenaa an hənɓəla Nyarfur Kəlfa. Antə da ncigəu udzəm akwa nyarfu ni ka pugəu tapərayerari akwa, ka bwaltayerari ka sur dzəkatə ɗa tə mdə nam ka liya.

⁴Antə Meremoth na ɓzər Uriya, na ɓzər Hakkoz, vəmnya ata vəi tə mjir Hassenaa thləthlatə ka hənər ɗa, ka ləkəma ka hən ni. Antə Meshullam na ɓzər Berekiya, na ɓzər Meshezabel, vəmnya ata vəi tə Meremoth thləthlatə ka hənərni, ka ləkəma ka hən ni. Antə Zadok na ɓzər Baana vəmnya ata vəi tə Meshullam thləthlatə ka hənərni, ka ləkəma ka hən ni.

⁵Antə mjir Tekowa vəmnya ata vəi tə Zadok thləthlatə ka hənərni, ka ləkəma ka hən ni. Amma mji na ol'olər diyir ɗa aɗi hir dlar ɗa akwa kəthlər tə mjir wul kəthlər vu akwa tsiya ɗa ni wa.

⁶Antə Yehoyada na ɓzər Paseya ka Meshullam na ɓzər Besodeya hənɓəla Nyarfu na Halhalari ni. Da nciu udzəm akwa nyarfu ni, ka vu tapəra, ka pu bwaltayerari ka udzəm liya ar dzəkatari.

⁷Antə Melatiya na mdər Gibeyon, ka Yadon na mdər Meronoth, ka mjir Gibeyon kəga mjir Mizpa, na akira gwamnar lardu na aɓəla bwanda Thlyagha Yufiretis, ku vəmnya ata vəi tə Yehoyada ka Meshullam thləthlatə ka hənər ɗa.

⁸Antə Uzziyel na ɓzər Harhaiya, na mdər ɓdlə dinar, vəmnya ata vəi tə mji na akira gwamna thləthlatə ka hənər ɗa. Antə Hananiya na mdər nam tulari ku vəmnya ata vəi tə Uzziyel thləthlatə ka hərnərni. Antə mji ni ku jaktə hənɓəla har ka pudza aka Katangga na Bau ni.

⁹Antə Refaiya na ɓzər Hur, na olər retar Urushalima, ku vəmnya ata vəi tə Hananiya thləthlatə ka hənərni.

¹⁰Antə Yedaiya na ɓzər Harumaf, vəmnya ata vəi tə Refaiya thləthlatə ka hənərəni, ka hənɓəla katangga na awul kəyirni. Antə Hattush na ɓzər Hashabneya vəmnya ata vəi tə Yedaiya thləthlatə ka hənərni.

¹¹Antə Malkiya na ɓzər Harim ka Hasshub na ɓzər Pahath Mowab, hənɓəla bwa laga, ka Mbwa na Nal ar Vəi Ɓwa Buradi.

¹²Antə Shallum na ɓzər Hallohesh, na olər retar Urushalima, ku vəmnya ata vəi tə Malkiya ka Hasshub thləthlatə ka hənər ɗa. Tsuwa maɗa'ni na maɗangkwi ku dlar ni akwa kəthlər ni.

¹³Antə Hanun ka mji na ka ndzi akwa Zanowa ku hənɓəla Nyarfur Mular. Da hənɓəla ni ka pugəu nyarmbwayeri, ka bwaltayeri, kəga udzəm ar dzəkatari, ka hənɓəla katangga natə saɓəlkurari ku mwantə dzartsi dəpu pal, har ka vədza aka Nyarfur Kumba.

¹⁴Antə Malkiya na ɓzər Rekab, na olər Beth Hakkerem, ku hənɓəla Nyarfur Kumba. Tsa hənɓəla katangga ni, ka pugəu nyarmbwayerari, ka bwaltayerari, kəga udzəm liya ar dzəkatari.

¹⁵Antə Shallum na ɓzər Kolhoze, na olər zarar Mizpa ku hənɓəla Nyarfur Kucirkila ni. Tsa hənɓəla nyarfu ni, ka hartə kərari, ka pugəu tapərayerari, ka bwaltayerari, kəga udzəm liya ar dzəkatari. Tsuwa tsa ku jaktə həntə katanggar Kufar Shela, watau Silowam, na adzə gadinar kuthli, har ka mwanta adzə vəi ləghəi na thlata akwa Bərni ar Dauda.

¹⁶Antə Nehemiya na ɓzər Azbuk, olər retar zarar Bethzur, vəmnya hən katangga ni ata vəi tə Shallum thləthlatə ka hənərni. Tsa hənɓəla har ka mwanta adzə vəi na awul kulər Dauda, ka kufa laga tə mdə namta, ka vəi Kəyir Sojayeri na ol'ola.

¹⁷Nayeri ni an mjir Lawi na baɗitə hənɓəla katangga ni akwa vəi tə Nehemiya thləthlatə ka hən ni. Rehum na ɓzər Bani an baɗitə hən ni. Antə Hashabiya na olər retar zara Keyila, vəmnya hənərni ata vəi tə Rehum thləthlatə ka hənərni.

¹⁸Nggədza thləma maɗama' ɗa na dlara akwa hənɓəla katangga ni. Bavvai na ɓzər Henadad, na olər dukwa retar zarar Keyila, an vəmnya ata vəi tə Hashabiya thləthlatə ka hənərni.

¹⁹Antə Ezer na ɓzər Yeshuwa, olər zarar Mizpa, vəmnya ata vəi tə Bavvai thləthlatə ka hənərni. Tsa hənɓəla bwa na wul vəi ndləɓəla ka mwara akwa vəi pwi kari mpa, akwa vəi tə katangga ni ɗengidzi.

²⁰Antə Baruk na ɓzər Zabbai hənɓəla bwa laga na baɗita adzə vəi tə katangga ɗengidzi ni, ka mwanta adzə nyarfur kəyir Eliyashib prist na ola.

²¹Antə Meremoth na ɓzər Uriya, na ɓzər Hakkoz vəmnya hən ni ata vəi tə Baruk thləthlatə ka hənərni, har ka mwanta adzə tsikəra kəyir Eliyashib ni.

²²Mji na vəmnya ata vəi tə Meremoth thləthlatə ni an pristayeri na thlata akwa gala na kalaktə Urushalima.

²³Antə Benjamin ka Hasshub vəmnya ata vəi tə pristayeri ni thləthlata, akwa bwar katangga na awul kəyir ɗa ni. Antə Azariya na ɓzər Maaseya na ɓzər Ananiya, vəmnya ata vəi tə Benjamin ka Hassub thləthlata. Tsa hənɓəla bwa na adzə kəyirni.

²⁴Antə Binnuwi na ɓzər Henadad hənɓəla bwa na thlata adzə kəyir Azariya ka mwanta adzə vəi tə katangga ni ɗengidzi ni.

²⁵Antə Palal na ɓzər Uzai hənɓəla vəi na thlata adzə kuɗəmar katangga ni, ka hən na nal na akwa kəi kuthli, kudzəhə ka bəbalər mjir səkə ni. Antə Pedaiya na ɓzər Parosh vəmnya hənərni ata vəi tə Palal thləthlata.

²⁶Pedaiya ku hara kəthlər ata kəma duku kəga mjir kəthlərər mbwar vəngkər səli na ata ɗəɗəgəl Ofel. Da hənɓəla katangga ni har ka mwanta adzə vəi laga na awul Nyarfur Yimi na abwar raghəi, awul hən na nal ni.

²⁷Antə mjir Tekowa vəmnya hənər ɗa ata vəi tə Pedaiya thləthlata. Da hənɓəla bwa na awul hən na nal ni, har ka mwanta adzə katanggar Ofel.

²⁸Antə pristayeri laga hənɓəla bwar katangga na thlata akwa Nyarfur Taku ka ləmta ni, waskəi hənɓəla bwar katangga na awul kəyirni.

²⁹Antə Zadok na ɓzər Immer vəmnya ata vəi tə pristayeri ni thləthlata. Da hənɓəla bwa na awul nyarfurni. Antə Shemaiya na ɓzər Shekaniya, na ana sək Nyarfur Bwa Raghəi ni, vəmnya hənərni ata vəi tə Zadok thləthlata.

³⁰Antə Hananiya na ɓzər Shelemiya ka Hanun ɓzər na ngkwakur ar Zalaf, vəmnya ata vəi tə Shemaiya thləthlata. Antə Meshullam na ɓzər Berekiya vəmnya ata vəi tə Hananiya ka Hanun thləthlata. Da hənɓəla bwa na awul kəyirni.

³¹Antə Malkiya, na pal akwa nca mjir ɓdlə dinar ni, vəmnya ata vəi tə Meshullam thləthlata. Tsa hənɓəla katangga ni har ka mwanta adzə kəyir mjir kəthlər akwa mbwar vəngkər səli, ka kəyir mjir fəli, awul Nyarfur Tsaptədzi, har ka mwanta adzə mbwa na ata kəra katangga na akwa kuɗəma ni.

³²Antə mjir ɓdlə dinar ni ka mjir fəli ni hənɓəla bwa na akwa daɓwa mbwa na ata kəra katangga ni ka Nyarfur Təma ni.