Read bura-pabir Neh 4 Bible Online

Neh 4 - bura-pabir bible

Neh 4

¹Sakatə Sanballat nggata abbər yeru na mjir Yahudi akwa hən katangga ni, antə ɗəffari ɓzi ka duna, tə tsa ləkwa hara kyartəkur ala yeru.

²Antə tsa pəla ata nca pazhayeri arni ka sojayeri ar Samariya abbər, “Man su tə mjir Yahudi na hava ni akwa bara harari ri? Da akwa bara jaktə namtə katanggar bərniyir ɗa ya? Da akwa bara hamta saɗaka ya? Da na wuta apa da ata mzhi kuri hən katangga ni akwa vir duku ya? Da ata mzhi jaktə kəthlər ka pelayeri na akwa kumbə ni ya, pelayeri tə u'u ku mbaɓəla duna ɗa ni?”

³Antə Tobiya na mdər Ammon na adzə ni pəla abbər, “Ai jili katangga ngəni tə da akwa hənari ni ma, wala ufa an fəltə tsa ata ndlamtari.”

⁴Antə I na Nehemiya hara adduwa abbər, “Hyelər yeru, ngga jili rutə tə mji ngəni akwa hara ala yeru ni bu! Hara ka mnya ɗimi tə da akwa harari ni ngka ata kəra ɗa. Ka gə hara ka mdə fatə ɗa ka mwantə ɗa akwa mafakur akwa tsəɗi damwa, apa su tə mdə dlutsa akwa mpa.

⁵Ga aɗiya yafitə ɗa wa, tsuwa ga aɗiya fwari ata kəra bikər ɗa wa, kamnyar da ku bara mpar yeru ka ɓzamtə ɗəffa yeru ata nca mjir hən ni.”

⁶Antə yeru ku ləkəma ka hən katangga ni, ka jiktə katangga ni har ka mwanta aka retar nalkurərni, kamnyar tə mji ni ka ɗəffər kəthlər.

⁷Amma sakatə Sanballat, ka Tobiya, ka mjir Arab, ka mjir Ammon, ka mjir Ashdod, nggata abbər kəthlər ar hən katanggar Urushalima ni akwa ləkəma, tə daɓwa ɗa akwa ndlətədzi, antə ɗəffa ɗa ɓzi ka duna.

⁸Antə shanga ɗa paktə kər ata kəma duku abbər ka da sə dlər Urushalima, ka da ndəndatə hangkala mjir di ni.

⁹Amma yeru ku hara adduwa aka Hyelər yeru, ka pwi mji na ata sək kəra ɗa pci ka viri.

¹⁰Antə mjir Yahuda baɗitə hara har tuwa laga abbər, “Duna mjir fa kəl ni akwa kəta, tsuwa mzhiku ni ku hara hang! Yeru ata mzhi kuri katangga ngəni nggye?”

¹¹Tsuwa dawayeri ar yeru akwa pəla abbər, “Kwabə da awutə mburu wala səndə su na akwa hara, mburu ku pungkərdzi ata kəra ɗa, ka tsəgəi ɗa, ka ngkatə kəthlər ni.”

¹²Apani antə mjir Yahudi na ka ndzi akwa nca dawayeri ar yeru ni ku si adzə yeru ata kər ata kər, akwa tsaktə yeru abbər kəlara bwa tə yeru ku shinardzi akwa, dawayeri ni ata pungkərdzi ata kəra yeru.

¹³Kamnyar ngəni I ku pwi mjir səka waskəi ka katsakar, ka mwasu, ka lali. I pwi ɗa ata nyarmbwa ata nyarmbwa abwahila katangga ni, akwa bwayeri na aɗi kuri hənɓəladzi katagu wa.

¹⁴Antə I thlata, ka wuləmta su, ka pəla aka mji na ol'ola ka səli, ka mji na ol'ola ata kəra su, ka mambila mji abbər, “Giri aɗiya thlivər dawayeri ar giri ni wa. Ɗangta giri abbər MTHLAKU an ola, natə shanga mji ana thlivər ni. Apani ka giri mpa kamnyar maɗama' giri, ka maɗashilər giri, ka maɗangkwiyir giri, ka mwankir giri, ka kutakəyir giri.”

¹⁵Sakatə dawayeri ku nggata abbər yeru ku nggaɓəla su tə da akwa ɗəmhari ata kəra yeru ni, ka abbər Hyel ku tuzhimta su tə da ɗəmhə ni, antə shanga yeru ngka ata mnya kəthlər ar hən katangga ni, waskəi ka kəthlər arni.

¹⁶Amma baɗitə ka vir nda, retar mjirna an akwa hara kəthlərər hən ni, kamnyar retar ɗa ku hatə ləptər liya, ka fatə kari mpa, watau mwasu, ka partau, ka lali, akwa sək kəra ɗa. Tsuwa mji na ol'ola ata kəra kəthlər ni ku thləthlata aghəla shanga mjir Yahuda

¹⁷na akwa hən katangga ni. Wala mjir fa kari kəthlər hən katangga ni akwa kəthlər ka tsiya ɗa pal pal, tsiya ɗa na dukwari akwa kəs kari mpa.

¹⁸Tsuwa kəlara mdə na akwa hən ni, tsa ka katsakar mbwimbwiyari ata kusarari akwa sakatə tsa akwa hən ni. Antə mdər mbur təmbəl ar psəmnya mpa aka mji tsuwa ku thləthlata adzə ra.

¹⁹Antə I pəla aka mji ol'ola na ka səli, ka mji na ol'ola ata kəra kəthlər, ka mambila mji abbər, “Kəthlər ngəni ola, tsuwa kəthlər ni leɓleɓu akwa kəlara bwa. Tsuwa mburu ndəkndəkari akwa kəthlər katangga ni, ciju ciju ta nvwa mburu.

²⁰Antə akwa kəlara vəi tə giri ku nggatə mda akwa mbur təmbəl ni, ka giri hwi mwari anda adzə yeru. Hyelər mburu ata mpa kamnyar mburu.”

²¹Apani antə yeru ku ləkəma ka kəthlər ni, baɗitə ɗəɗəpa har tə pci təri, bwadukwa yeru akwa kəthlər, bwadukwa yeru akwa sək kəra yeru ka katsakar akwa tsiya ɗa.

²²Tsuwa akwa saka ndaga I ku pəla aka mjir kəthlər ni abbər, “Ka kəlara mda ka mdər dlarərni ndzi tsu akwa Urushalima, kamnyar ma aviri ka da sək kəra bərni ni, ma təpci ka da ləkəma ka kəthlər.”

²³Antə apani, Iya, kəga maɗama'na, kəga buɗayeri arɗa, kəga mjir səka na nu ra ni, mda aɗi akwa nca yeru wala duku na ku ntsui ləptərni wa. Waskəi ku kəsi kari mparni ka yimər sa arni akwa tsiyari.