Read bura-pabir Neh 5 Bible Online

Neh 5 - bura-pabir bible

Neh 5

¹Vir laga təng mji laga kəga mwankir ɗa baɗitə nggungguni ka duna ata kəra maɗama' ɗa na mjir Yahudi.

²Kamnyar mji laga akwa nca ɗa pəla, “Yeru kəga maɗa' yeru shili ka mwanki ni, yeru hang, antə yeru akwa tur mthli, ka yeru səma ka ndzi ka mpika.”

³Mji laga aɗi tsuwa na ku pəla, “Yeru ku hamta fakər yeru, ka fakər anapər yeru, kəga kəyir yeru ka təpa kamnyar ka yeru wutə mthli akwa sakar mi.”

⁴Tsuwa mji aɗi na ku pəla, “Tar tə yeru dlu təmbəl kamnyar ntə tsəmər kuthli na ar fakər yeru ka fakər anapər yeru.

⁵Nggədza yeru su duku, mji kəga maɗama' ɗa. Maɗa' yeru ndzi apa maɗa' ɗa. Amma wala apani tar tə mdə vu yeru ka dwali ka yeru ɗələmta maɗa' yeru kəga maɗangkwiyir yeru ka da ndzi mafa. Tsuwa bwadukwa maɗangkwiyir yeru ku kurtə ka ndzi mafa. Amma su aɗi tə yeru amzhi hara ata kər wa, təng tə fakayeri ar yeru kəga fakər anapər yeru shang akwa tsiya mji.”

⁶Sakatə I na Nehemiya ku nggatə tuwar ɗa ka ndərayeri ngəni, antə ɗəffi ɓzi ka duna.

⁷Aghəla tə I ɗar dzama ata kəra su ngəni akwa ɗəffi antə I wuta abbər mji na ol'ol ni an ka biku. Antə I pəla ala ɗa abbər, “Giri akwa fəi maɗama'giri atar hamta ala ɗa təpa ka bara riɓa ata kər ni, waskəi akwa fəi ɓzərma'ni.” Antə I tsaptə mji dlama dlama kamnyar damitədzi ngəni,

⁸ka pəla ala ɗa abbər, “Yeru ku kəɗari ka pəli mjir mburu Yahudi natə mdə ɗələmta aka dur damwa. Amma nggədza har giri akwa ɗəl maɗama' giri ka yeru sə pəli ɗa ka damwa.” Amma mji na ol'ol ni dləɓ səri, kamnyar ndər aɗi tə da amzhi shinangkərari wa.

⁹Antə I na Nehemiya ləkəma ka pəla, “Su tə giri akwa hara ni aɗi ɓɗaku wa. Ai kalkal ka giri thlivər Hyel, kamnyar ta dawayeri ar mburu na dur damwa asə hara kyartəkur ala mburu.

¹⁰Kamnyar wala Iya, kəga maɗama'na, kəga buɗayeri arna, akwa hamta ala ɗa təpa ar kwaba ka mthli. Amma kulini ka mburu zhar wujir hamta təpa ka bara riɓa ata kər ni.

¹¹Antə tsu ashina ka giri ngka ala ɗa ka fakayeri arɗa, kəga fakayeri ar anap, kəga fakayeri ar zaitun, kəga kəyayeri arɗa. Tsuwa ka giri ngka ala ɗa ka riɓa ar duku akwa kuta aru, tə giri wuta atar təpa ala ɗa kwaba, ka mthli, ka yimər anap, ka mal zaitun ni.”

¹²Antə mji ol'ol ni pəla, “Yeru ata harari apatə gə pəla. Yeru ata ngka ala ɗa ka sur ɗa, tsuwa yeru aɗi ata jaktə dlu sur vəi akəla ɗa wa.” Antə I kəga pristayeri, ka vu tə mji ol'ol ni kahyel akəma ɗa abbər da ata nghyaɓəla alkawal tə da kətə ni.

¹³Antə I ɓumta mnya ləptərna ka pəla abbər, “Apani antə ka Hyel ɓumta kəlara mda akwa nca giri na aɗi ɓəlata alkawalərni wa. Watau, ka Hyel ɓumta kəyirni ka shanga su tə tsa kəgari, ka zhar ni kula su.” Antə shanga mji na tsaptədzi ni pəla, “Amin! Antə da hu MTHLAKU!” Antə mji ni ku hara apatə da ku kətə alkawalari.

¹⁴Tsuwa təng sakatə mdə vəi ra gwamna akwa tsəɗi Yahuda, akwa məvayeri kumnya suɗa na təramta, watau baɗita akwa məva na sərkumarkur ar kuthli Artashasta har ka mwanta akwa məva na makkumari ka suɗkur, Iya wala maɗama'na aɗi na ku səm susəma tə mdə thlamta kamnyar gwamna wa.

¹⁵Gwamnayeri na akəmata Iya ku nar bwani na mwavər aka mji atar dlu susəma ka yimər anap akəla ɗa, bamnda liyar adzərfa nfwarkumari ni. Har wala mjir dlarər ɗa ma ku ghərantə mji ka duna. Amma arna, I aɗi hara apani wa, kamnyar I ana thlivər Hyel.

¹⁶Ata vəya ndaga, I vu duni akwa kəthlər hən katangga ni. I aɗi bara fakəu aka kəri wa, tsuwa shanga yeru kəga buɗayeri arna ku tsaptədzi anda akwa kəthlər ar hən ni.

¹⁷Nggədza tsuwa mji aru ka ntəfkumari ana səma ata vəi duku ka iya, watau mjir Yahudi kəga mji na ol'olər kəthlər, zhar ka mji na thlata akwa tsəɗiyayeri na kalaktə mburu.

¹⁸Ngəni an laku tə mda ana ɗəmha ali susəma parang viri. Mda ana tsi gyal pal, ka təmayeri na ɓɗakta shang ngkwa, ka mtəkayeri hang. Tsuwa aghəla kəlara vir kuma mda ana hamta yimər anap hang. Amma ata kəra shanga suayeri ngəni I aɗi bara ka mdə ni jili susəma natə mdə thlamta kamnyar gwamna wa, kamnyar I wuta abbər mji akwa ɗar bwani kamta.

¹⁹“Hyel arna, ɗangtə shanga su tə I hara kamnyar mji ngəni bu, ka gə hara ali ɓɗakkur.”