Read bura-pabir Neh 6 Bible Online

Neh 6 - bura-pabir bible

Neh 6

¹Vir laga təng Sanballat, ka Tobiya, ka Geshem na mdər Arab, ka mambila dawayeri ar mburu nggata abbər I ku kuri hənɓəla katangga ni, har tə gula aɗi na mbil kəra wa, wala tə ata saka nda I aɗi pu tapəra akwa nyarfayeri ni katagu wa.

²Antə Sanballat ka Geshem thlenta ali labar abbər kəi ra wutə ɗa akwa di laga na akwa Bəbalər Ono. Amma su na akwa ɗəffa ɗa an ka da dəkəi ra.

³Antə I thlentə mji ka da pəla ala ɗa abbər, “I akwa hara kəthlər na ola antə I amzhi mwari wa. I aɗi ata zhar kəthlər ngəni abbər kəi ra wutə giri wa.”

⁴Da thlenta ali jili ndər ngəni har ka nfwar, antə I shinau ala ɗa tsu akwa laku duku.

⁵Aghəla nda antə Sanballat thlenta ali mdə na ntəfkur ka kakaɗu laga kəlarkəlarari akwa tsiyari.

⁶Nggədza su tə da rəbuta akwa kakaɗə ni. “Mjir tsəɗiyayeri na kalaktə mburu akwa ngkərari abbər ga ka mjir Yahuda akwa bara hara kər ɓəɓalkur, an su na hara tə giri akwa hən katangga ni. Tsuwa Geshem ku pəla ali abbər jiri su aɗi apani. Tsuwa har ga akwa bara ndzi kuthlir ɗa, apatə yeru nggata.

⁷Har I nggata abbər ga ku ɗəmhə naɓiyayeri na ata psəmnya akwa Urushalima abbər ga an kuthlir Yahuda. Tsuwa gə ka səndari abbər kuthli ata nggatə labar ni. Antə kuji ka gə si kulini ka mwa nggaɓəladzi ata kəra gari ni.”

⁸Antə I thlentə mda ka mdə pəla alari abbər, “Su aɗi na hara apani shang jiri wa. Gə ka kəra ga ana akwa pa ndər ni.”

⁹Kamnyar shanga mji ngəni akwa bara thlivərantə yeru, ka yeru pumta kəthlər ni, ka kəthlər ni thləthlata. Antə I hara adduwa abbər, “Aiyi Hyel, dunautə ra bu!”

¹⁰Vir laga tə I mwari ahar Shemaiya na ɓzər Delaiya, na ɓzər Mehetabel, natə mdə ngkata alari səɓəla akwa kəyirni ni, antə tsa pəla, “Mwa ra ɗuwardzi akwa mbwar vəngkər səli aka Hyel, ka mwa harəngkər nyarmbwa ata kəra mwa, kamnyar da akwa si ka da tsi nga. Jiri aviri, antə da ata si ka da tsi nga.”

¹¹Amma I shinau alari abbər, “Ga ana wuta apa I jili mdə na ana hwi asar ya? Nənga shang ma jili mda apa I ni, ata mzhi ləkwa mbwar vəngkər səli ka ndzi ka mpikə ya? Awa, I aɗi ata mwari wa.”

¹²Təng təkəma I nggaɓəla abbər Hyel aɗi gari aka Shemaiya wa, amma Tobiya ka Sanballat an ntəmta ni ka tsa sə ngkər ali ndər ngəni.

¹³Da ntəmta ni kamnyar ka tsa thlivərantə ra har kəi hara biku atar hara su tə da pəla. Atar su apani antə da ata mzhi ɓzamtə thləmi ka kəli səliyirna.

¹⁴Antə I hara adduwa abbər, “Hyel ragai, ɗangtə ɗimikur tə Tobiya ka Sanballat hara ala yeru. Tsuwa ɗangtə naɓi mwala Nowadiya, ka shanga naɓiyayeri nvwani na ku bara thlivərantə ra.”

¹⁵Apani mdə ku sə kuri hən katangga ni akwa kuta vir ntəfkumari ka suɗa. Da kuri akwa vira thliya sərkumari ka ntəfu ar thliyar Elul.

¹⁶Sakatə shanga dawayeri ar yeru na akwa diyayeri na kalaktə yeru ni nggata abbər mdə ku kuri hən katangga ni, təng dza ɗa mta kamnyar da ku nggaɓəla abbər Hyel an dlar yeru akwa kəthlər ni.

¹⁷Akwa sakatə da akwa hən katangga ni, mji na ol'ol ar Yahuda ku kəɗar thleng wasikayeri aka Tobiya, tsuwa tsa ma tsa akwa thleng ala ɗa.

¹⁸Kamnyar mjir Yahuda hang ku kahyel aka Tobiya abbər da ata mbwa kir alari, kamnyar tsa salngkwar Shekaniya na ɓzər Arah. Nggədza tsuwa ɓzərni Yehohanan ku kəl ngkwar Meshullam na ɓzər Berekiya.

¹⁹Təng da akwa ngkər ali su na ɓɗakɓɗaku tə Tobiya hara, ka ra jikata alari shanga su tə I pəla. Apani antə Tobiya ku ləkəma ka thlenta ali wasika ar thlivərantə ra.