Read bura-pabir Neh 8 Bible Online

Neh 8 - bura-pabir bible

Neh 8

¹Antə shanga mji tsaptədzi ata kəma duku ahar Urushalima akwa bəbalər Nyarfur Yimi. Antə da pəla aka Ezra na maləmər Tsawur Hyel abbər ka tsa səntə kakaɗər shariyar Musa natə MTHLAKU hamta aka mjir Israila ni.

²Akwa vir na ntangkəma ar thliya na murfəkur, antə Ezra na prist ku səntə kakaɗər tsawur Musa ni akəma mji na tsaptədzi ni, watau akəma mji shili ka mwanki, ka shanga maɗangkyar na ku mzhi nggaɓəla su.

³Antə Ezra ku thləthlata ka kəmari awul bəbal na akəma Nyarfur Yimi ni, ka karatə kakaɗə ni akəma mji shili kəga mwanki, ka shanga mji na ku mzhi nggaɓəla su, təng ɗəɗəpə mbing har kərathlər pci. Tsuwa shanga ɗa ku psi thləma ɗa ɓɗaku aka tsawur Musa ni.

⁴Antə Ezra na maləmər Tsawur Hyel ni ku lətə tebər laga tə mdə nam dzak kamnyar wujir ni. Antə Mattithliya, ka Shema, ka Anaiya, ka Uriya, ka Hilkiya, ka Maaseya ku thləthlata adzə ni abwa mazəmari. Antə Pedaiya, ka Mishayel, ka Malkiya, ka Hashum, ka Hashbaddana, ka Zakariya, ka Meshullam tsuwa thləthlata abwa matsəkarari.

⁵Antə Ezra kəlar kakaɗə ni akəma shanga mji ni, kamnyar vəi tə tsa athləthlata ata ni an nal ta vəi tə mji ni ata. Sakatə tsa kəlar kakaɗə ni antə shanga mji thlatə ka thləthlata.

⁶Antə Ezra ku hu MTHLAKU na Hyel na Ola. Antə shanga mji ku haptə tsiya ɗa aharhyel akwa pəla, “Amin! Amin!” Antə da zuzuri ka kəma ɗa ata di, ka vəngkər səli aka MTHLAKU.

⁷Antə mjir Lawi ku dlara akwa ngkərɓəla tsawur Musa aka mji ni, tsu tə da athləthlata ata vəi ni. Mjir Lawi na hara kəthlər ngəni an Yeshuwa, ka Bani, ka Sherebiya, ka Yamin, ka Akkub, ka Shabbethlai, ka Hodiya, ka Maaseya, ka Kelita, ka Azariya, ka Yozabad, ka Hanan, ka Pelaiya.

⁸Antə da ku karata akwa kakaɗər Tsawur Hyel, akwa ngkərɓəla shanga su ata bəbal, kamnyar ka mji ni nggaɓəla karatə ni.

⁹Sakatə mji ni akwa ngga su tə mda akwa karatari akwa kakaɗər tsawu ni, təng da ləkwa tuwa. Antə Nehemiya na gwamna, ka Ezra na prist ka maləm, ka mjir Lawi na akwa ngkərɓəla surthlipa aka mji ni, pəla aka shanga ɗa abbər, “Vir ngəni an vir tə mdə namtə ni ɓɗakkarkara aka MTHLAKU na Hyelər giri, antə giri aɗiya tuwa wa, wala ndzi ka ɗəffə ɓzəɓza wa.”

¹⁰Antə Nehemiya pəla ala ɗa, “Ngka giri avəi, ka giri səm su msəra ka sangkər yimər anap na nənəm ni, ka giri thlentə bwadukwari aka mji na aɗi kəgari wa. Kamnyar ashina an vir na ɓɗakkarkara aka MTHLAKU ar mburu. Antə ɗəffa giri aɗiya ɓzə wa, kamnyar kucali tə giri kəgari akwa MTHLAKU an duna giri.”

¹¹Antə mjir Lawi ni mtathli ɗəffa shanga mji ka pəla, “Peri giri hangkala giri, kamnyar ashina an vir na ɓɗakkarkara, antə giri aɗiya ndzi ka ɗəffə ɓzəɓzə wa.”

¹²Antə shanga mji ni ku ngka akwa kəyayeri arɗa, ka səm susəma ka sangkər sur sa ka kucali, ka thlentə bwadukwari aka mji na aɗi kəgari wa, kamnyar da ku nggaɓəla su tə mdə ngkər ala ɗa ni.

¹³Akwa vir na suɗkur ar thliya ni, ka shanga mji na ol'olər nyarmbwar kəkayeri, ka pristayeri ka mjir Lawi, shang tsaptədzi ata kəma duku adzə Ezra na maləm, kamnyar nggaɓəla su akwa tsawur Musa ni.

¹⁴Antə da wutə rəbutə rəbutari akwa Kakaɗər Tsawa tə MTHLAKU hamta aka Musa ni abbər ka mjir Israila ndzəndzi akwa səvayeri akwa sakar Kucali ar Səvayeri akwa thliya na murfəkur.

¹⁵Tsuwa ka mdə psəmnya akwa shanga bərniyayeri arɗa ka akwa Urushalima abbər, “Mwar giri ata kəra garayeri, ka giri səntə tsiya nfur zaitun, ka zaitun na ar mtakəu, ka nfur jara, ka jili nfwayeri na ka thlali, kamnyar ka giri sə nam səvayeri ni kəgari, apatə ku rəbutədzi.”

¹⁶Antə mji ni ləɓəla, ka mwari ka səntə tsiya nfwayeri ni, tə waskəi ku namtə səva kəgari ata kəra kəyirni na patərathlu ni, ka akwa bəbalər kəyir ɗa, ka akwa bəbalər kəyir Hyel, ka akwa bəbal na adzə Nyarfur Yimi ni, ka akwa bəbal na adzə Nyarfur Ifrayim.

¹⁷Antə shanga mji na thlata akwa tsəɗi mafakur ka si ni ku namtə səvayeri ka ndzəndzi akwa. Kamnyar təng akwa sakar Yeshuwa na ɓzər Nun har ka sənta aka vir ndaga mjir Israila aɗi ɗar hara su apani wa. Antə da ku hara kucali na mulmulari.

¹⁸Antə tədək viri, baɗita akwa vir na ntangkəma har ka mwanta akwa vir tsikərari, Ezra akwa karata ala ɗa Tsawur Hyel. Antə da hara vir murfa akwa kucali ngəni ni, ka tsaptədzi akwa vir na nciskurari, apatə tsawa ku thlamta.