Read bura-pabir Neh 9 Bible Online

Neh 9 - bura-pabir bible

Neh 9

¹Akwa vira thliya sərkumari ka nfwar ar thliya na murfa, antə mjir Israila tsaptədzi ata kəma duku akwa kəl asham, ka hatə dasa, ka pungkər bərbər ata kəra ɗa kamnyar ɗəffa ɗa na ɓza.

²Antə mjir Israila fwaɓəla kərɗa akwa nca mətəpiyayeri ni, ka thlata akwa jikaɓəla bikayeri arɗa kəga ɗimikur tə kəkayeri arɗa hara.

³Sakatə da athləthlatə tsəkəm ni, mdə ku kəta awur makər akwa karata ala ɗa Tsawur MTHLAKU na Hyelər ɗa, ka awur damwa makər kamnyar jikaɓəla bikayeri arɗa, akwa vəngkər səli aka MTHLAKU na Hyelər ɗa.

⁴Ata vəi ndlətə tebər na ola tə mdə nam dzak kamnyar ɗa ni antə mjir Lawi ni thləthlata akwa hara adduwa ka kuraku na ola aka MTHLAKU na Hyelər ɗa. Thləma mji ngəni an Yeshuwa, ka Bani, ka Kadmiyel, ka Shebaniya, ka Bunni, ka Sherebiya, ka Bani, ka Kenani.

⁵Antə mjir Lawi nayeri ni, watau Yeshuwa, ka Kadmiyel, ka Bani, ka Hashabneya, ka Sherebiya, ka Hodiya, ka Shebaniya, ka Pethlahiya, pəla, “Thlatə giri ka giri hu MTHLAKU na Hyelər giri, Hyelər giri na aɗi təng waci har ba saka madi!” “Ka huwa ndzi aka thləma gə na ka səli, thləma gə na ku təramta shanga barka ka huwa!

⁶Ga an MTHLAKU, gə shinga, ga an namtə vəi na amtazi. Ga an namtə vəi na amta ta shang, ka sasəlkayeri na dlama dlama. Ga an namtə duniya, ka shanga suayeri na akwa. Ga an namtə mandayeri, ka shanga suayeri na akwa kuta ɗa. Ga an akwa tsəlpi mpika ɗa shang, antə suayeri na dlama dlama amtazi ana zuzuri ka vəngkər ala gə səli.

⁷Ga an MTHLAKU, Hyel na carɓəla Abram, ka səɓəla ka tsa kazhar tsəɗi Ur ar mjir Kaldiya, ka pali thləmari tə ndzi Ibrahim.

⁸Gə wuta abbər tsa ka jirkur akəma ga, tə ga ku mbwi alkawal ka tsa, abbər ga ata hamta tsəɗiyayeri na ar mjir Hitti, ka mjir Amor, ka mjir Perizzi, ka mjir Yebusi, ka mjir Girgashi, aka kəkayeri arni. Tsuwa ga ku nghyaɓəla alkawalər nga alari, kamnyar gə ka jirkur.”

⁹“Ga ku wutə bwaniyir kəkayeri ar yeru akwa Masar, ka nggatə tuwar ɗa ata mnya Manda Duwathlu.

¹⁰Ga ku hara seɗayeri ka surndatayeri ata kəra kuthli ka mafayeri arni, ka ata kəra shanga mjir tsəɗi ni, kamnyar ga asəndə laku tə da bwani aka kəkayeri ar yeru. Atar apani antə ga ku hara thləm, apatə thləma ga akwa tuwa ba ashina.

¹¹Ga ku ndəkəu manda akəma kəkayeri ar yeru, tə da ntamta kuta manda ata di ul'ula. Ga ku pu mji na akwa kədlə ɗa akwa manda na zurang, apa pela akwa kuta manda na akwa mpa.”

¹²“Təpci ga ku pwar ɗa ka dlambar ləmbəku aviri ga ku pwar ɗa ka dlambar u'u kamnyar hamta ala ɗa parakəu akwa lakur ɗa.”

¹³“Ga ku səghəi ata kəra Gar Sinai, ka gari ala ɗa akwar amtazi. Ga ku hamta ala ɗa tsawayeri na kalkal ka ɓɗaku, tsawayeri na kalkalari ka na jirari.

¹⁴Ga ku ngkərɓəla ala ɗa laku tə ka da ɓəlatə Vir Ghərəmtaghəra ar nga na ɓɗakkarkara, ka pwi ala ɗa tsawayeri ka suayeri tə ka mdə hara, atar Musa na mafar nga.

¹⁵Sakatə da nggatə məi, ga ku hamta ala ɗa susəma na thlata amtazi, sakatə da akwa ngga thləli, ga ku səɓəla ala ɗa ka yimi akwa gagəma. Ga ku pəla ala ɗa ka da mwari ra ndzi mthlakər tsəɗi, tsəɗi tə gə kahyel abbər ga ata hamta ala ɗa ni.”

¹⁶“Amma kəkayeri ar yeru ku haptə kəra da ka hara kər ɓəɓalkur, ka nggəlar kələngkər aka tsawayeri ar nga.

¹⁷Da nggəlar ta kələngkər! Da fwari ata kəra surndatayeri tə ga hara akwa nca ɗa ni, ka hara kər ɓəɓalkur ka carɓəla mdə na ata pwar ɗa ka ngka ka da akwa mafakur akwa Masar. Amma ga an Hyel na ana yafitə mda, Hyelər hara ɓɗakkur ka na ana kətadzə mda, ɗəffa ga aɗi ana ɓzə taktar wa, tsuwa hirkurər nga aɗi ana palidzi wa. Antə ga aɗi fwari ata kəra ɗa wa.

¹⁸Kamnyar wala tə da namtə kənar dinar, ka pəla, ‘Ngəni an Hyelər giri na fwaɓəla giri akwa Masar,’ ka hara biku na ola ar ɓzamtə thləm,

¹⁹ga aɗi fwari ata kəra ɗa wa, kamnyar kətadzər nga na ola. Ga aɗi kələmta dlambar ləmbəku ni kazhar ɗa təpci wa, wala dlambar u'u ar hamta ala ɗa parakəu aviri ni wa.

²⁰Ga ku hamta ala ɗa mambələr ɓɗakkur kamnyar ka tsa thlipa ala ɗa su. Ga aɗi ngkata ala ɗa manna ar səmər ɗa wa, wala ngkata ala ɗa yimi sakatə da ka thləli wa.

²¹Məva nfwarkumari ga akwa tsəlpi ɗa akwa mtakəu, da aɗi tur suma wa, ləptayeri arɗa aɗi hagaləmtadzi wa tsuwa səla ɗa aɗi kəthlə wa.”

²²“Ga ku hamta ala ɗa kuthlikurayeri kəga mji, ka ndəkəi ala ɗa tsəɗiyayeri. Antə da ku səm tsəɗiyir Sihon na kuthlir Heshbon ka tsəɗiyir Og na kuthlir Bashan.

²³Ga ku hamta ala ɗa maɗashili hang, apa sasəlkayeri na ata kutahyel. Ga ku mwantə ɗa akwa tsəɗi tə gə pəla aka kəkayeri arɗa ka da mwari ka da ndzi mthlakari.

²⁴Apani maɗa' ɗa ku ləkwa tsəɗi Kanana ka ndzi mthlakari, kamnyar ga ku nggyari ala ɗa mjir tsəɗi ni. Ga ku hamta mjir Kanana ni akwa tsiya mjir nga, ka durayeri kəga kuthlyayeri arɗa, ka da hara ala ɗa apatə da hira.

²⁵Da ku səm bərniyayeri na akwa katangga, ka fakəu na ana ya su hang. Da mbultsə kəyayeri na nghyinghyari ka su na ɓɗakɓɗaku hang, ka jiɓayeri tə mdə haɗa lamta ɗa, ka fakayeri ar anap, ka nfwayeri ar zaitun, ka nfwayeri hang na ana ya. Antə da ku səma ka ndlə ka təksa, ka nggatə msərakur ɓɗakkur na ola tə gə hara ala ɗa ni.”

²⁶“Amma wala apani da ku nggəlar kələngkər, ka hara kər ɓəɓalkur ala ga, ka psədzə bwahili aka tsawur nga, ka tsəgəi naɓiyayeri ar nga na tsaktə ɗa kamnyar ka da ngka adzə ngə ni. Apani da ku ɓzamtə thləma ga akwa suayeri na ol'ola.”

²⁷“Apani ga ku hamta ɗa aka dawayeri arɗa, dawayeri na ku ɗar bwani ala ɗa. Akwa sakar bwani ni, da ku tuwa ala ga, antə ga ku nggatə ɗa akwar amtazi. Antə kamnyar kətadzər nga na ola, ga ku hamta ala ɗa mjir mbanta, na ku mbuli ɗa akwa tsiya dawar ɗa.

²⁸Amma aghəla tə shanga su ku hara hərkəu, da jaktə hara ɗimikur akəma ga. Antə ga ku hamta ɗa aka dawayeri arɗa, ka da hara kuthlikur ata kəra ɗa. Amma wala apani sakatə da ku tuwa ala ga, ga ku nggatə ɗa akwar amtazi, ka mbuli ɗa ka hang kamnyar kətadzər nga.

²⁹Ga ku tsaktə ɗa abbər ka da ngka akwa tsawur nga, amma da ku hara kər ɓəɓalkur ka nggəlar kələngkər aka tsawayeri ar nga. Da ku hara biku ka rutəmta tsawayeri ar nga, wala tə atar ɓəlatə ɗa antə mda ata ndzi ka mpika. Da akwa ɓəl ɗengdlang ɗa, akwa hara kər ɓəɓalkur, ka nggəlar ta kələngkər ala ga.

³⁰Ga ku mbwi ɗəffa ga ka da mnyar məvayeri hang, ga ku tsaktə ɗa ka mambələr nga atar naɓiyayeri ar nga, amma wala apani da aɗi psi thləma ɗa wa, antə ga ku hamta ɗa akwa tsiya mjir tsəɗiyayeri na kalaktə ɗa.

³¹Amma ba kulini kamnyar kətadzər nga na ola, ga aɗi nggəlar ɗa wa wala tsəgəi ɗa wa. Kamnyar ga an Hyel na ana hara ɓɗakkur ka kətadzə mda.”

³²“Antə kulini, Hyelər yeru, Hyel na ola, na ka kuthlikur, na ana hara sur thlivəra, na ana kəsi alkawal, na ka hirkur na ana palidzi wa, ga aɗiya rutə bwani tə yeru akwa ni wa! Bwani na si ata kəra yeru, ka ata kəra kuthlyayeri ar yeru, ka mji ol'ola ar yeru, ka pristayeri ar yeru, ka naɓiyayeri ar yeru, ka kəkayeri ar yeru, ka ata kəra shanga mjir ngə ni, su na baɗita akwa sakar kuthlyayeri ar Assiriya har ka sənta aka vir na ashina.

³³Amma wala apani ga ku ndzi ka jirkur, akwa shanga suayeri na si ata kəra yeru, kamnyar ga ku ndzi ka jirkur wala tə yeru akwa hara ala gə ɗimikur.

³⁴Kuthlyayeri ar yeru, ka mji ol'ola ar yeru, ka pristayeri ar yeru, ka kəkayeri ar yeru, aɗi kəsi tsawur ngə wa. Da aɗi vədzə hangkala ɗa aka tsawayeri ar ngə wa, wala aka suayeri tə gə tsaktə ɗa ata kər wa.

³⁵Kamnyar wala tə ga ku na ɗa kuthlikur, ka tsəɗi na ola na ata ya su hang, tə da nggatə msərakur ar ɓɗakkur tə gə hara ala ɗa, da aɗi vəngkər səli ala gə wa, wala zhar hara surharar ɗa na ɗimi ni wa.”

³⁶“Nggədza ashina yeru ku ndzi mafayeri, akwa tsəɗi natə gan hamta aka kəkayeri ar yeru, ka da nggatə msərakur yar nfwayeri na akwa, ka shanga cautayeri na ɓɗakɓɗaku akwa, yeru ku ndzi mafayeri.

³⁷Kamnyar bikər yeru antə bwar ola sur fakəu na akwa tsəɗi ni, ana mwari aka kuthlyayeri tə gə pungkər ata kəra yeru. Da ka duna ata kəra dza yeru, ka mwaɓiyayeri ar yeru, da ana hara su tə da hir ka yeru, antə yeru akwa ɗar bwani ka duna.”

³⁸“Kamnyar ngəni antə yeru na mjir Israila akwa kətə alkawal na olari, tsuwa yeru akwa rəbutari. Antə mji ol'olər yeru, ka mjir yeru Lawi, ka pristayeri ar yeru, shang akwa vu tsiya ɗa.”