Read bura-pabir Esta 2 Bible Online

Esta 2 - bura-pabir bible

Esta 2

¹Aghəla suayeri ngəni, sakatə ɗəffa Kuthli Ahasuwerus ku pwi, antə tsa dzama ata kəra Vashti, ka ɗangtə su tə tsa hara, ka jili shariya tə mdə thlamta ata kərari.

²Antə mji na ana hara kəthlər aka kuthli na kudzəhə ka tsa ku si ka pəla alari, “Bundi! Ndzi ka mdə paktə maɗangkwi na dakwi dakwi, tsuwa na aɗi səndə sal wa, ka mdə səntə ɗa ala ga.

³Ga ata mzhi carɓəla mji akwa shanga lardayeri na akira ga na ata səntə shanga maɗangkwi na dakwi dakwi, ka na aɗi səndə sal wa, ka mdə pwi ɗa akwa mbwar pwi mwankir nga na akwa Shushan ni. Ka gə pu ɗa akwa tsiya Hegai, tsa na kulaɓər nga na akwa wul kəra mwankir nga. Tsuwa ka tsa hamta ala ɗa kari namtə dza ɗa ka da ndzi dakwi.

⁴Antə ga ata carɓəla ɓzərngkwa na dakwi ta shang ala ga, ka tsa ndzi kuthli mwala ata vəya Vashti.” Sauri ngəni ku kəskəra kuthli, antə tsa ku hara tsu apani.

⁵Tsuwa azi akwa kəi kuthlikur na akwa Shushan ni, mdər Yahudi laga aɗi na ka thləmari Mordekai. Tsa an ɓzər Yayir, na ɓzər Shimeyi, na ɓzər Kish na akwa nyarmbwar Benjamin.

⁶Mjir kutakəyir Mordekai aɗi akwa nca mafayeri tə Kuthli Nebukadnezzar fata ahar Urushalima ka sənta akwa mafakur ahar Babila ni. Tsa fatə ɗa ata kəma duku ka Yekoniya na kuthlir Yahuda.

⁷Mordekai ka ɓzərngkwa laga dakwi ɓɗak laga aharngkiɗa. Tsa an ngkwar ɓzərma baba'ni, tsuwa thləmari an Hadassa, watau Esta. Amma baba'ni ka mama'ni aɗi kəra wa. Sakatə baba'ni ka mama'ni ku mti japu antə Mordekai kətə ni ka namtə ni apa ngkwar kutari.

⁸Sakatə mdə ku psəmnya tsawur kuthli ni, antə mdə tsaptə maɗangkwi hang akwa Shushan akwa kəyir kuthli, akwa tsiya Hegai. Esta akwa nca ɗa, antə tsa ma mdə ku ra vəi ni akwa kəyir kuthli akwa tsiya Hegai na mdər wul kəyir pwi mwankir kuthli ni.

⁹Esta ku kəskəra Hegai ka duna, antə hangkalari ku nutə ni, har tə tsa ləkwa hara ɓɗakkur aka Esta. Təng təkəma tsa baɗitə hamta alari kari nam dza ar ɓzərngkwakur, ka na alari susəma natə mdə ɗəmhə kamnyar ni. Tsuwa Hegai ku na alari mbwa na ɓɗakta shang akwa kəyir pwi mwankir kuthli ni, ka carɓəla ngkwarkəmayeri murfa akwa kəyir kuthli ka pudzə ɗa alari kamnyar ka da dlar ni akwa kəthlər tə tsa ata bara harari.

¹⁰Esta aɗi ngkərɓəla mji na durərni wala mjirni wa, kamnyar Mordekai ku tsaktə ni abbər tsa aɗiya pəla aka wama wa.

¹¹Antə kəlara viri Mordekai ana təramta akwa bəbal na anyarfur mbwar pwi mwankir kuthli ni, kamnyar ka tsa wutə lapiyakur Esta, ka tsuwa ma su aɗi tə mdə ku hara alari ka tsa sənda.

¹²Su tə mdə thlamta an abbər akəmata mda amwantə kəlara ɓzərngkwa akəma Kuthli Ahasuwerus, tar ma tsa ku hara thliya pal pal kumnya suɗa akwa nam ɓɗakkur dzari. Mda ata kətə thliya pal pal ngkwa akwa kəkər dzari ka mal nam dza na ɓɗakta shang, ka kətə thliya ngkwa tsuwa akwa kəkər alari tulari na msəra ta shang.

¹³Ma sakatə ɓzərngkwa ni ata mwari adzə kuthli, mda ana na alari kəlara su tə tsa akwa barari akwa kəyir pwi mwankir kuthli ni ka tsa mwari akwa kəi kuthlikur kəgari.

¹⁴Tahaku antə tsa ata mwari akwa kəi kuthlikur, tsuwa tar ma ɗəɗəpa antə tsa ata ngka akwa kəi na suɗkur ar pwi mwankir kuthli ni. Kəi ngəni ni an akwa tsiya Shaashgaz, kulaɓər kuthli na ata kəra maɗangkwi tə kuthli ana pi ka da. Antə ɓzərngkwa na ku mwari ka ngka, tsa aɗi ata jaktə mwari adzə kuthli kəra wa, tar ma tsa ku kəskəra kuthli ka duna, antə tsa ata kəga ɓzərngkwa ni ka thləmari.

¹⁵Saka natə kalkal ka Esta ləmbwa adzə kuthli ku hara. Esta an ngkwar Abihayil na ɓzərma baba' Mordekai, natə Mordekai kətə ka vəi ni apa ngkwar kutari ni. Akwa saka ngəni Esta aɗi yu suma wa, tar kari tə Hegai na kulaɓər kuthli, na ata kəra mwankir kuthli ni, ku nar sauri abbər ka tsa hata. Tsuwa Esta an ngkwa na parakəu aka kəlara mda.

¹⁶Antə mdə ku mwantə Esta aka Kuthli Ahasuwerus akwa kutakəyirni akwa thliya na kuma, na an thliyar Tebeth, akwa məva na murfəkur ka ləkwa kuthlikurərni.

¹⁷Antə kuthli ni ku hir Esta ka təramta shanga mambila mwanki. Tsuwa tsa ku wutə mdəkur ka ɓɗakkur akəlari ka təramta shanga mambila maɗangkwi. Antə kuthli ni ku bartə kəra Esta, antə Esta ku ndzi kuthli mwala ata vəya Vashti.

¹⁸Antə kuthli ku ɗəmhə vir kucali na ola aka Esta, ka kəgatə kwakunayeri ka mjirni na ol'ola akwa kucali ni. Antə kuthli ku hamta futu aka tsəɗiyayeri na akirari, ka hamta cautayeri na ar kuthlikur hang apa su gapani.

¹⁹Akwa sakatə mdə tsaptə maɗangkwi akwa tsaptədzi na suɗkur, Mordekai aɗi anda andzəndzi akwa nyarfur kəi kuthli, watau tsa pal akwa nca mji ol'ola ar kuthli.

²⁰Har ba kulini Esta aɗi hir ncantə durərni wala mjirni wa, kamnyar tsa akwa nu su tə Mordekai pəla alari, tsu apatə tsa ana kələngkər alari akwa ngkyarkurərni avəyarngkiɗa.

²¹Akwa sakatə Mordekai akwa ndzi akwa nyarfur kuthli ni, antə ɗəffa kulaɓayeri laga suɗa, watau Bigthlan ka Teresh, ku ɓzi ata kəra Kuthli Ahasuwerus har tə da ɗəmha abbər da ata tsi ni.

²²Mordekai ku nggatə su tə mji ngəni akwa ɗəmhari ni, antə tsa mwari ka pəla aka Kuthli Mwala Esta. Antə Esta jikata aka kuthli su tə Mordekai nggatə ni.

²³Antə mdə ku pu mji ka da nggaɓəla su ata kər, antə da ku nggaɓəla abbər labar ngəni ni jiri. Antə mdə ku mbwamta mji ngəni japu ata udzəmər mbwamta mda. Antə kuthli ku tsawa abbər ka mdə rəbutə labar ngəni akwa Kakaɗər Labar ar Kuthlikur akəmari.