Read bura-pabir Esta 3 Bible Online

Esta 3 - bura-pabir bible

Esta 3

¹Aghəla suayeri ngəni antə Kuthli Ahasuwerus ku jakə olkur aka mdə laga ka thləmari Haman na ɓzər Hammedathla na akwa nyarmbwar Agag. Tsa vətə ni ata olkur, antə tsa ku ndzi olta shanga mjirni na ol'ola.

²Antə Kuthli tsawa aka shanga mji ol'ola na ana ndzi akwa nyarfur kuthli abbər ka da zuzuri ka nar olkur aka Haman. Antə shanga ɗa ana hara apani, amma Mordekai aɗi ana zuzuri ka nar olkur wa.

³Antə mambila mji ol'ola na akwa nyarfur kuthli ni yu Mordekai abbər, “Kamnyar mə tə ga aɗi kələngkər aka tsawur kuthli wa ri?”

⁴Da ku ləkəma ka gari alari tədək viri, amma tsa aɗi psi thləm ala ɗa wa. Antə da jikata aka Haman abbər nuhum Mordekai azhar su tə tsa akwa harari ni, kamnyar Mordekai, ku kurtə pəla ala ɗa abbər tsa mdər Yahudi.

⁵Sakatə Haman wuta abbər Mordekai aɗi akwa zuzuri ka nar olkur wa, antə ɗəffari ku ɓzi.

⁶Sakatə Haman ku nggaɓəla abbər Mordekai ni mdər Yahudi, antə tsa pəla ma apani tsi Mordekai shini daci aɗi ata mzhi wa. Antə tsa ku bara laku tə ka tsa tsəgəi shanga mjir Mordekai, watau shanga mjir Yahudi na akira kuthlikur ar Ahasuwerus.

⁷Akwa thliya na ntangkəma, na an thliyar Nisan, akwa məva na kumnya suɗkur ar kuthlikurər Kuthli Ahasuwerus, antə mdə ndzəh pur, watau kuriya, akəma Haman, tsawa abbər ka mji ndzəh kuriya akəmari kamnyar ka mdə wutə vir ka thliya na kalkal tə ka da haratə ɗimikur ngəni. Antə kuriyar ɗa ku carɓəla thliyar Adar ka virari kumnya makər.

⁸Antə Haman pəla aka Kuthli Ahasuwerus, “Mji laga aɗi na ku titiləmtadzi akwa nca mji na akwa shanga lardayeri na akira kuthlikurər nga. Sur harar ɗa zum ka ar mji na damwa, tsuwa da aɗi ana ɓəla tsawur kuthli wa. Antə aɗi kalkal ka kuthli dləɓa ata kəra su ngəni wa.

⁹Bundi! Ma akəs kəra dəkəl, ka gə səɓəla ka tsawa abbər ka mdə kurəmta ɗa. Antə arna I ata hamta liyar adzərfa dəpu kuma aka mjir kəthlər aka kuthli ka da pu akwa vəi pwi gənar kuthli.”

¹⁰Antə kuthli ntsui lenduwar kuthlikur na ata kulengari ka hamta aka Haman na ɓzər Hammedathla, na akwa nyarmbwar Agag, Haman na dawar mjir Yahudi.

¹¹Antə kuthli pəla aka Haman, “Kəsi kwaba ni, tsuwa ka gə hara su tə gə hir aka mji ni.”

¹²Antə Haman ku kəga sakatareyeri ar kuthli akwa vira thliya kumnya makər ar thliya na ntangkəma. Antə sakatareyeri ni ku rəbutə shanga su tə Haman tsawa ala ɗa, ka shinaɓəla ndər ni akwa kəlara mnya, ka lakur rəbutər mji na akwa lardayeri na akwa tsəɗi ni. Antə mdə ku thlentə labar ni aka kwakunayeri, ka gwamnar lardayeri, ka shanga mji na ol'olər durayeri na akwa tsəɗi ni. Mdə rəbuta akwa thləma Kuthli Ahasuwerus ka tsatə seɗar tsiyari ata.

¹³Mdə hamta wasikayeri ni aka mjir “Ka tsa pi wa” ka da mwanta akwa shanga lardayeri na akwa tsəɗi ni, abbər ka mdə tsəgəi shanga mjir Yahudi, kusta ka mji halhala, mwanki ka maɗangkyar, akwa kuta vir pal, vira thliya kumnya makər ar thliya na kumnya suɗa tə mda ana kəga Adar, tsuwa ka mdə famnya kariyir ɗa.

¹⁴Mdə namtə su tə mdə rəbuta akwa wasika ni ka tsa ndzi tsawa aka kəlara bwa na akwa tsəɗi ni, tsuwa ka mdə psəmnya ni aka shanga mjir tsəɗi ni, kamnyar ka shanga mji ɗəmhədzi kamnyar vir ngəni.

¹⁵Antə mjir “Ka tsa pi wa” ni ku thlatə ka huva ka təra ka labar ni apatə kuthli ku tsawa. Antə mdə ku psəmnya tsawu ni akwa zara na akwa katangga, akwa bərni Shushan. Antə kuthli ka Haman ku ndzəndzi akwa sa su, amma hangkala mjir bərni Shushan ndəndandəndari.