Read bura-pabir Esta 4 Bible Online

Esta 4 - bura-pabir bible

Esta 4

¹Sakatə Mordekai ku nggata ata kəra su na hara, antə ɗəffari ku ɓzi, tə tsa kukwahəmta ləptərni, ka hatə dasa, ka pungkər pənju ata kərari. Antə tsa tərɓəla akwa kutadi, akwa jaɓtuwa ka kuraku ka duna,

²har tə tsa mzhitə nyarfur kuthli. Amma tsa aɗi ləvəi wa, kamnyar mda aɗi hir ka mdə na ka dasa ləvəi akwa kəi kuthlikur wa.

³Antə akwa kəlara bwa na akwa tsəɗi ni tə mdə ku nggatə tsawur kuthli ni, mjir Yahudi akwa tuwa ka duna. Da ku kəl asham, ka jaɓtuwa ka kuraku, tə bwar ola ɗa ku hatə dasa ka pəpəi akwa pənju.

⁴Sakatə ngkwarkəmayeri ar Kuthli Mwala Esta ni ka kulaɓayeri arni ku si ka pəla alari su tə Mordekai akwa harari ni, tsa ku damitədzi ka duna. Antə tsa thlenta alari ləptu ka tsa hata ata vəya dasa ni, amma Mordekai aɗi dlu wa.

⁵Antə Esta ku kəga Hathlak, pal akwa nca kulaɓayeri natə kuthli vu ni ka tsa hara kəthlər aka Esta, ka tsawa alari ka tsa mwari adzə Mordekai kamnyar ka tsa nggaɓəla su na wutə ni, ka tsuwa su na hara tə tsa akwa hara su apani ni.

⁶Antə Hathlak ku təra mwari adzə Mordekai ata bəbal na anyarfur kəi kuthlikur.

⁷Antə Mordekai ku jikata alari shanga su na wutə ni, ka hangkur kwaba tə Haman ku kətə alkawalari abbər tsa ata pu akwa vəi pwi gənar kuthli, kamnyar ka mdə kurəmta mjir Yahudi.

⁸Tsuwa Mordekai ku hamta alari kakaɗər tsawu natə mdə ku ndəkəmta akwa Shushan kamnyar kurəmta mjir Yahudi ni ka tsa ra ncanta aka Esta. Tsuwa ka Hathlak ngkərɓəla aka Esta, ka kiɗə ni ka tsa mwari adzə kuthli, ka kiɗə barkarni abbər ka tsa kətadzə mjirni.

⁹Antə Hathlak ku ngka ka pəla aka Esta su tə Mordekai pəla ni.

¹⁰Antə Esta pəla aka Hathlak ka tsa pəla aka Mordekai abbər,

¹¹“Shanga mji ol'ola na ar kuthli ka shanga mjir tsəɗi ni ku sənda abbər kəlara mdə na ku mwari adzə kuthli akwa ghələrni kula tsa an kəga ni, tsawa ku pəla abbər ka mdə tsi mthlakari. Laku duku na aɗi tə mda ata mzhi msəra akwa tsawu ngəni an abbər tar ma kuthli ku ha alari zwalər dinar arni aka mdari, antə mda aɗi ata tsi ni wa. Tsuwa kulini I ku hara vir pal pal makkumari kula tsa kəga ra.”

¹²Sakatə mdə ku jikata aka Mordekai su tə Esta pəla ni,

¹³antə Mordekai jaktə thlentə Hathlak adzə Esta ka labar abbər, “Ga aɗiya dzama abbər ar nga ga ata sə msəra kamnyar tə ga akwa kəi kuthli sakatə mda ata kurəmta mjir Yahudi wa.

¹⁴Kamnyar ma ga ku ndzi ɗiɗi akwa saka ngəni, Hyel ata kəlar laku damwa ar dlara ka mbantədzi aka mjir Yahudi, amma ga ka mjir kutakəyir baba' nga ata kurəmtadzi. Wan asəndə ri, nuhum kamnyar sakar damitədzi ngəni antə gə wutə kər nga akwa olkur ar kuthli mwalakur ni?”

¹⁵Antə Esta thlenta amsar ni aka Mordekai abbər,

¹⁶“Mwari kara tsaptə shanga mjir Yahudi na akwa Shushan ata kəma duku, ka giri hara asham kamnyar na. Giri aɗiya səm su, wala sa su wa pci ka viri mnyar vir makər. Tsuwa yeru kəga ngkwarkəmayeri arna ata hara asham tsu apatə giri ata harari. Aghəla nda antə I ata mwari adzə kuthli, wala tə tsawa ku ngkata. Antə wala ma I an ata mtə ma, kəi mta.”

¹⁷Antə Mordekai ku təra ka hara shanga su tsu apatə Esta ku tsawa alari.