Read bura-pabir Esta 5 Bible Online

Esta 5 - bura-pabir bible

Esta 5

¹Akwa vir na makərkur antə Esta ku hatə ləptər kuthlikurərni ka mwari ka thləthlata akwa camər kuthli na avəivəi, ka thlentə kəmari tsək ka mbwa tə kujarar kuthli akwa. Tsuwa akwa saka ndaga kuthli ni andzəndzi ata dəkəl kuthlikur ka kəmari akwa wul nyarfur ləvəi.

²Sakatə kuthli ni wutə Kuthli Mwala Esta athləthlata akwa cam ni, antə tsa ha zwalər dinar ar kuthlikur na akwa tsiyari ni aka Esta, kamnyar mwala ni ku wutə mdəkur ata ncari. Antə Esta ku shahədzi ka tsəkwar kəra zwal ni.

³Antə kuthli yu ni abbər, “Man aɗi ri, Kuthli Mwala Esta? Man tə ga akwa barari ri? Mda ata hamta ala gə kəlara su tə ga akwa barari, wala an retar kuthlikurərna I ata na ga.”

⁴Antə Esta pəla, “Ma akəs kəra Barkar dəkəl, ka barkar nga ka Haman si akwa səm susəma natə I ɗəmha ala ga ashina ni.”

⁵Antə kuthli hamta tsawa abbər ka mdə səntə Haman taktar, kamnyar ka da hara su tə Esta pəla ni. Apani antə kuthli ka Haman ku mwari akwa səm susəma natə Esta ɗəmhə ni.

⁶Sakatə da akwa sa yimər anap ni, antə kuthli yu Esta abbər, “Man damitədzər ngə nə ri? I ata hamta ala gə suari. Man tə ga akwa barari ri? Wala ma an retar kuthlikurərna, I ata hamta ala ga.”

⁷Antə Esta pəla, “Damitədzərna ka su tə I akwa barari an apani,

⁸ma I an ku wutə mdəkur ata nca ga, tsuwa ma an ata kəskəra ga ka gə kuri ali su na akwa damitə ra, to I ata hir ka gə ka Haman si ɗəpa akwa səm susəma damwa natə I ata ɗəmhari kamnyar giri. Sakanda antə I ata hamta amsa aka barkarni.”

⁹Vir nda Haman ku zhar kəi kuthli ka kucali ka ɗəffu mwapu. Amma sakatə tsa akwa təramta anyarfur kuthli ka wuta abbər Mordekai aɗi thlata alari wala ncantə halamar thlivər ni wa, antə ɗəffa Haman ni ku ɓzi ka duna ata kəra Mordekai.

¹⁰Amma tsa ku mbwi ɗəffari ka ləha. Antə tsa ku thlenta aka pazhayeri arni abbər ka da si, ka ndəra aka mwalankiɗa Zeresh tsuwa ka tsa si.

¹¹Antə Haman tsa kərathlari akwa jika ala ɗa hangkur gənarni, ka hangkur maɗa'ni, ka olkur tə kuthli jaka alari, apatə tsa vəngkər ni ata kəra shanga mji ol'ola kəga kwakunayeri ar kuthli.

¹²Haman ləkəma ka hu kərni abbər, “Har akwa səm susəmər kucali na ola tə Kuthli Mwala Esta ɗəmha aka kuthli ma, təng I duku daci antə tsa kəga ra akwa. Tsuwa tsa ku jaktə kəga yeru ka kuthli ka yeru mwari ɗəpa.

¹³Amma shang ngəni aɗi ndzi su laga ali wa, təng tə ba kulini I tsu akwa wutə Mordekai na mdər Yahudi ni andzəndzi anyarfur kuthli ni.”

¹⁴Antə mwalankiɗa Zeresh ka shanga pazhayeri arni ni pəla alari, “Vu ka mdə namtə udzəm na ka nalkurari dzartsi ntəfkumari, antə ma ɗəɗəpa ka gə pəla aka kuthli ka mdə mbwamta Mordekai ata. Aghəla nda ka ga ka kuthli təra ka giri mwari akwa vəi səm susəm ni ka hangkala gə pwipwiyari.” Haman ku nggatə msərakur sauri ngəni akwa ɗəffari. Antə tsa vu tə mdə namtə udzəm na nal kamnyar mbwamta mda ata.