Read bura-pabir Esta 6 Bible Online

Esta 6 - bura-pabir bible

Esta 6

¹Antə tsu vir nda aviri kuthli aɗi mzhi heni wa. Antə tsa hamta tsawa abbər ka mdə səntə kakaɗər ɗangtə suayeri na ku hara waci, watau kakaɗə tə mdə rəbwamta suayeri na akwa hara kamnyar sə ɗangtə kəthlər ar kuthlikurərni. Antə mdə ku karata alari.

²Antə mdə wutə rəbutə rəbutari laku tə Mordekai ngkərɓəla su ata kəra Bigthlana ka Teresh. Da an suɗa akwa nca kulaɓayeri ar kuthli na ana sək nyarfur kuthli. Tsuwa da an ɗəmha abbər da ata tsi Kuthli Ahasuwerus.

³Antə kuthli pəla, “Jili olkur wala watsəɓa na madi tə mburu ku na aka Mordekai kamnyar su ngəni kwang?” Antə buɗayeri arni na ana hara kəthlər alari pəla, “Su aɗi tə mdə hara kamnyar ni wala raka wa.”

⁴Da tsu akwa gari ni təng təkəma Haman səkwa cam na aɓəlaɓəla akwa kəi kuthlikur ni kamnyar gari aka kuthli abbər ka mdə ra mbwamta Mordekai ata udzəm na nal tə mdə ɗəmhə kamnyar mbwamta mji tə tsa ɗəmhə ni. Antə kuthli ni yuwa abbər, “Wan akwa cam nə ri?”

⁵Antə mjir kəthlər kuthli ni shinau alari abbər, “Ai Haman an athləthlata akwa cam ni.” Antə kuthli ni pəla, “Səmbwa giri ka tsa.”

⁶Antə Haman ku səmbwa. Antə kuthli ku pəla alari, “Man su tə ka mdə hara aka mdə natə kuthli akwa kucalər nar olkur ri?” Antə Haman dzama akwa ɗəffari abbər, “Wa antə kuthli ata hir ni ka na alari olkur ka təramta ra ri?”

⁷Antə Haman pəla aka kuthli ni, “Nggədza su tə ka mdə hara aka mdə natə kuthli akwa kucalər nar olkur.

⁸Ka mdə səntə ləptayeri ar kuthlikur natə kuthli ku ɗar hatari, ka taku natə kuthli ku ɗar fəlari, taku na ka jili dəɓar kuthli,

⁹ka mdə hamta ləptayeri ka taku ni aka pal akwa nca mji na ol'ol ta nvwa ɗa. Antə ka mdə ol ngəni hadza aka mdə tə kuthli akwa kucalər nar olkur ni ləptər kuthlikur ngəni. Tsuwa ka tsa vətə ni ata taku ka mdə pwar ni ka dlarhə bəbalayeri na akwa bərni ni ka tsa, tsa akwa psəmnya akəmari abbər, ‘Wul giri su tə mda ana hara aka mdə tə kuthli akwa kucalər nar olkur!’ ”

¹⁰Antə kuthli ni pəla aka Haman, “Mwa taktar kara fatə ləptayeri ni ka taku ni, kara mwari adzə Mordekai na mdər Yahudi na ana ndzəndzi anyarfur kəi kuthlikur. Ga aɗiya fəlɓəla wala su pal akwa nca suayeri tə gə pəla ka mdə hara ni wa.”

¹¹Antə Haman ku fatə ləptayeri ni ka taku ni ka dəɓatə Mordekai, ka vu ni tə tsa fəltə taku ni, ka mwa akəmari. Tsa akwa dlarhə bəbalayeri na akwa bərni ni ka tsa akwa psəmnya abbər, “Wul giri su tə mda ana hara aka mdə tə kuthli akwa kucalər nar olkur!”

¹²Aghəla nda antə Mordekai ku ngka anyarfur kuthli, amma Haman ku təra ləharngkiɗa ka səli kula shamta saka ka ɗəffə ɓzəɓza.

¹³Antə Haman pəla aka mwalankiɗa Zeresh ka shanga pazhayeri arni su na hara alari. Antə mjirni na ana hamta alari sauri ka mwalankiɗa Zeresh pəla alari, “Ma Mordekai natə ga ku baɗitə ndla akəmari ni an mdər Yahudi jiri, to, ga aɗi ata mzhi nggyari ni wa. Antə jiri ga ata ndla akəmari.”

¹⁴Sakatə da tsu akwa gari ni, təng kulaɓayeri laga ar kuthli si ka kətə Haman, ka mwantə ni ka huva akwa vəi səm susəma natə Esta ɗəmhə ni.