Read bura-pabir Esta 7 Bible Online

Esta 7 - bura-pabir bible

Esta 7

¹Apani antə kuthli ka Haman ku təra mwari akwa səm susəm ni ata kəma duku ka Kuthli Mwala Esta.

²Akwa vir na suɗkur sakatə da akwa sa yimər anap, antə kuthli ni jaktə pəla aka Esta abbər, “Man damitədzər ngə ri, Kuthli Esta? I ata hamta ala gə suari. Man tə ga akwa barari ri? Wala ma an retar kuthlikurərna, I ata hamta ala ga.”

³Antə Kuthli Mwala Esta shinau ka pəla abbər, “Ka Barkar nga, ma I an ata wutə mdəkur ata nca ga, tsuwa ma akəs kəra ga, ka mdə zhar ra bu ka mpika. Ngəni an damitədzər na. Tsuwa ka mdə zhar mjirna ka mpika. An tsa kiɗərna, Bundi.

⁴Kamnyar mdə ku ɗələmta yeru kəga mjirna, ka mdə thlagamta wulya yeru, ka shamta yeru ata kəra duniya. Ma abbər mda an ɗələmta yeru shili ka mwanki ka yeru ndzi apa mafa daci, sakani I aɗi ata ndər wa. Kamnyar dawayeri aɗi ata mzhi ntəmta asar na ata wutə kuthli wa.”

⁵Antə Kuthli Ahasuwerus pəla aka Kuthli Mwala Esta, “Wan mdari ri? Tsuwa mdari ama ri na ata nggitə hara su ngəni ni?”

⁶Antə Esta pəla, “Dawar yeru ngəni na ɗimi ka kəmanggar ni an Haman!” Antə Haman ku thlivəra ka duna har tə dzari ləkwa kədza akəma kuthli ka kuthli mwala ni.

⁷Antə kuthli ku thlatə ka ɗəffə ɓzəɓza ka təra kazhar yimər anap arni, ka ləɓəla akwa vəi tə mdə ncimta nfur pukdlayeri akwa kutakəi ni. Amma Haman ku thləthlata akwa kiɗə kəra Kuthli Mwala Esta, abbər ka tsa mbantə mpikari, kamnyar tsa ku nggaɓəla ɗimikur su tə kuthli ata hara alari.

⁸Sakatə kuthli ku zhar vəi tə mdə ncimta pukdlayeri akwa ni ka ngka akwa vəi sa yimər anap ni, təng tsa wutə Haman azuzuri ata sərpəi na saɓəl tə Esta ata, akwa kiɗə kərari. Sakatə kuthli ni wutə ni antə tsa pəla, “Har mdə ngəni akwa bara ngka Kuthli Mwala ata nci akwa kutakəyirna ya?” Təkəma tə kuthli pəla ndər ngəni, təng nca Haman ngka pit mamza kamnyar thlivəra.

⁹Antə Harbona, pal akwa nca kulaɓayeri na ana hara kəthlər aka kuthli ni pəla, “Ai Haman ku kurtə nci udzəm na ka nalkurərni dzartsi ntəfkumari kamnyar mbwamta mji ata akwa kəyirni. Tsa nci udzəm ni kamnyar mbwamta Mordekai, mdə na msərantə mpika kuthli ni.” Antə kuthli pəla, “Mbwamta giri Haman ata udzəm ndaga.”

¹⁰Antə mdə ku mbwamta Haman ata udzəm tə tsa ɗəmhə kamnyar Mordekai ni. Antə ɗəffa kuthli ku pwi.