Read bura-pabir Esta 8 Bible Online

Esta 8 - bura-pabir bible

Esta 8

¹Tsu vir nda antə Kuthli Ahasuwerus hamta shanga su na akəla Haman na dawar mjir Yahuda aka Kuthli Mwala Esta. Kuthli Mwala Esta ni ku kurtə pəla aka kuthli abbər Mordekai ni yangkurari, antə tsa ku si akəma kuthli.

²Antə kuthli ku kətə lenduwar kuthlikur ni tə tsa ku dluwa akəla Haman, ka hamta aka Mordekai. Antə Esta ku nar olkur aka Mordekai ar wul shanga su tə Haman kəgari.

³Esta ku jaktə kiɗə su akəla kuthli. Tsa pəpəyimta adzə səla kuthli akwa tuwa abbər ka tsa kələmta ɗimikur tə Haman na mdər Agag ɗəmhə kamnyar mjir Yahudi ni.

⁴Antə kuthli ku ha zwalər dinar na ar kuthlikur ni aka Esta. Antə Esta ku thlatə ka thləthlata akəma kuthli ni, ka pəla,

⁵“Ka Barkar nga, ma ga an ahira, tsuwa ma I an ku wutə mdəkur ata nca ga, ka tsuwa ma su ngəni an kalkal akəma ga, tsuwa ma I ku hara su na ku kəskəra ga, ndzi ka mdə rəbutə wasika damwa na ata sharəmta tsawa tə Haman na ɓzər Hammedathla, na mdər Agag, rəbuta abbər ka mdə kurəmta mjir Yahudi na akwa shanga tsəɗiyir ngə ni ni.

⁶Kamnyar apa madi tə I ata mzhi nggitə wul asar ata kəra mjirna ri? Apa madi tə I ata mzhi nggitə wul asar na ata wutə yangkuri ri?”

⁷Antə Kuthli Ahasuwerus pəla aka Kuthli Mwala Esta ka Mordekai na mdər Yahudi ni abbər, “I ku kurtə mbwamta Haman ata udzəm tə mdə ncimta ni, kamnyar tə tsa ku bara shamta mpika mjir Yahudi, tsuwa I ku hamta shanga su na akwa tsiya Haman aka Esta.

⁸Amma tsawa tə mdə ku kurtə rəbuta akwa thləma kuthli, ka tsatə dludzər seɗar lenduwar kuthli, sur sharəmtari aɗi wa. Amma wala apani giri ata mzhi rəbutə tsawa damwa na ata kəskəra giri akwa thləmi aka mjir Yahudi, ka giri tsatə dludzər seɗar lenduwarna.”

⁹Antə mdə ku tsaptə sakatareyeri ar kuthli kula shamta saka. Mdə tsaptə ɗa akwa vira thliya sərkumari ka makər ar thliya na makərkur, na an thliyar Sivan. Antə da ku rəbutə shanga su tə Mordekai pəla, ka thlenta aka mjir Yahudi, ka aka mji na ka kuthlikur, ka gwamnayeri, ka aka ajiyayeri ar tsəɗiyayeri aru pal ka sərkumari ka murfa, baɗita akwa Indiya har ka mwanta akwa Ithliyopiya. Mdə rəbutə wasika ni aka kəlara tsəɗi ka jili rəbutərni, tsuwa akwa mnyar ɗa, ka rəbuta aka mjir Yahudi tsuwa akwa rəbutər ɗa ka mnyar ɗa.

¹⁰Mordekai vu tə sakatareyeri ni rəbutə wasikayeri ni akwa thləma Kuthli Ahasuwerus, ka tsatə seɗar dludzər lenduwar kuthli. Antə mdə ndəkəmta wasikayeri ni atar mjir “Ka tsa pi wa”, na ana fəl takwayeri na ɓəɓatu, takwayeri natə mdə ɗiɓəla ɗa kamnyar hara kəthlər ar kuthli.

¹¹Wasikayeri ni akwa pəla abbər kuthli ku zhar ka mjir Yahudi na akwa kəlara bərni tsaptədzi ka da mpa kamnyar mbul kəra ɗa. Tsuwa ka da tsəgəi, ka kurəmta, ka shamta kəlara mji na ku dlər ɗa, kəga mwankir ɗa, kəga maɗangkyarər ɗa. Tsuwa mdə ku na ɗa laku ka da dlutsə kariyir dawayeri arɗa.

¹²Vir tə mdə thlamta kamnyar kurəmta shanga mjir Yahudi na akwa tsəɗiyayeri na akira Kuthli Ahasuwerus, an akwa vira thliya kumnya makər ar thliya na kumnya suɗkur, na an thliyar Adar.

¹³Mdə vu tə su tə mdə rəbuta akwa wasika ni ndzi tsawa aka shanga lardayeri, ka mdə psəmnya aka shanga mji na akwa tsəɗi ni. Mdə hara apani kamnyar ka mjir Yahudi ni mzhi ɗəmhədzi kwabə vir nda kamnyar ntə dawakur ata kəra dawayeri arɗa.

¹⁴Antə mjir “Ka tsa pi wa” ni ku fəltə takwayeri na ɓəɓatu akwa kəi kuthlikur ni, ka puɓəladzi ka huva, apatə kuthli ku tsawa ala ɗa. Antə mdə ku psəmnya tsawu ngəni akwa Shushan na di kuthlikur.

¹⁵Antə Mordekai thlata akəma kuthli, ka təra akwa ləptər kuthlikur na ka kalar zarkina ka mwapu. Tsuwa mdə ku tsangkər alari dzakwar kuthlikur tə mdə nam ka dinar, ka ləptu laga ola tə mdə tsa ka lilin na ka kalar yar ndləngi həng'ha. Ləɓəlar ni təkəma təng mjir bərni Shushan dlu ni ka yarali kamnyar kucali.

¹⁶An sakatə hyala mjir Yahudi səghəi, tə da hara kucali ka ɗəffu mwapu, ka wutə səli.

¹⁷Antə akwa kəlara lardayeri ka bərniyayeri tə tsawur kuthli ni ku mzhita, mjir Yahudi ni ku nghyi ka kucali ka ɗəffu mwapu, har tə da ləkwa hara kucali ka hamta Vir Ghərəmtaghəra aka kəra ɗa. Tsuwa mji hang akwa nca mjir tsəɗiyayeri damwa ku ndzi mjir Yahudi, kamnyar kulini mji akwa thlivər mjir Yahudi.