Read bura-pabir Esta 9 Bible Online

Esta 9 - bura-pabir bible

Esta 9

¹Vir laga akwa vira thliya kumnya makər ar thliya na kumnya suɗa, na an thliyar Adar, vir tə dawayeri ar mjir Yahudi kəta abbər da ata nghyaɓəla su tə kuthli tsawa ala ɗa abbər ka da kurəmta mjir Yahudi ni, təng shanga su palidzi. Ata vəya ndaga mjir Yahudi an pungkərdzi ata kəra dawayeri arɗa ka səm ɗa.

²Antə mjir Yahudi ku tsaptədzi akwa bərniyayeri arɗa na akwa shanga lardayeri na akira Kuthli Ahasuwerus, kamnyar mpa kəlara mji na ku bara dəkəi ɗa.

³Tsuwa shanga mji na ol'olər lardayeri, ka mji na ka kuthlikur, ka gwamnayeri, ka kwakunayeri, shang ku dlar mjir Yahudi, kamnyar da akwa thlivər Mordekai.

⁴Kamnyar mji ku sənda abbər Mordekai ku ndzi mdə ola akwa kəi kuthli, antə thləmari ku ləkəma ka tuwa akwa shanga lardayeri ni, kamnyar tsa akwa ləkəma ka wutə dunar kuthlikur.

⁵Apani antə mjir Yahudi ku hara ala ɗa su tə da hira. Da pungkərdzi aka shanga dawayeri arɗa ka katsakar ka tsəgəi ɗa, ka shamta ɗa ata kəra duniya.

⁶Akwa Shushan na di kuthlikur ka kərari ma, mjir Yahudi ku kurəmta mji aru ntəfu.

⁷Tsuwa da ku tsi Parshandathla, ka Dalfon, ka Aspathla,

⁸ka Porathla, ka Adaliya, ka Aridathla,

⁹ka Parmashta, ka Arisai, ka Aridai, ka Vaizathla.

¹⁰Mji ngəni kum ni an maɗa' Haman na dawar mjir Yahudi. Amma da aɗi dlutsə kariyir ɗa wa.

¹¹Tsu vir nda antə mdə ku thlenta aka kuthli hangkur mji tə mdə kurəmta akwa Shushan na di kuthlikur ni.

¹²Antə kuthli pəla aka Kuthli Mwala Esta abbər, “Akwa Shushan na di kuthlikur, mjir Yahudi ku tsəgəi mji aru ntəfu ka maɗashilər Haman kuma. Antə wan asəndə jili su tə da harata akwa bwadukwa lardayeri na akwa tsəɗi nə ri? Kulini mə damwa antə ga akwa barari ri? Mda ata na ala gə suari. Man tə ga akwa barari ri? I ata hamta ala gə suari.”

¹³Antə Esta pəla, “Ka Barkar nga, ma akəs kəra ga, zhar ka mjir Yahudi na akwa Shushan ni jaktə hara su tə da hara ashina ni ɗəpa, apatə mdə tsawa ala ɗa. Tsuwa ma ɗəpa ka mdə mbwamta mshiyir maɗashilər Haman na kum ni ata udzəmər mbwamta mji.”

¹⁴Antə kuthli ku tsawa ka mdə hara apani. Antə mdə ku psəmnya tsawu ngəni akwa Shushan. Antə mdə ku mbwamta mshiyir maɗashilər Haman na kum ni.

¹⁵Antə mjir Yahudi na akwa Shushan ku tsaptədzi akwa thliyar Adar ka virari kumnya nfwar, ka tsəgəi mji aru makər akwa bərni ni, amma da aɗi dlutsə kariyayeri arɗa wa.

¹⁶Akwa saka ngəni mambila mjir Yahudi na akwa lardayeri na akwa tsəɗi ni ku tsaptədzi kamnyar mpamta kəra ɗa, tsuwa ka da wutə vəi sarar mpika akəla dawayeri arɗa. Antə da ku tsəgəi dawayeri arɗa dəpu murfəkumari ka ntəfu. Amma da aɗi dlutsə kariyayeri arɗa wa.

¹⁷Su ngəni ku hara akwa thliyar Adar ka virari kumnya makər. Antə səɓəla ɗəpari, akwa vir na kumnya nfwarkur da ghərəmtaghəra, ka namtə vir nda vir kucali ka ɗəffu mwapu.

¹⁸Amma mjir Yahudi na akwa Shushan ku tsaptədzi akwa vira thliya kumnya makər ka kumnya nfwar, ka ghərɓəlaghəra akwa vira thliya kumnya ntəfu. Da namtə vir nda vir kucali ka ɗəffu mwapu.

¹⁹Kamnyar ngəni antə mjir Yahudi na akwa diyayeri ku namtə vira thliya kumnya nfwar ar Adar tə tsa ndzi vir ghərəmtaghəra. Antə vir ni ku ndzi vir kucali ka vir səm susəmər kucali, ka vir hamta cautər susəma aka nvwa ɗa.

²⁰Antə Mordekai ku rəbwamta suayeri ngəni, ka thlentə wasikayeri aka shanga mjir Yahudi na akwa shanga lardayeri na ciju ka kudzəha akira Kuthli Ahasuwerus.

²¹Tsa tsawa ala ɗa abbər kəlara məva ka da ɓəlatə vira thliya kumnya nfwar ka na kumnya ntəfu ar thliyar Adar.

²²Kamnyar nayeri ni an virayeri tə mjir Yahudi msərantə kərɗa akəla dawayeri arɗa. Kamnyar akwa thliya ngəni antə ɗəffə ɓzəɓza ku shin ka kucali, tə vir tuwa ku shin ka vir kucali. Antə mdə tsawa aka mjir Yahudi abbər ka da ɓəlatə virayeri ngəni, ka da ndzi virayeri ar səm susəmər kucali ka ɓathla, ka tsuwa virayeri tə mji ata hamta cautər susəma aka nvwa ɗa, ka hamta cautayeri aka mjir bwani.

²³Antə mjir Yahudi ku kələngkər abbər da ata ləkəma ka hara su tə da baɗitə ni ata məva ata məva, apatə Mordekai ku tsawa ala ɗa.

²⁴Da hara apani ni kamnyar Haman na ɓzər Hammedathla mdər Agag, na dawar shanga mjir Yahudi ni, ku ɗəmhə ɗimikur ata kəra mjir Yahudi abbər ka tsa kurəmta ɗa. Tsa ndzəl su tə mda ana kəga thləmari “Pur”, kamnyar ka tsa səndə vir tə mda ata sə kurəmta mjir Yahudi.

²⁵Amma sakatə kuthli ku nggatə ɗimikur tə Haman ɗəmhə ni, antə tsa hamta tsawu na rəbutə rəbutari abbər ka shanga ɗimikur tə Haman ɗəmha ata kəra mjir Yahudi ni jaktə ngka ata kərari surni, tsuwa ka mdə mbwamta ni ka maɗashilərni ata udzəmər mbwamta mda.

²⁶An su na hara tə da kəga virayeri ngəni ni “Purim”, na səɓəla akwa ndər laga “Pur” watau kuriya. Apani kamnyar su tə mdə rəbuta akwa wasika ni, ka su tə da wuta, ka tsuwa kamnyar shanga suayeri na wutə ɗa,

²⁷antə mjir Yahudi wuta abbər dwali ka virayeri ngəni ndzi vir kucalər ɗa. Antə da, ka kəkayeri arɗa, ka shanga mji na ku hir paktə kər kəga da, ata ləkəma ka ɓəlatə virayeri ngəni suɗə ni, kula tsamta, tədək məva apatə mdə ku thlamta.

²⁸Kəlara kutakəi akwa kəlara diyayeri kəga bərniyayeri na akwa tsəɗi ni ata ləkəma ka ɗangtə virayeri ngəni, ka ɓəlatə ɗa akwa shanga zamanayeri na ata sə si. Apani mjir Yahudi aɗi ata tsamta virayeri ar Purim ni wa, wala zhar ka kəkayeri arɗa fwari ɓəlatari tsu wa.

²⁹Aghəla nda antə Kuthli Mwala Esta na ngkwar Abihayil, ata kəma duku ka Mordekai na mdər Yahudi ku rəbutə wasika na ka duna kamnyar dunautə wasika na suɗkur ata kəra Purim ni.

³⁰Antə mdə ku thlentə wasikayeri ni aka shanga mjir Yahudi na akwa lardayeri aru pal ka sərkumari ka murfa na akira kuthlikur Ahasuwerus ni. Akwa wasikayeri ni mdə ku kiɗa abbər ka mjir Yahudi ndzəndzi akwa msərakur ka ndzi ka jirkur aka nvwa ɗa.

³¹Tsuwa mdə ku tsawa ala ɗa abbər ka da ka kəkayeri arɗa vədzə kər aka virayeri ar Purim ni ka ɓəlatə ɗa akwa sakayeri tə mdə thlamta. Tsuwa Mordekai na mdər Yahudi ka Kuthli Mwala Esta ku tsawa aka mjir Yahudi abbər ka da ɓəlatə virayeri ar asham ka ar tuwa tə da ata harari ni.

³²Apani tsawur Kuthli Mwala Esta ku dunautə suayeri tə mdə thlamta ata kəra Purim, tsuwa mdə ku rəbuta akwa kakaɗu na pərpərari.