Read bura-pabir Səɓəlari 12 Bible Online

Səɓəlari 12 - bura-pabir bible

Səɓəlari 12

¹Antə MTHLAKU pəla aka Musa ka Haruna sakatə da ahar Masar ni abbər,

²“Thliya ngəni ata ndzi ala giri thliya na ntangkəma akwa məva.

³Ka mda pəla aka shanga mjir Israila abbər akwa thliya ngəni ka virari kuma, ka kəlara mthlakərkəi kəɓəla ɓzər gam, wala ɓzər kwi akwa ciɓərni, kamnyar mjir kutakəyirni, kəlara kəi ka mwaɓi pal.

⁴Ma kutakəi na raka tə da amzhi ɓɗəmnya mwaɓi pal wa, ka da paktə kər ka ntəwulərni ata kəra mwaɓi pal. Antə mda ata ndəkəi kumər mwaɓi ni kalkal ka hangkur mjir kutakəyir ɗa.

⁵Giri ata carɓəla təma wala kwi na ka məvari pal, amma tar ka mwaɓi ni ndzi salari, tsuwa kula nangka.

⁶Antə giri ata vəi mwaɓi ni har vir na kumnya nfwarkur ar thliya ngəni. Antə vir nda tahaku shanga mjir Israila ata thlamta wulya mwaɓiyir ɗa.

⁷Ka da kətsə mamshari ka da fadza aka udzəm thlimbəla nyarmbwayeri tə da ata səm kum arɗa akwa, ka ata udzəm kəra nyarmbwayeri ni.

⁸Tsuwa tsu vir nda aviri antə da ata ptsatə kum ni. Da ata ɓɗə kum ni ka buradi na kula yist, ka thlali na ɗəɗahu.

⁹Giri aɗiya ɓɗə kum ni hadlu wa, wala ta kum ni ka yimi wa, amma ka giri ptsaptsata ata u'u shang kəga kərari, ka nggilangari purəm kəga sur kutari.

¹⁰Giri aɗiya mbilar wala raka ka tsa səktə ɗəɗəpə wa. Kəlara su na ku mbili har tə viri kura alari, ka giri mbamta ni.

¹¹Nggədza laku tə giri ata ɓɗə kum ni akwa, giri ata mbwi kusara giri ɓɗaku, ka ɓabiyir giri akwa səla giri, ka zwalər giri akwa tsiya giri, ka giri səm ka huva, kamnyar ngəni an Kucalər Fəlɓəla Kəi aka MTHLAKU.”

¹²“Tsu vir nda aviri antə I ata təramta akwa tsəɗi Masar, kəi tsəgəi shanga maɗashili na yarakəma ar mda ka ar mwaɓi. I ata ɗi shanga haptayeri ar mjir Masar, kamnyar I an MTHLAKU.

¹³Mamshi ni an seɗa na ata ncantə vəi tə giri ata. Ma sakatə I ku wutə mamshi ni, I ata fəlɓəla kəyir giri, antə su aɗi ata dəkəi giri wala tsəkwar giri sakatə I akwa hara asar aka mjir Masar wa.

¹⁴Vir ndaga ata ndzi ala giri vir tə giri ata sə ɗangtari tədəku, antə giri ata ɓəlatə ni ɓɗaku kamnyar tsa ata ndzi vir kucali aka MTHLAKU. Antə giri ata ləkəma ka ɓəlatə vir ndaga akwa shanga zamanayeri ar giri, kamnyar tsa ata ndzi tsawa ala giri ba saka madi.”

¹⁵MTHLAKU pəla, “Giri ata hara vir murfa akwa kwasə buradi na kula yist. Akwa vir na ntangkəma giri ata fwaɓəla shanga yist na akwa kəyayeri ar giri. Kamnyar kəlara mdə na ku kwasə buradi tə mdə ɓwa ni ka yist baɗita akwa vir na ntangkəma har ka mwanta akwa vir na murfəkur, mda ata kəɓəla ni kazhar Israila.

¹⁶Akwa vir na ntangkəma ka tsuwa akwa vir na murfəkur ka giri tsaptədzi kamnyar vəngkər səli ali. Mda aɗi na ata hara kəthlər akwa virayeri ngəni wa, tar kəthlər ɗəmhə susəma natə giri ata sə səmari.

¹⁷Ka giri ɓəlatə vir Kucalər Buradi Kula Yist ɓɗaku, kamnyar vir nda antə I fwaɓəla giri akwa tsəɗi Masar. Antə ka giri ɓəlatə vir ngəni akwa shanga zamanayeri ar giri, kamnyar tsa ata ndzi tsawa ala giri na ba saka madi.

¹⁸Baɗitə ka tahaku ar thliya na ntangkəma virari kumnya nfwar ka mwanta aka tahakər vira thliya sərkumari ka ntang ar thliya na ntang ni, giri aɗi ata kwasə buradi tə mdə bwa ka yist wa.

¹⁹Akwa virayeri ngəni murfə ni mda aɗi bara ka mdə wutə yist akwa kutakəyayeri ar giri wa. Antə kəlara mdə tə mdə ku wuta akwa kwasə buradi tə mdə ɓwa ka yist, mda ata kədləɓəla ni akwa nca mjir Israila, wala tsa mətəpi wala tsa an mdər tsəɗi.

²⁰Akwa shanga vəi tə giri ata ndzəndzi akwa, giri aɗiya səm su na ka yist akwa wa, tar buradi na kula yist antə ka giri kwasa.”

²¹Antə Musa kəga shanga mji ol'olər Israila ka pəla ala ɗa, “Ka kəlara kutakəi carɓəla ɓzər təma natə giri ata hara kucali ar Fəlɓəla Kəi kəgari.

²²Ka kəlara mda akwa nca giri kətə soso natə tsa ata nciwari akwa mamshi na akwa tasa na ola, ka giri fadza aka udzəm thlimbəla nyarfur kəyayeri tə da ata səm kum arɗa akwa ni, ka ata udzəm kəra nyarfayeri ni. Antə mda aɗiya ləɓəla kazhar kəyirni wa tar ma vir ku kuri.

²³Kamnyar MTHLAKU ata təramta akwa kuta Masar, ka tsa tsəgəi mjir Masar. Antə ma tsa ku wutə mamshi na ata udzəm thlimbəla nyarfur kəyayeri ka udzəm kəra nyarfayeri ni, tsa ata fəlɓəla kəi ndaga, tsuwa tsa aɗi ata zhar ka mdər tsəgəi mji ni ləkwa kəyayeri ar giri ka tsa tsəgəi giri wa.

²⁴Antə ka giri ɓəlatə su ngəni, kamnyar tsa ata ndzi tsawa ala giri kəga maɗa' giri ba saka madi.

²⁵Ma sakatə giri ku ləkwa tsəɗi natə MTHLAKU ku hara alkawalər hamtari ala giri, ka giri ɓəlatə sur vəngkər səli ngəni tədəku.

²⁶Ma maɗa' giri ku yu giri abbər, ‘Man karapur sur vəngkər səli ngəni ri?’

²⁷Ka giri pəla ala ɗa abbər, ‘Ngəni an saɗakar Kucalər Fəlɓəla Kəi aka MTHLAKU, kamnyar tsa ku fəlɓəla kəyir mjir Israila akwa Masar. Kamnyar sakatə tsa akwa tsəgəi mjir Masar, tsa aɗi tsəkwar kəi yeru wa.’ ” Antə mjir Israila ku zuzuri ka vəngkər səli aka Hyel.

²⁸Antə mjir Israila ku təra ka ra hara kalkal apatə MTHLAKU ku tsawa aka Musa ka Haruna.

²⁹Sakatə kərathlər viri ku hara antə MTHLAKU ku tsəgəi shanga maɗashili na yarakəma akwa tsəɗi Masar, baɗita ata ɓzər sal na yarakəmar kuthli na ata dəkəl kuthlikur ka mwanta aka ɓzər sal na yarakəmar mji tə mdə mbwi akwa pərsəna, har ka ləghəi ata kəra shanga yarakəmar mwaɓiyayeri tsuwa.

³⁰Antə kuthli ka kwakunayeri arni, ka shanga mjir Masar ku thlata ata heni aviri, ka tuwa ka kuraku, kamnyar kəi aɗi wala duku na kula ma mdə ku mta akwa wa.

³¹Tsu vir nda aviri antə kuthli thlentə ka mdə kəga alari Musa ka Haruna, ka pəla ala ɗa, “Thlatə giri, ka giri ləɓəla kazhar mjirna, giri kəga shanga mjir Israila! Mwar giri ra vəngkər səli aka MTHLAKU apatə giri pəla ni.

³²Fatə giri təmar giri, kəga kwiyir giri, kəga thlar giri, apatə giri pəla ni, ka giri təra. Amma ka giri vədza ali barka kwabə giri atəra.”

³³Antə mjir Masar ku dzəktə mjir Israila abbər ka da mwa taktar ka da təra kazhar tsəɗiyir ɗa, kamnyar da pəla, “Ai ma da aɗi təra wa, mburu ata kurəmtadzi cipu!”

³⁴Antə mjir Israila kətə mpu hərhəra natə mda aɗi pungkər yist katagu wa, ka kugwar hər mpu ni tə da pərta akwa ləptər ɗa, ka hata ata pathlaha ɗa.

³⁵Mjir Israila ku hara tsu apatə Musa ku pəla ala ɗa. Da yutə kari dəɓa apa adzərfa, ka dinar, ka ləptayeri, akəla mjir Masar.

³⁶Antə MTHLAKU vu tə mjir Masar wutə mdəkur ata nca mjir Israila, antə da ku na ala ɗa su tə da ku yu akəla ɗa. Atar ngəni antə mjir Israila ku famnya gənar mjir Masar.

³⁷Antə mjir Israila ku thlata ahar Rameses na akwa tsəɗi Masar ka mwari ahar Sukkoth ka səl. Hangkurər ɗa shang ku mwanta apa mji shili dəpu aru ngkwa, zharka mwanki kəga maɗankyar.

³⁸Tsuwa mji damwa hang na aɗi mjir Israila wa ku pungkərdzi ala ɗa abbər ka da təra ata kəma duku kəga da. Da fatə təmar ɗa, kəga kwiyir ɗa, kəga thlar ɗa, ka paktə kəga mjir Israila ka təra.

³⁹Ka mpu na hərhərari tə da thlatə kəgari ahar Masar kəgari ni antə da ɓwatə cincin na kula yist. Cincin ni aɗi ka yist wa, kamnyar tə mji an kədləɓəla ɗa ka huva kazhar Masar, antə da aɗi səktə sakar pungkər yist ni wa, tsuwa da aɗi ɗəmhə susəma damwa wa.

⁴⁰Mjir Israila ku ndzi akwa tsəɗi Masar mnyar məva aru nfwar ka makkumari.

⁴¹Antə akwa vir tsikəra məva aru nfwar ka makkumari ni shanga mjir MTHLAKU ku ləɓəla kazhar tsəɗi Masar, ata nyarmbwa ata nyarmbwa.

⁴²Viri ngəni an vir tə MTHLAKU ɗəmhə kamnyar fwaɓəla mjir Israila akwa Masar. Kamnyar ngəni shanga mjir Israila ata ɓəlatə viri ngəni kamnyar na olkur aka MTHLAKU akwa shanga zamanayeri arɗa.

⁴³Antə MTHLAKU pəla aka Musa ka Haruna, “Ngənayeri ni tsawayeri na ata kəra susəmər vir Kucalər Fəlɓəla Kəi. Mətəpi aɗi ata səmari wa,

⁴⁴amma kəlara mafa natə giri ku masta ata mzhi səmari, aghəla tə mdə ku thlamta alari kaciya.

⁴⁵Amma mətəpi na ata ɗarndzi raka ka təra ka tsuwa mdər kəthlər watsəɓa aɗi ata səmari wa.

⁴⁶Shanga susəm ni mda ata səmari tsu akwa kutakəi tə mdə ta akwa ni, mda aɗiya ləɓəla ka dakulər kumari kazhar kəi ni wa. Tsuwa mda aɗiya ɓəlwa ɗethlari wa.

⁴⁷Shanga mjir Israila ata ɓəlatə vir kucali ngəni.

⁴⁸Amma ma mətəpi aɗi akwa nca giri na akwa bara ka tsa hara Kucalər Fəlɓəla Kəi ar MTHLAKU ni, antə tar ka shanga mji shili na aviyarngkiɗa thlamta kaciya. Aghəla nda antə tsa ata mzhi shahədzi ka tsa səma apa mdə natə mdə ya ni akwa tsəɗi ni. Amma mdə na aɗi thla kaciya wa, amzhi səmari wa.

⁴⁹Tsawu ngəni ata ndzi aka kəlara mda, wala tsa mdər di wala tsa an mətəpi na ka ndzi akwa nca giri.”

⁵⁰Antə shanga mjir Israila ku hara kalkal apatə MTHLAKU ku tsawa aka Musa ka Haruna.

⁵¹Antə tsu vir nda MTHLAKU ku fwaɓəla mjir Israila kazhar Masar ata nyarmbwa ata nyarmbwa.