Read bura-pabir Səɓəlari 14 Bible Online

Səɓəlari 14 - bura-pabir bible

Səɓəlari 14

¹Antə MTHLAKU pəla aka Musa,

²“Pəla aka mjir Israila ka da ngka ka bwahili ka da fəli akəma Pi Hahiroth na akwa daɓwa Migdol ka manda ni, awul Baal Zefon.

³Antə kuthli ata dzama abbər, ‘Yauwa, nggədza mjir Israila ku ndəndatədzi akwa mwa ka mwankir kula kər akwa tsəɗi ni, da akwa thlivər nu kuta mtaku ni!’

⁴I ata namtə ɗəffa kuthli ɓəɓal, antə tsa ata nu ghəla giri. Tsuwa laku tə I ata nggyari kuthli kəga sojayeri arni akwa ni ata vu ka mji səlitə ra. Antə mjir Masar ata sənda abbər I an MTHLAKU.” Antə mjir Israila ku hara apani.

⁵Sakatə mdə pəla aka kuthlir Masar abbər mjir Israila ni ku hwi ləɓəla, antə kuthli ka kwakunayeri arni pali dzamər ɗa ata kəra mjir Israila ni, tə da pəla, “Kai! Man wutə mburu tə mburu zhar mjir Israila ka da təra kazhar kəthlər ala mburu nə ri?”

⁶Antə kuthli ni ɗəmhə wagənər taku ar mpa ka fatə sojayeri adzə ni.

⁷Tsa fatə wagənayeri ar taku na ɓɗakta shang aru ngkwa, ka shanga mambila wagənayeri ar taku na akwa Masar, ka sojayeri na ol'ola ata kəra ɗa, ka təra kəga da.

⁸Antə MTHLAKU namtə ɗəffa kuthlir Masar ɓəɓal, tə tsa ku nu ghəla mjir Israila, na akwa pa səl akwa ləɓəla kula thlivəra.

⁹Antə sojayeri ar Masar, ka shanga takwayeri, kəga wagənayeri, kəga mjir fəl taku, ku pwa ghəla mjir Israila abbər ka da thli ɗa. Antə mjir Masar ni ku kəli mjir Israila akwa vəi tə da fəli ata mnya manda na adzə Pi Hahiroth, awul Baal Zefon.

¹⁰Sakatə mjir Israila ha nca ɗa ka wutə kuthli kəga sojayeri arni akwa si ata kəra ɗa, antə da yakata ka tuwa ka kuraku aka MTHLAKU abbər ka tsa dlar ɗa.

¹¹Da pəla aka Musa, “Kamnyar mi tə gə səntə yeru ka yeru sə mta azi akwa mtaku nə ri? Mdə pəla ala gə kula aɗi akwa Masar wa ya? Shang kamnyar mi tə gə fwaɓəla yeru kazhar Masar nə ri?

¹²Shanga yeru aɗi pəla ala gə sakatə mburu tsu akwa Masar abbər, ‘Ar ngə zhar yeru ka yeru ləkəma ka mafakur aka mjir Masar ni' wa ya?’ Kamnyar kuji ka yeru ləkəma ka hara mafakur aka mjir Masar ta ka yeru kurəmtadzi azi akwa mtaku.”

¹³Amma Musa pəla, “Giri aɗiya thlivər wa. Thləthlatə giri gyang, antə giri ata wutə jili mbantədzi tə MTHLAKU ata hara ala giri ashina. Kamnyar mjir Masar tə giri akwa wul ɗa ashina ni, giri aɗi ata jaktə wutə ɗa kəra wa har ka duniya thlata.

¹⁴MTHLAKU ka kərari surni an ata mpa kamnyar giri, ar giri dləɓ giri səri.”

¹⁵Antə MTHLAKU pəla aka Musa, “Kamnyar mi tə ga akwa tuwa ali ri? Pəla aka mjir Israila ka da ləkəma ka mwa.

¹⁶Haptə zwalər nga akwa tsiya ga, kara ndərari ata kəra manda ni. Antə yimi ni ata ndəkəudzi ka bwa suɗa, kamnyar ka mjir Israila mzhi təramta akwa manda ngəni ata di ul'ula.

¹⁷Tsuwa I ata namtə ɗəffa mjir Masar ɓəɓal, antə da ata nu ghəla ɗa abbər ka da thli ɗa. Antə I ata nggyari kuthli, ka shanga sojayeri arni, ka wagənayeri arni, ka mjir fəl takurni, kəi wutə səli na ola.

¹⁸Ma sakatə I ku wutə səli na ola atar nggyari kuthli, ka wagənayeri arni, ka mjir fəl takur ni, antə mjir Masar ata sənda abbər, I an MTHLAKU!”

¹⁹Antə mdərthlentərhyel na akwa mwa akəma sojayeri ar Israila ni ku zhar bwakəma ka ngka abwahila ɗa. Antə dlamba na kəkəsu na thləlidzi akwa mwa akəma ɗa ni tsuwa ku zhar bwakəma ka ngka abwahila ɗa,

²⁰akwa daɓwa mjir Masar ka Israila. Antə har tə viri kura dza dlamba na pal akwa hamta kuthlu təbwar mjir Masar, antə dzari na dukwari tsuwa akwa hamta parakəu təbwar mjir Israila. Antə har tə viri kura sojayeri ar Masar aɗi hara kudzəhə ka mjir Israila wa.

²¹Antə Musa haptə tsiyari ka ndərangkər ata kəra manda. Antə MTHLAKU hara tə shambar laga na ka duna ku thlatə təbwar raghəi ka tsartə yimi abwahili. Antə shambar ni pi ata kəra fya har tə tsa vu tə yimi ni ndəkəudzi ka bwa suɗa, tə manda ni ku ndzi di ul'ula.

²²Antə mjir Israila ku təramta ata ɗəffa manda ni ata di ul'ula, tə yimi ni ku thlatə ka thləthlata apa banggwa abwa mazəm ka abwa matsəkar.

²³Antə mjir Masar, ka shanga takwayeri ar kuthli, kəga wagənayeri arni, ka mjir fəl takwayeri ni shang ku nutə ɗa har ka ləkwa manda ni tsuwa.

²⁴Ɗəɗəpə mbing akwabə viri akura, antə MTHLAKU haghəi ncari akwa wul sojayeri ar Masar akwa dlambar u'u, har tə da ku ndəndatədzi.

²⁵Tsa mpəgələmta tayar wagənayeri ar takur ɗa har tə da amzhi mwa kəgari kəra wa. Antə mjir Masar ni pəla aka nvwa ɗa, “Mbura hwi ta mjir Israila! Kamnyar MTHLAKU akwa mpa kamnyar ɗa, tsa aɗi akwa hir mburu wa!”

²⁶Antə MTHLAKU pəla aka Musa, “Haptə tsiya ga ka gə ndərari ata kəra manda ni, antə yimi ni ata ngka ata kəra mjir Masar, kəga wagənayeri arɗa, ka mjir fəl takwayeri arɗa.”

²⁷Antə Musa ku haptə tsiyari ka ndərari ata kəra manda ni. Sakatə viri akwa kura təng yimər manda ni jaktə ngka akwa vəyari na hwatu. Mjir Masar ku kəɗar ka da hwiyimta yimi ni, amma MTHLAKU ku tsartə ɗa cipu ka pu ɗa akwa manda ni.

²⁸Antə yimi ni ku ngka ka hartə wagənayeri ni, ka mjir fəl takwayeri ni, ka shanga sojayeri ar kuthli na nutə mjir Israila akwa manda ni. Mda aɗi na mbiləmta wala duku wa.

²⁹Amma mjir Israila ku təramta ata ɗəffa manda ni ata di ul'ula, kamnyar yimi ni ku ndzi apa banggwa təbwar mazəm ka matsəkara ɗa.

³⁰Vir nda antə MTHLAKU ku mbantə mjir Israila akwa tsiya mjir Masar. Antə mjir Israila ku wutə mshiyir mjir Masar apumta ata mnya maghəm.

³¹Sakatə mjir Israila ku wutə surndatə na ola tə MTHLAKU hara aka mjir Masar ni, antə mjir Israila ku thlivər MTHLAKU, antə da ku hamta jiri aka MTHLAKU ka aka Musa na mafarni.