Read bura-pabir Səɓəlari 15 Bible Online

Səɓəlari 15 - bura-pabir bible

Səɓəlari 15

¹Antə Musa ka mjir Israila ku hara ha ngəni aka MTHLAKU abbər, “I ata hara ha aka MTHLAKU, kamnyar tsa ku səma na ol ka duna. Taku ka mdər fəlari, tsa ku ndzəhəu ɗa akwa manda.

²MTHLAKU andər dunautə ra, tsa an kira ha arna, tsa an mbantə ra. Tsa an Hyelərna, antə I ata fwal ni, tsa an baba'na, antə I ata haptə thləmari!

³MTHLAKU an masəkur mpa, MTHLAKU an thləmari!

⁴Wagənayeri ar kuthli ka sojayeri arni tsa ku pugəu ɗa akwa manda. Sojayeri ar kuthli na carcarari ta shang, ku satə yimi akwa Manda Duwathlu.

⁵Yimi na zurang an hartə ɗa, da ləghəi akwa kira manda apa pela.

⁶Tsi mazəma ga, MTHLAKU ka kuthlikur na ol ka duna. Tsi mazəma ga, MTHLAKU ku ɓəgələmta dawayeri.

⁷Kamnyar səli tə gə kəgari ga ku ntsugəmta dawayeri ar nga. Kamnyar ɗəffa gə na akwa mba nga ga ku mbagamta ɗa apa kusar ul'ula.

⁸Atar dunar mpikər kucira ga antə yimi ku tsaptədzi. Pərtu ku thləthlata apa banggwa, kira yimi na zurang ni ku satədzi ɓəɓal apa pela ata kuta manda ni.

⁹Dawa ni pəla, I ata nu ɗa kəi ngkəi ɗa. I ata ndəkəi suayeri tə I dlutsa akəla ɗa, kəi fatə shanga su tə I akwa barari. Aghəla nda I ata kəɓəla katsakar arna kəi tsəgəi ɗa.

¹⁰Ga ku fi ɗa ka shambar ar nga, antə manda ni ku hartə ɗa, tə da ləghəi akwa yimi na ol'ola apa liya na kəgəɓu.

¹¹Madi akwa nca haptayeri ni, tə mda agira ka gə ri, MTHLAKU? Madi an ka darajar ɓɗakkurərni apa gə ri? Natə səliyirni ata athlivərantə mda na akwa hara kəthlərayeri ar ndatə mda!

¹²Ga ku haptə tsi mazəma ga, antə di ku ndasəmnya dawayeri ar yeru.

¹³Kamnyar hirkur nga na ana palidzi wa, antə ga ku pwar mjir nga natə ga ku pəli ɗa. Ka duna ga antə ga ku pwar ɗa, ka mwantə ɗa akwa vəi ndzəndziyir nga na ɓɗakkarkara.

¹⁴Durayeri damwa ku nggatə ka yakata, tə thlivər na ola ku ngkəi mjir Filistiya.

¹⁵Kuthlyayeri ar Edom ku thlivəra, mji ol'olər Mowab ku yakatə ka duna, mjir Kanana ku thlivər ka thləvamtadzi.

¹⁶Thlivər ka yakata ku pungkərdzi ala ɗa, kamnyar olkur dunar tsiya ga, antə da ku dləɓ səri apa pela, tar tə mjir nga, MTHLAKU ku təramta, tə mjir nga natə ga ku pəli ɗa ku təramta.

¹⁷Ga akwa səntə ɗa kara nci ɗa ata kəra gar na ar nga, vəi tə gə na MTHLAKU ku namtə ni vəi ndzəndziyir nga, Vəi na Ɓɗakkarkara, MTHLAKU natə ga ku namtə ka tsiya ga.

¹⁸MTHLAKU ata hara kuthlikur har ba saka madi.”

¹⁹Sakatə takwayeri ar kuthli, ka wagənayeri, ka mjir fəl takwayeri ku ləkwa manda, antə MTHLAKU ku ngka ka yimər manda ni ata kəra ɗa ka hartə ɗa. Amma ar mjir Israila da ku təramta akwa manda ni ata di ul'ula.

²⁰Antə Maryamu na naɓi mwala, ngkwarma' Haruna, ku kətə kəcaikəcai akwa tsiyari. Antə shanga mwanki ku səɓəla ka kəcaikəcai akwa tsiya ɗa akwa nu ni ka ɓathla.

²¹Maryamu akwa psə ala ɗa ha abbər, “Hara giri ha aka MTHLAKU, Kamnyar tsa ku səmi na ol ka duna. Tsa ku ndzəhəu taku ka mdər fəlari akwa manda.”

²²Antə Musa ku fatə mjir Israila ka təra ka da kazhar Manda Duwathlu, ka mwantə ɗa akwa mtakər Shur. Antə da mwa mnyar vir makər akwa kuta mtaku kula da wutə yimi.

²³Sakatə da mzhitə Mara, antə da ku wutə yimi. Amma da aɗi mzhi sa yimər vəi ni wa kamnyar ɗəɗahkurari. An su na hara tə mda ana kəga thləma vəi ni Mara ni.

²⁴Antə mji baɗitə nggungguni aka Musa ka pəla, “Man tə yeru ata sa ri?”

²⁵Antə Musa ku tuwa ka kuraku akwa kiɗə MTHLAKU antə tsa ku ncanta alari udzəm laga. Antə Musa ku ɓəli udzəm ni ka ndzəhəuwa akwa yimi ni, antə yimi ni ku ndzi msəra. Azi antə MTHLAKU ku vəi ala ɗa tsawu natə ka da ɓəla akwa ndzəndziyir ɗa, tsuwa anda antə tsa ku ngkərtə ɗa.

²⁶Antə MTHLAKU pəla, “Ma giri ata psi thləm ali, I na MTHLAKU na Hyelər giri, ka hara su na kalkal ata nci, ma giri ku vədzə hangkala giri aka tsawayeri arna, ka ɓəlatə ɗa, I aɗi ata sənta ala giri shilkayeri natə I ku pungkər aka mjir Masar ni wa. Kamnyar I an MTHLAKU na ana mbantə giri.”

²⁷Aghəla nda antə da mwari ahar Elim akwa vəi tə kucirkilayeri aɗi vəyari kumnya suɗa, ka nfur dipənau murfəkumari. Antə da ku fəli anda adzə yimi ni.