Read bura-pabir Səɓəlari 16 Bible Online

Səɓəlari 16 - bura-pabir bible

Səɓəlari 16

¹Antə shanga mjir Israila ku zhar Elim ka mwari akwa Mtakər Sin na akwa daɓwa Elim ka Sinai, akwa vir na kumnya ntəfkur ar thliya na suɗa, aghəla səɓəlar ɗa kazhar tsəɗi Masar.

²Antə akwa mtaku ni shanga mjir Israila ku ləkwa nggungguni aka Musa ka Haruna

³abbər, “Ai kuji ka yeru mtəmtadzi akwa tsiya MTHLAKU tsu akwa Masar! Kamnyar sakatə yeru anda yeru ana ndzəndzi adzə tughumayeri ar kum, ka yeru səm har ka kuta yeru ndla. Amma ga ku səntə yeru aɓəla akwa mtaku kamnyar ka gə kurəmta mji ngəni shang ka mi.”

⁴Antə MTHLAKU pəla aka Musa, “Kulini I ata pughəi ala giri buradi. Antə ka mji ni ləɓəla tədək viri na ata kura ka da ra tsaptə susəma na ata mzhi ɗa vir nda. Akwa laku ngəni antə I ata ngkərtə ɗa kəi wutə wala nuhum da ata nu tsawurna.

⁵Akwa vir na ngkwakur, ma sakatə da akwa tsaɓə susəm ni, ka da tsaptə natə hangkurari ata mzhi vir suɗa.”

⁶Antə Musa ka Haruna kəga shanga mjir Israila ka pəla ala ɗa, “Tsu akwa tahaku ngəni antə giri ata sə sənda abbər MTHLAKU an fwaɓəla giri akwa tsəɗi Masar.

⁷Ma ɗəɗəpa giri ata wutə parakər səliyir MTHLAKU, kamnyar tsa ku nggatə nggungguniyir giri ata kərari ni. Nənga yeru mə laga ri tə har tə giri ata nggungguni ata kəra yeru?”

⁸Tsuwa Musa pəla, “MTHLAKU ata na giri kum ashina tahaku ka giri ɓɗa, tsuwa ta ata na susəma ɗəɗəpa ka giri səm ka kuta giri ndla, təng tə tsa ku nggatə nggungguni tə giri hara ata kərari ni. Kamnyar ai giri aɗi nggungguni ni ata kəra yeru wa. Yeru mə laga ri? Ata kəra MTHLAKU antə giri nggungguni ni!”

⁹Antə Musa pəla aka Haruna, “Pəla aka shanga mjir Israila, ‘Shahə girdzi azi akəma MTHLAKU, kamnyar tsa ku nggatə nggungguniyir ɗa.’ ”

¹⁰Sakatə Haruna akwa gari aka shanga mjir Israila, antə da shinardzi ka wul su atar mtaku, təng nggədza parakər səliyir MTHLAKU akwa dlamba.

¹¹Antə MTHLAKU pəla aka Musa,

¹²“I ku nggatə nggungguniyir mjir Israila. Antə kulini pəla ala ɗa abbər, ‘Ma tahaku giri ata ɓɗə kum, antə ma ɗəɗəpa giri ata ndlantə kuta giri ka susəma. Antə giri ata sənda abbər I an MTHLAKU na Hyelər giri.’ ”

¹³Tahaku, təng takulashayeri laga hang səɓəla ka hartə vəi tə mjir Israila fəli akwa ni. Ɗəɗəpa tsuwa təng kəlangkəu ku kalaktə vəi fəliyir ɗa ni.

¹⁴Sakatə kəlangkəu ni ku ɓumtadzi, təng nggədza su laga mwapmwapu shalaku ata di akwa mtaku.

¹⁵Sakatə mjir Israila wuta, antə da pəla aka nvwa ɗa abbər, “Manna?” Watau “Ngəni mə ri?” Kamnyar da aɗi səndə suari wa. Antə Musa pəla ala ɗa, “Ngəni an susəma natə MTHLAKU hamta ala giri ka giri səma.

¹⁶Nggədza su tə MTHLAKU tsawa ala giri, ‘Ka kəlara mda akwa nca giri tsaptə susəm ni kalkal apatə tsa ata mzhi kwasəmnyari, kəlara mda tasa suɗsuɗa. Antə ka waskəi tsaptə kalkal ka hangkur mjir kutakəyirni.’ ”

¹⁷Antə mjir Israila ku hara tsu apatə mdə pəla ala ɗa, mji laga tsaptə hang, mji laga tsaptə raka.

¹⁸Sakatə da ngkərtə ka tasa, mdə na ku tsaptə hang aɗi ndzi kəgari hang kamtə wa, tsuwa mdə na ku tsaptə raka aɗiya hara raka kamtə wa. Waskəi ku tsaptə kalkal ka turərni.

¹⁹Tsuwa Musa pəla ala ɗa, “Mda aɗiya səm su ka mbilari kamnyar ɗəpa wa.”

²⁰Amma mji laga akwa nca ɗa aɗi psi thləm aka Musa wa, da ku mbilari tə viri kura. Antə su ni ku ya kulamnya, ka ləkwa shiwura. Antə ɗəffa Musa ɓzi adzə ɗa.

²¹Antə parang ɗəɗəp ɗəɗəpa kəlara mda ana ra tsaptə susəma kalkal ka na ata mzhi səmərni. Ma sakatə pci ku hara bwarbwar su na ku mbiləmta ata di ana juwamtadzi.

²²Akwa vir na ngkwakur, təng hangkur manna na ata di ni ndzi hangta ar virayeri na təramta ni ka bwa suɗa. Antə waskəi tsaptə tasa nfwar nfwar ata vəya tasa suɗsuɗa. Antə mji na ol'ola ata kəra mji ni ku mwari adzə Musa ka jikata alari su na hara.

²³Antə tsa shinau ala ɗa abbər, “Nggədza su tə MTHLAKU tsawa, ‘Ɗəpa an vir na ola ar ghərəmtaghəra, Vir Ghərəmtaghəra ar tsikəra sati natə mdə vəi kamnyar vəngkər səli aka MTHLAKU. Antə ka giri ɓwata su tə giri akwa bara ɓwari, ka ti su tə giri akwa bara tari. Antə kəlara su tə giri ku səma ashina ka mbilari, ka giri vəi ni kamnyar ɗəpa.’ ”

²⁴Antə su tə mji ni ku səm ka mbilari, da ku vəi har tə vir kura, susəm ni aɗi ɓzi wa, tsuwa kulamnya aɗi ya akwa wa.

²⁵Musa pəla, “Ngəni an susəma tə giri ata səmari ashina, kamnyar ashina an Vir Ghərəmtaghəra ar tsikəra sati, natə mdə vəi kamnyar vəngkər səli aka MTHLAKU. Apani giri aɗi ata wutə susəma aɓəla ashina wa.

²⁶Giri ata tsaptə susəmər giri akwa kuta vir na ngkwa ni, amma vir na murfəkur natə tsa an Vir Ghərəmtaghəra ar sati, su aɗi na ata ndzi anda wa.”

²⁷Amma wala apani akwa vir na murfəkur ni mji laga ku ləɓəla kamnyar tsaɓə susəma, amma su aɗi tə da wutə wa.

²⁸Aghəla nda antə MTHLAKU pəla aka Musa abbər, “Nawa antə giri ata sə zhar nggəlar tsawurna ka surthlipərna nə ri?

²⁹Ka giri ɗangta abbər I na MTHLAKU ku na ala giri Ghərəmtaghəra. An su na hara tə I hamta ala giri susəma ar vir suɗa akwa vir na ngkwakur ni. Apani ma Vir Ghərəmtaghəra, ka waskəi ndzəndzi akwa vəi tə tsa ata, mda aɗiya ləɓəla wa.”

³⁰Antə mjir Israila ku ghərɓəlaghəra akwa vir na murfəkur ni.

³¹Antə mjir Israila ku vətə thləm aka susəm ngəni abbər manna. Manna ni an jili su laga apa munya meyeli mwapu, msərakurərni tsuwa an apa biskitu tə mdə nam ka cirməma.

³²Antə Musa pəla, “MTHLAKU ku tsawa ala giri abbər ka giri vəi tasa suɗa ar manna adzə giri akwa shanga zamanayeri, kamnyar ka kəkayeri ar giri sə wutə jili susəma tə MTHLAKU hamta ala giri akwa mtaku, sakatə tsa fwaɓəla giri akwa tsəɗi Masar.”

³³Antə Musa pəla aka Haruna, “Kətə tughum kara pu tasa suɗa ar manna akwa, ka mdə ra vəyari akəma MTHLAKU kamnyar ka tsa ndzi sur ɗangtə har ka vədza aka kurər zamanayeri.”

³⁴Antə Haruna ku nu su tə MTHLAKU ku tsawa aka Musa. Tsa mwari ka vəi manna ni akəma Akwati Alkawal kamnyar ta su atsəkwari ka ɓzamta.

³⁵Antə mjir Israila ku hara məva nfwarkumari akwa kwasə manna, tar sakatə da ku mzhitə tsəɗi tə mda ata mzhi ndzi akwa, akwa kəla tsəɗi Kanana.

³⁶Mda ana kəga tasa suɗa akwa mnyar mjir Ibrani abbər Omer.