Read bura-pabir Səɓəlari 17 Bible Online

Səɓəlari 17 - bura-pabir bible

Səɓəlari 17

¹Shanga mjir Israila ku thlatə kazhar Mtakər Sin, ka ləkwa mwa ka fəli ata laku ata kər ata kər apatə MTHLAKU ku tsawa ala ɗa. Akwa tsikərari da ku sə mzhitə Refidim ka fəli anda, amma yimi aɗi tə ka mji sa anda wa.

²Antə da nggungguni aka Musa ka pəla, “Na ala yeru yimi ka yeru sa.” Antə Musa shinau ala ɗa abbər, “Kamnyar mi tə giri akwa jikamnya ata kəri ri? Kamnyar mi tə giri akwa ngkərtə MTHLAKU ri?”

³Amma kamnyar tə thləli akwa kətə mji ni, da ku ləkəma ka nggungguni aka Musa ka pəla, “Kamnyar mi tə gə fwaɓəla yeru akwa Masar kamnyar ka gə kurəmta yeru, kəga maɗa' yeru, kəga mwaɓiyayeri ar yeru ka thləli ri?”

⁴Antə Musa tuwa aka MTHLAKU abbər, “Man su tə kəi hara aka mji ngəni nə ri? Kamnyar da ku ɗəmhədzi ka da ndzəndzəhtə ra ka pela.”

⁵Antə MTHLAKU pəla aka Musa, “Kətə zwal natə gə tsa yimər Nayil kəgari ni, kara fatə mji laga na ol'ola akwa nca mjir Israila, ka gə pwa akəma ɗa ka giri təra.

⁶I ata mwari kəi thləthlata akəma giri adzə gagəma na ata Gar Horeb ni. Ga ata tsa gagəma ni, antə yimi ata səɓəla akwa gagəma ni ka mji sa.” Antə Musa ku hara tsu apa nda ata nca mji ol'olər Israila.

⁷Antə Musa ku kəga thləma vəi ni, Massa watau vəi ngkərtədzi, ka Meriba watau vəi beɗi, kamnyar tə mjir Israila ku jikamnya aka Musa ka ngkərtə MTHLAKU abbər, “MTHLAKU adzə mburu jiri nənga, tsa aɗi adzə mburu wa ri?”

⁸Vir laga mjir Amalek ku si ka dlər mjir Israila ahar Refidim.

⁹Antə Musa pəla aka Joshuwa, “Mwari, ka gə carɓəla ala mburu mji na ata sə ləɓəla ra dlər mjir Amalek ɗəpa. Arna I ata mwari kəi thləthlata ata kəra gar ni, ka zwal natə Hyel pəla ali kəi kətə ni akwa tsi.”

¹⁰Antə Joshuwa ku hara tsu apatə Musa pəla alari, tə da ku mpa kəga mjir Amalek. Antə Musa, ka Haruna, ka Hur ku lətə kəra gar ni.

¹¹Antə kəlara sakatə Musa ku haptə tsiyari amta, mjir Israila ata ləkəma ka səm mpa ni, amma ma tsa ku kəlghəi tsiyari, təkəma mjir Amalek ni ata ləkəma ka səm mpa ni.

¹²Amma tsiya Musa ku sə ghəri ka duna. Antə Haruna ka Hur ku paktə pela, ka si ka hangkir alari, antə tsa ndzəndzi ata. Antə Haruna ka Hur ku thləthlata athlimbəlari, mdə pal abwa matsəkar mdə pal abwa mazəmari akwa kathla alari tsiyari amta har tə pci təri.

¹³Apani antə Joshuwa ka sojayeri arni ku kurəmta mjir Amalek ka katsakar.

¹⁴Antə MTHLAKU pəla aka Musa, “Rəbutə labar ngəni akwa kakaɗu kamnyar ka tsa ndzi sur ɗangta. Tsuwa ka mdə pəla aka Joshuwa ata kəra alkawal tə I kəta abbər I ata kurəmta mjir Amalek karkar kazhar kəra duniya ni.”

¹⁵Antə Musa ku həntə bagaɗi ata vəi ndaga, ka kəga thləmari vəi ni abbər “MTHLAKU an alam arna.”

¹⁶Antə Musa pəla, “Haptə gir alamər MTHLAKU amta! MTHLAKU ata ləkəma ka mpa mjir Amalek akwa shanga zamanayeri.”