Read bura-pabir Səɓəlari 19 Bible Online

Səɓəlari 19 - bura-pabir bible

Səɓəlari 19

¹Mjir Israila ku zhar Refidim. Da ku hara thliya suɗa cur ka zharər ɗa Masar kambəla da mzhitə Mtakər Sinai akwa vir na ntangkur ar thliya na makərkur. Antə da ku latə səva ata kusar Gar Sinai ni ka fəli anda.

³Antə Musa ku ndləɓəla gar ni kamnyar ka da kəɓa ka Hyel. Antə MTHLAKU ku kəga ni akwa gar ni abbər, “Pəla aka mjir kutakəyir Yakub, watau aka mjir Israila abbər,

⁴‘Giri ku wutə su tə I na MTHLAKU ku hara aka mjir Masar, ka laku tə I ka kəri surna fatə giri ka səntə giri akwa apatə duku ana fatə maɗa'ni akwa ɓəɓəkari.

⁵Antə kulini, ma giri ata kələngkər ali, ka kəsi alkawal na akwa daɓwa mburu kəga giri, giri ata ndzi mjirna. Jiri shanga mjir duniya ni arna, amma ar giri, giri ata ndzi apa maɗa' kuti.

⁶Antə giri ata ndzi ali mji na ka kuthlikur ar pristkur, ka dur na carcarari ar Hyel.’ Ngəni an suayeri tə ga ata pəla aka mjir Israila.”

⁷Antə Musa ku si ka kəga mji ol'ola ata kəma duku ka jikata ala ɗa shanga su tə MTHLAKU ku tsawa alari ka pəla.

⁸Antə shanga mji ku shinau alari ata kəma duku abbər, “Yeru ata hara kəlara su tə MTHLAKU ku pəla.” Aghəla nda antə Musa ku ngka ka jikatə labar ni aka MTHLAKU.

⁹Antə MTHLAKU pəla aka Musa, “I ata si adzə nga akwa dlamba na mənggəl, kamnyar ka mji nggatə kurakəi sakatə I akwa gari ka ga, antə apani da mbərsa ka ga ba saka madi.” Antə Musa ngka ka jikatə su tə mji pəla ni aka MTHLAKU.

¹⁰Antə MTHLAKU pəla aka Musa, “Jaktə mwari adzə mji ni, ka gə wuta abbər da ku ndzi kəcəkəcari ashina ka ɗəpa, tsuwa ka da kəcimta ləptayeri arɗa.

¹¹Ka gə wuta abbər da ku ndzi ɗəmhəɗəmhari akwa vir na makərkur, kamnyar vir nda antə I MTHLAKU ata sə səghəi ata kəra Gar Sinai ata nca shanga mji.

¹²Ka gə ntəhəi layi na ata kalaktə gar ni natə mji ni aɗi ata fəlɓəlari ka mwari adzə gar ni wa. Ka gə pəla ala ɗa abbər, ‘Ka giri hara hangkal, giri aɗiya hir ka mda akwa nca giri lətə gar ni wa, wala tsəkwar kusar gar ni wa. Kamnyar kəlara mdə na ku tsəkwari, mda ata tsi ni.

¹³Mda ata ndzəndzəhtə ni ka pela wala shishitə ni ka afa, tsiya mda aɗi ata tsəkwar dzari wa. Wala an mda wala an mwaɓi, mda aɗi ata zhar ni ka mpikə wa.’ Ma sakatə mdə ku mbur təmbəl ka kuraku na saɓəl, antə mji ata mwari ka da tsaptədzi adzə gar ni.”

¹⁴Antə Musa ku səghəi kazhar kər gar ni, ka mwari adzə mji ni kamnyar ka tsa wuta abbər da ku ndzi kəcəkəcari, antə da kəcimta ləptayeri arɗa tsuwa.

¹⁵Antə Musa pəla ala ɗa, “Ka giri ndzi ɗəmhəɗəmhari kamnyar vir na makərkur, giri aɗiya pi ka mwala wa.”

¹⁶Akwa ɗəɗəpər vir na makərkur ni, antə hyel ku ləkwa dləra kəga wurka, antə dlamba laga mənggəl thlərətu ku hartə gar ni. Antə mdə ku mbur təmbəl na ka kuraku na ola, har tə shanga mji na akwa vəi fəli nda ku nggatə ka ləkwa kədza kamnyar thlivəra.

¹⁷Antə Musa fwaɓəla mji kazhar vəi ndzəndziyir ɗa, ka pwar ɗa ka da ra kəɓa kəga Hyel. Antə da ku mwari ka thlata adzə kusar gar ni.

¹⁸Antə Gar Sinai ni ku hartədzi ka ɗer kamnyar tə MTHLAKU na kalakkalakari ka u'u ku səghəi ata kəra gar ni. Antə ɗer na akwa səɓəla akwa kər gar ni ku ləmta tur apa u'ur vəi thləl tughum, har tə gar ni ku kənggərtədzi ka duna.

¹⁹Sakatə kuraka təmbəl ni ku vərvər hara ola, antə Musa ku gari tə MTHLAKU ku shinau alari atar dlərər hyel.

²⁰Antə MTHLAKU ku səghəi ata kəra Gar Sinai, antə tsa kəga Musa ka tsa ra wutə ni amta akwa kəra gar ni. Antə Musa ku ndləɓəla.

²¹Antə MTHLAKU pəla aka Musa, “Ləghəi ka gə tsaktə mji ni abbər da aɗiya ndurɓəla kəl ni kamnyar ka da wutə MTHLAKU wa, kamnyar ma da ku hara apani, mji hang akwa nca ɗa ata mta.

²²Tsuwa wala pristayeri na ana si akəma MTHLAKU, dwali ka da kəcimta kər ɗa, ma apani wa I ata ɗi ɗa.”

²³Antə Musa pəla aka MTHLAKU, “Mji ngəni amzhi ndləɓəla Gar Sinai wa, kamnyar gə ka kəra ga an tsaktə ɗa abbər da aɗiya ndlə wa. Ga an pəla ali kəi vəi kəl na ata kalaktə gar ni kamnyar ka gar ni ndzi vəi na kəcəkəcari.”

²⁴Antə MTHLAKU pəla aka Musa, “To, ləghəi, ka gə pəla aka Haruna ka giri si ka tsa. Amma ga aɗiya hir ka pristayeri kəga mji ni ndurɓəla kəl ni kamnyar si adzə ra wa, ta I asə ɗi ɗa.”

²⁵Antə Musa ku ləghəi ka mwari adzə mji ni ka pəla ala ɗa su tə MTHLAKU pəla.