Read bura-pabir Səɓəlari 22 Bible Online

Səɓəlari 22 - bura-pabir bible

Səɓəlari 22

¹“Ma mda həltə gyal wala təma ka thlamta wulyari wala ɗələmta ni, tsa ata ntəmta thla ntəfu ata vəya gyal pal, wala təma nfwar ata vəya təma pal.

²Ma mdə ku ngkəi həl laga akwa ɓəl mbwa aviri, antə mdə ku dəkə ni har tə tsa ku mti, to, mdə na tsi ni ni aɗi ka biku wa.

³Amma ma su ni hara sakatə pci ku səɓəla, antə mdə na tsi ni ni ata ndzi ka biku.” “Ma həl natə mdə ku ngkəi ni ka su tə tsa həltə ni akəlari, ata ndzi dwali alari ka tsa hamta shanga su tə mdə ku thlamta alari. Antə ma həl ni aɗi ka su wa, mda ata ɗələmta ni kamnyar ntəmta su tə tsa həltə ni.

⁴Ma mdə ku wutə mwaɓi tə tsa həltə ni tsu akəlari ka mpika, wala an thla, wala kwara, wala təma, ata ndzi dwali ka həl ni ntəmta mwaɓi suɗa ata vəya mwaɓi pal.”

⁵“Ma mdə laga ku ra ɓəla mwaɓiyayeri arni akwa vəi laga wala akwa fakər anap, antə tsa zhar mwaɓiyayeri ni har tə da ləkwa vəi mdə damwa wala akwa fakər anap ar mdə damwa, ata ndzi dwali aka mthlakər mwaɓi ni ka tsa kətə sur fakəu na ɓɗakta shang akwa fakərni, ka tsa ntəmta sur fakər mdə ndaga kəgari.”

⁶“Ma mda akwa mba fakərni, antə u'u ni msər ka ləkwa fakər mdə damwa ka mbamta mthli na tsu ata hyel akwa fakə ni, wala mthli tə tsa thli ka tsapta, wala fakə ni swakti, to, mdə na ha u'u ni ata ntəmta shanga su tə mdə thlangkər alari.”

⁷“Ma mdə laga ku ra vəi kwabarni wala kariyirni adzə ntəwulərni antə mdə mwari ka həlta aviyarngkiɗa. Ma mdə ku ngkəi həl ni, tsa ata ntəmtari hangkur su ni vəyari suɗa.

⁸Amma ma mda aɗi ngkəi həl ni wa, antə tar ka mdə səntə mthlakər kəi ni akəma Hyel, kamnyar ka mdə sənda abbər tsiyari aɗi akwa su na sha ni wa.”

⁹“Ma sur beɗi ku ləkwa daɓwa mji suɗa ata kəra su tə mda aɗi nggaɓəla mthlakari wa, wala ata kəra thla, wala kwara, wala təma, wala ləptu, wala suayeri damwa na ku sha, antə mji ngəni suɗə ni ata si akəma Hyel. Antə mdə tə Hyel ku ncaɓəla abbər tsa an ka biku ni, tsa ata ntəmta hangkurər su ni vəyari suɗa aka nvwa ni.”

¹⁰“Ma mdə laga ku hamta kwara, wala thla, wala təma, wala mwaɓi damwa aka ntəwulərni ka tsa kəsi alari, antə ma mwaɓi ni ku mti, wala dəkəidzi, wala sha, tsuwa mda aɗi wutə wa,

¹¹antə tar ka da kahyel akəma MTHLAKU na ata ncaɓəla abbər tsiya mdə ni aɗi akwa su na wutə mwaɓiyir ntəwulərni ni wa, an ata ndəkəmta daɓwa ɗa. Antə Mthlakər mwaɓi ni ata kələngkər aka kahyel tə tsa hara ni, antə apani mda aɗi ata ntə su wa.

¹²Amma ma həla an həlta mwaɓi ni, antə dwali ka mdə na həl ni ntəmta aka Mthlakər mwaɓi ni.

¹³Tsuwa ma mwaɓi mtaku an ngkəi ka tsi, mdə natə mwaɓi ni sha akwa tsiyari ata səntə mshiyari kamnyar ka tsa ndzi seɗa. Tsuwa mda aɗi ata ntə su tə mwaɓiyir mtaku an tsi wa.”

¹⁴“Ma mdə laga ku təpatə mwaɓiyir ntəwulərni, antə mwaɓi ni dəkəidzi wala mta sakatə mthlakari aɗi ata vəi ni wa, tsa ata ntəmta mwaɓi ni.

¹⁵“Amma sakatə mwaɓi ni dəkəidzi wala mta sakatə mthlakari ata vəi ni, mdə na dlu ni aɗi ata ntari wa. Ma tsa an fatə mwaɓi ni, tsa ata ntəmta kwabar haya ni daci.”

¹⁶“Ma mdə laga ku ndəkərtə hangkala ɓzərngkwa na aɗi səndə sal wa ka pi ka tsa, dwali ka tsa ntəmta sur kəla, ka ngkwa ni ndzi mwalankiɗa.

¹⁷Amma ma baba' ngkwa ni aɗi hir ka da kəldzi wa, mdə ni ata ntəmta sur kəl ni kalkal apatə mdə thlamta kamnyar ngkwa na aɗi səndə sal wa.”

¹⁸“Mda aɗiya zhar mwala hakdzi ka mpikə wa.”

¹⁹“Kəlara mdə na ku pi ka mwaɓi, dwali ka mdə tsi ni.”

²⁰“Kəlara mdə na ku hamta saɗaka aka hyel damwa, na aɗi MTHLAKU wa, mda ata tsi ni.”

²¹“Ga aɗiya hara bwani wala zambatə mətəpi wa, kamnyar gə ka kər nga ku ndzi mətəpi sakanda akwa tsəɗi Masar.”

²²“Ga aɗiya səm mdəkur mwala kughung wala ɓzər muta wa.

²³Ma ga ku səm mdəkurər ɗa, antə da ku tuwa kamnyar kəi dlar ɗa, jiri I ata nggatə tuwar ɗa.

²⁴Antə hangkali ata thlatə kəi tsəgəi giri akwa mpa ka katsakar. Apani mwankir giri ata ndzi kughung, antə maɗa' giri ata ndzi muta kula mjir ya.”

²⁵“Ma ga ku hamta təpar kwaba aka mdə laga akwa nca mjirna na kula su akwa nca giri, ga aɗiya ndzi alari apa mdər nu ni təmbəl wa, wala bara yimi ata kəra kwaba tə giri təpata alari wa.

²⁶Ma ga ku dlu ləptər ntəwulər nga ka kəsi ata vəya təpa, ata hara ɓɗaku ka gə ngka alari ka surni akəmata pci atəri,

²⁷kamnyar ləptərni ni an kura su tə tsa ata pudzari. Ma ga aɗi nar alari wa, man su tə tsa ata heni akwa ri? Antə ma sakatə tsa ku tuwa ali, I ata nggatə ni, kamnyar I ana kətadzə mda.”

²⁸“Ga aɗiya nggəl Hyel wa, wala nggəl mdə na ka kuthlikur ata kəra mjir ngə wa.”

²⁹“Ga aɗiya ndəkər saka akwa hamta zaka ar mthli wala ar yimər anap wa.” “Ka gə hamta ali yarakəmar nga na maɗashili.

³⁰Tsu apani tsuwa ga ata hamta ali yarakəmar thlar nga, ka ar təmar nga. Ga ata zhar yarakəma ni ata kəma duku ka mama'ni mnyar vir murfa, amma akwa vir na nciskur ga ata hamta ni ali.”

³¹“Giri ata ndzi ali mji na kəcəkəcari. Antə apani giri aɗiya ɓɗə kumər mwaɓi tə mwaɓiyir mtaku an tsi ni wa, ka giri psəmta ni aka kilayeri.”