Read bura-pabir Səɓəlari 23 Bible Online

Səɓəlari 23 - bura-pabir bible

Səɓəlari 23

¹“Ga aɗiya titil labar na thlandər wa. Ga aɗiya paktə kər ka mdə na ɗimi akwa ndzi seɗar ɗimikur wa.

²Ga aɗiya nu mjir hara ɗimikur kamnyar tə mji hang akwa harari wa. Ma mdə ku kəga nga ka gə ndzi seɗa akwa shariya, ga aɗiya ndzi seɗar thlandəra ka mdə ndwali jirkur wa.

³Ga aɗiya ncantə zumzumkur aka mdər bwani akwa shariya wa.”

⁴“Ma ga ku karəngkər aka thla wala kwarar dawar nga na ku sha, ngkəi ni ka gə mwanta alari.

⁵Ma ga ku wutə kwarar dawar nga ku ndla akwa ɗar bwani akira kəl na kəgəɓu, ga aɗiya təra kazhar ni wa, ka gə dlar ni ka giri thlenta alari kwara ni.”

⁶“Ga aɗiya ndwaləmta jirkur na ar mdər bwani akwa shariya wa.

⁷Ka gə ndzi ciju ka thlandər ata kəra mda akwa shariya, tsuwa ga aɗiya tsi mdər jirkur, wala mdə na kula biku wa, kamnyar I aɗi ata zhar ka mdə na ɗimi təra kula mdə ɗi ni wa.

⁸Ga aɗiya dlu liyar dzəɓ mnya wa, kamnyar liyar dzəɓ mnya ana hartə nca mjir wul jirkur, tsuwa ka ndwaləmta jirkurər mji na ka jirkur”

⁹“Ga aɗiya hara bwani aka mətəpi wa, giri ka kəra giri ku səndə su na akwa mətəpikur, kamnyar giri ku ndzi mətəpi akwa Masar.”

¹⁰“Ga ata thləkatə fakər nga ka thli ampaniyari mnyar məva ngkwa.

¹¹Amma akwa məva na murfəkur, ka giri zhar fakə ni ka tsa ghərəmtaghəra, mda aɗiya kukul wa, tsuwa mda aɗiya thləka wa. Apani antə mjir bwani na akwa nca giri ata wutə susəmər ɗa ata. Tsuwa su na ku mbiləmta, ka mwaɓiyayeri ar mtaku səməmnya. Ka giri hara tsu apani aka fakər anap ka fakər nfur zaitun ar giri.”

¹²“Ga ata hara kəthlərər nga mnyar vir ngkwa, amma akwa vir na murfəkur ga ata ghərəmtaghəra, kamnyar ka thlar tsuhwa ar nga kəga kwarar nga ghərɓəla ghəra tsuwa. Tsuwa kamnyar ka mafayeri tə mdə yaɓəla akwa kutakəyir nga, kəga mətəpiyayeri na akwa nca giri ghərəmtaghəra.”

¹³“Ka giri vədzə hangkala giri aka kəlara su tə I na Hyel pəla ala giri. Giri aɗiya kamnya thləma haptayeri wa, mda aɗiya nggatə thləma ɗa akwa mnya giri wa.”

¹⁴“Giri ata hara ali kucali na ol'ola ka makər ali akwa məva.

¹⁵Giri ata ɓəlatə Vir Kucalər Buradi na kula yist. Antə tsu apatə I tsawa ala giri, giri ata kwasə buradi na kula yist mnyar vir murfa, akwa sakatə I thlamta ala giri akwa thliyar Abib, thliya tə giri səɓəla akwa Masar.” “Tsuwa mda aɗiya si akəmi ka tsiyari shwang kula su akwa wa.”

¹⁶“Ka giri hara kucalər sur fəi sur fakər giri na ng'ha ntangkəma akwa fakər giri.” “Ka giri hara kucalər tsikəra fəi sur fakayeri ar giri akwa kurər məva, sakatə giri ku kuri tsaptə sur fakər giri.

¹⁷Ka kəlara mdə sal na akwa Israila si akəmi, I na MTHLAKU na ka Duna ta Shang ka makər akwa kəlara məva.”

¹⁸“Ga aɗiya hamta ali saɗakar mamshi ata kəma duku ka su laga na ka yist akwa wa. Tsuwa mda aɗiya zhar malkum ar mwaɓiyir saɗakar vir kucali ni ka tsa pi har ka vir kur alari wa.”

¹⁹“Tədəku məva ka gə səntə yarakəmar sur fakər nga na ɓɗakta shang akwa mbwar MTHLAKU na Hyelər nga. Tsuwa ga aɗiya ta kumər ɓzər kwi akwa yimər uwa ar mama'ni wa.”

²⁰“Nggədza I akwa thlentə mdərthlentərna ka tsa mwa akəma ga, ka pwar nga ka tsəlpi nga ta kəlara asar laku, ka tsa mwantə nga lapiya akwa vəi tə I ɗəmha ala ga.

²¹Ka gə vəi hangkala ga, ka gə kələngkər aka su tə tsa pəla ala ga. Ga aɗiya hara kər ɓəɓalkur alari wa, kamnyar I an thlentə ni. Kamnyar tsa aɗi ata yafitə bikər kər ɓəɓalkur wa.

²²Amma ma ga ku psi thləma ga ka kələngkər aka shanga su tə I pəla, to I ata hara dawakur ka dawar nga, kəi nggəlar mjir nggəlar nga.

²³Mdərthlentərna ata mwa akəma ga, ka tsa mwantə nga akwa tsəɗiyir mjir Amor, mjir Hitti, mjir Perizzi, mjir Kanana, mjir Hivi ka Yebusi, mji tə I ata shamta ɗa karkar.

²⁴Giri aɗiya zuzuri akəma haptayeri arɗa wa, wala vəngkər səli ala ɗa wa, wala nu surharar ɗa wa. Amma ka giri shamta ɗa karkar, ka pupukthləmta shanggamayeri ni hacahaca.

²⁵Ka giri vəngkər səli ali, I na MTHLAKU na Hyelər giri daci. Antə ma giri ku hara apani, I ata vədzə barka aka susəma ka yimər giri, kəi kələmta nggawakur akwa nca giri.

²⁶Antə mwala aɗi na ata pumta hur wala ndzi kula ya akwa tsəɗiyir giri wa. I ata hara ka far giri fi.”

²⁷“Akwabə giri amzhətə vəi ni, I ata hara ka thlivər ngkəi shanga mji tə giri ata sə kəɓa. Tsuwa I ata hara ka shanga dawayeri ar giri shinamta bwakəma ɗa ka da hwi təra.

²⁸Akwabə giri amzhətə vəi ni, I ata thlentə pwasəma gali na ata kədləɓəla ala giri mjir Hivi, ka mjir Kanana, ka mjir Hitti.

²⁹Amma I aɗi ata kədləmta ɗa akwa məva duku wa, kamnyar ma I ku hara apani, tsəɗi ni ata ndzi fya, antə mwaɓi mtaku ata sə hara hang ka mula ala giri.

³⁰Antə I ata kədləɓəla ɗa raka raka har ka vədza aka sakatə giri ku hara hang tə giri ata mzhi ndzi mthlakər tsəɗi ni.

³¹I ata thlaɓəla ala giri kəla tsəɗiyir giri, baɗita adzə Manda Duwathlu har ka mzhitə mandar Filistiya, watau Manda Meditereniya, ka baɗita akwa mtaku ka mwanta adzə Thlyagha Yufiretis. Kamnyar I ata hamta mjir tsəɗi ni akwa tsiya giri, antə giri ata kədləɓəla ɗa sakatə giri akwa ləkwa tsəɗi ni.”

³²“Giri aɗiya mbwi alkawal ka da wa, wala ka haptayeri arɗa wa.

³³Giri aɗiya hir ka giri zhar mji nayeri ni ndzi akwa tsəɗiyir giri wa. Ma giri ku zhar ɗa, da ata sə vu ka giri hara biku ali. Ma giri ku vəngkər səli aka haptayeri arɗa, jiri da ata ndzi dərku ala giri.”