Read bura-pabir Səɓəlari 25 Bible Online

Səɓəlari 25 - bura-pabir bible

Səɓəlari 25

¹Antə MTHLAKU pəla aka Musa abbər,

²“Pəla aka mjir Israila ka da sənta ali sur hamta. Ga ata dlu ali sur hamta ni akəla kəlara mdə natə ɗəffari ku hir hamtari.

³Ngəni an jili sur hamta tə ga ata dluwari akəla ɗa. Ga ata dlu dinar, ka adzərfa, ka əmza,

⁴ka puwar nduɓwa na kalar lipəla, ka na yar ndləngi həng'ha, ka na mamza, ka lilin na ɓɗaku, ka shishir kwi,

⁵ka kəsəm gamayeri tə mdə putə mamza, ka kəsəmayeri na ɓɗakɓɗaku, ka udzəm akashiya,

⁶ka mal zaitun kamnyar pitəla, ka sur shiwura kamnyar malər hamta mda aka Hyel, ka kamnyar tulari ɗuza ar mba na msəra,

⁷ka pela oniks, ka pelayeri damwa ar dəɓa tə mda ana puta ata efod ka zhaɓər dlipwayeri ar kərathlu.

⁸Antə ka gə vu mjir Israila ka da namta ali vəi ndzəndzi na ɓɗakkarkara kamnyar kəi ndzəndzi akwa nca ɗa.

⁹Ka gə pəla ala ɗa ka da namta ali vəi ni ka shanga kariyir kutambwa ni ndzi kalkal apatə I ata ncanta ala ga.”

¹⁰“Ka giri namtə Akwati Alkawal ni ka udzəm akashiya. Ka saɓəlkurari ndzi dzartsi suɗa ka reta, ka baukurari ndzi dzartsi pal ka reta, ka nalkurari ndzi dzartsi pal ka reta.

¹¹Ka gə fəi dzari ka na avivi ka na aɓəlaɓəla ka dinar swakti, ka gə dəɓatə mnyari shang ka dinar.

¹²Ka gə namtə lenduwayeri nfwar aka akwati ni, ka gə dləɓdzə kəlara lenduwa pal aka səla akwati na pal pal nfwar ni, lenduwa suɗsuɗa ata kəlara thlimbəla akwati ni.

¹³Tsuwa ka giri namtə zwalayeri suɗa ka udzəm akashiya, ka hartə dza ɗa ka dinar.

¹⁴Ka giri hau kəlara zwal ni akwa kur lenduwayeri na ata thlimbəla akwati ni kamnyar kəl akwati ni.

¹⁵Ka giri zhar zwalayeri ni tsu akwa lenduwa ni, mda aɗi ata fwaɓəla wa.

¹⁶Ma sakatə mdə ku kuri nam akwati ni, ka gə pu allowayeri ar seɗar alkawal natə I ata na gə ni akwa.”

¹⁷“Ka gə namtə sur hartə mnya akwati ni ka dinar shini, ka saɓəlkurari ndzi dzartsi suɗa ka reta, ka baukurari ndzi dzartsi pal ka reta.

¹⁸Ka gə namtə kerubayeri laga suɗa ar dinar tə mdə dəkha, ka gə puta ata tenga sur har mnyari ni.

¹⁹Ga ata ɓdlədzə kerub pal ata tenga sur hartə mnya akwati ni na abwani, ka ɓdlədzə kerub na dukwari ata tengari na abwanda, ka da ndzi su duku ka sur hartə mnyari ni.

²⁰Antə ka kerubayeri ndzi ka bwakəma ɗa akwa wuldzi, ka da kəlar ɓəɓəka ɗa amta ka hamta shanggur aka sur hartə mnyari ni.

²¹Akwa akwati ni antə ga ata pu allowayeri ar seɗar alkawal tə I ata na ala gə ni, ka gə hartə ka sur hartə mnyari.

²²Azi antə I ata si ka mwa kəɓa. Tsuwa ata kəra sur hartə kəra Akwati Alkawal ni, akwa daɓwa kerubayeri na suɗə ni, antə I ata gari ka ga, kəi hamta ala gə shanga tsawayeri kamnyar mjir Israila.”

²³“Ka gə namtə tebər ka udzəm akashiya, ka saɓəlkurari ndzi dzartsi suɗa, ka baukurari ndzi dzartsi pal, ka nalkurari dzartsi pal ka reta.

²⁴Ka gə fəi dzari ka dinar shini, ka kəli tengari shang ka dinar.

²⁵Ka gə namtə udzəm na ata kalaktə tenga tebər ni, ka baukurari ndzi mandaɓar tsi pal, tsuwa ka gə citə tengari ni ka dinar.

²⁶Ka gə namtə lenduwayeri nfwar ar dinar kamnyar tebər ni, ka gə dləɓtə kəlara pal ata səla tebər ni, akwa kuɗəmayeri na nfwar ni.

²⁷Tsuwa ka lenduwayeri na kəsi zwalər kəl tebər ni ndzi kudzəhə ka dza tebər ni.

²⁸Ka gə namtə zwalayeri ni ka udzəm akashiya ka hartə dza ɗa ka dinar, ka zwalayeri ngəni antə mda ata kəl tebər ni.

²⁹Ka gə namtə parantiyayeri kəga tasayeri ar mba sur shiwura, kəga samtalayeri, kəga tasayeri ar hamta saɗakar sur sa. Ka gə namtə ɗa shang ka dinar shini.

³⁰Tsuwa ka gə putə buradi tə mdə hamta ali ni ata kəra tebər ni akəmi tədəku.”

³¹“Ka gə namtə zwalər kəsi pitəlayeri ni ka dinar shini. Ka gə namtə zwal ni, ka kira zwal ni, ka kapayeri ar pu mal tə mdə namtə ɗa akwa dludzər pukdlər nfur almon, ka gə jatə ɗa shang ata kəma duku.

³²Ka mdə namtə zwal ni ka tsa ndzi ka tsiyari pal pal ngkwa, makər ata thlimbəlari na abwani, ka tsuwa makər abwanda.

³³Ka mdə dəɓatə kəlara tsiyayerari na ngkwa ni ka kwapə makər makər na dludzi ka pukdlər nfur almon. Antə tsiyayerari na ngkwa ni ata ndzi su duku ka zwal ni apa da thləla ata tsa.

³⁴Tsuwa ka mdə putə kapayeri nfwar na dludzi ka pukdlər nfur almon ata zwalər kəsi pitəlayeri ni.

³⁵Mda ata namtə pukdla pal akwa kəlara vəi tə tsiya zwal ni ku thləla ata, watau akwa kəlara vəi tə tsiyayerari na pal pal ngkwa ni səɓəla ata zwalər kəsi pitəlayeri ni.

³⁶Antə pukdlə ni, ka tsiyari na ngkwa ni, ka zwalər kəsi pitəlayeri ni, ka mdə ɓdlətə ɗa ka dinar shini, ka da ndzi su duku.

³⁷Ka gə namtə pitəlayeri murfa kamnyar zwalər kəsi pitəlayeri ni, ka gə putə ɗa kamnyar ka da hamta parakəu təbwakəma.

³⁸Ka gə namtə məksayeri ka parantiyayeri ar dinar shini.

³⁹Ga ata namtə zwalər kəsi pitəlayeri ni ka shanga suayeri na ata dzari ni ka dinar ar talent pal.

⁴⁰Antə ka gə wuta abbər ga ku namtə shanga su akwa dludzər su tə mdə ncanta ala ga ata kəra gar nda.”