Read bura-pabir Səɓəlari 26 Bible Online

Səɓəlari 26 - bura-pabir bible

Səɓəlari 26

¹“Ata kəra tent tə ka mdə lata aka MTHLAKU ni, ka gə namtə kuta tent ni ka lapəliyayeri kuma tə mdə hara puwar nggira ar lilin na ɓɗaku, ka puwar nduɓwa na dludzi ka kalar lipəla, ka yar ndləngi həng'ha, ka puwa na ka yimari mamza pitu. Ka gə ɗahətə lapəliyayeri ni ɓɗak laga ka dludzər kerubayeri.

²Kəlara lapəli ni ka olkurər ɗa ndzi shang kalkal, ka saɓəlkurari ndzi dzartsi sərkumari ka ncisu, ka baukurari ndzi dzartsi nfwar.

³Ka gə paktə lapəli ntəfu ka nduɓta ɗa ata kəma duku, ka gə hara aka na mbil ntəfu ni tsu apa ni.

⁴Ka gə nduɓtə səwur lapəliyayeri ni japu ka zhaɓi na dludzi ka yimər zarkina.

⁵Ka gə nduɓtə ata mnya kəlara lapəli pal səwur hahəyari ntəfkumari. Ma mdə giratə lapəliyayeri ka mdə wuta abbər səwur hahəyari na ata mnya na pal ni ku ndzi kalkal ka na ata mnya dukwari.

⁶Ka gə namtə liyar hatari ntəfkumari ka dinar, ka gə paktə lapəliyayeri na suɗə ni ata liya ni, kamnyar ka tentər vəngkər səli ni ndzi su duku.”

⁷“Ka gə namtə zhaɓər shishir kwi ol'ola kamnyar pungkər ata kəra tent ni, ka gə namtə zhaɓi ni kum ka ntang.

⁸Ka olkur shanga lapəliyayeri ngəni kum ka ntang ni ndzi jili duku. Kəlara lapəli ka saɓəlkurari ndzi dzartsi makkumari, ka baukurari ndzi dzartsi nfwar.

⁹Ka gə paktə lapəliyayeri ntəfu, kara nduɓtə ɗa ka da ndzi lapəli pal. Tsu apani antə ga ata harari ka lapəliyayeri na ngkwa ni. Ka gə ɓəlhə lapəli na ngkwakur ni ka tsa ndzi nca kəma suɗa, kamnyar arni tsa ata ndzi abwa kəma tent ni.

¹⁰Tsuwa ka gə nduɓdzə səwur hahəi lapəli ni vəyari ntəfkumari ata tenga kəlara zhaɓayeri ngəni suɗə ni.

¹¹Ka gə namtə sur hatə lapəli ntəfkumari ka əmza, ka gə hatə kəlara səwur hahəi lapəli ni pal ata kəlara liyar hatə lapəli ni, kamnyar ka mbwar tent ni ndzi shang su duku.

¹²Antə retar zhaɓi na mbiləmta akwa tent ni, ga ata hahəi ni abwahila tent ni.

¹³Antə dzartsi pal ar saɓəlkura kəlara lapəli ni, ga ata zhar ni hahəi hahəyari akwa kəlara bwa kamnyar hartə tent ni.”

¹⁴“Ka gə jaktə namtə sur hartə kəra tent ni suɗa. Na duku ka gə namtə ni ka kəsəm gamayeri tə mdə putə mamza, ka gə namtə sur hartə bwa na aɓəlaɓəla ni ka kəsəm na ɓɗaku.”

¹⁵“Ka gə namtə tent ni ka udzəmayeri ar akashiya, ka gə nci ɗa ka da thləthlatə dwaɗu.

¹⁶Kəlara udzəm ka saɓəlkurari ndzi dzartsi kuma, ka baukurari ndzi dzartsi pal ka reta.

¹⁷Ka gə namtə kəra kəlara udzəm ka tsa ndzi ka thlidling suɗa kamnyar ka da kadluwadzi akwa nvwa ɗa. Apani antə ga ata hara aka shanga udzəmayeri ar nam tent ni.

¹⁸Nggədza laku tə ka gə ɗəmhə udzəmər tent ni akwa, ga ata ɗəmhə udzəm sərkumari kamnyar bwar anəmər tent ni.

¹⁹Ka gə namtə sur kəsi səla ɗa nfwarkumari ka adzərfa, kəlara udzəm pal ka su suɗa kamnyar kəsi səlari akwa di.

²⁰Tsuwa ka gə namtə udzəm sərkumari kamnyar bwa palari na təbwar yalar tent ni,

²¹ka gə namtə sur kəsi səla ɗa nfwarkumari ka adzərfa, kəlara udzəm pal ka su suɗa kamnyar kəsi ni akwa di.

²²Ka gə namtə udzəm ngkwa kamnyar bwahila tent ni təbwar ramta.

²³Tsuwa ka gə pwi udzəm suɗa akwa kəlara kuɗəma na təbwar hila tent ni.

²⁴Udzəmər kuɗəma nayeri ni mda ata paktə kəra ɗa ata kəma duku akwa vəi lenduwa na ntangkəma ni, amma kira ɗa ata ndzi ndəkndəkari. Antə mda ata hara aka udzəm kuɗəma na dukwari ni tsu apani.

²⁵Antə apani mda ata namtə udzəmayeri ncisu ka sur kəsi səla ɗa akwa di, tə mdə nam ka adzərfa da kumnya ngkwa, kəlara udzəm pal ka sur kəsi ni suɗa.”

²⁶“Ka gə namtə zwal udzəm kadləngkər ntəfu ka udzəm akashiya kamnyar udzəmayeri tə mdə ɗəmhə kamnyar thlimbəla tent na pal ni,

²⁷ka zwal udzəm damwa ntəfu kamnyar thlimbəlari na pal ni. Ka gə namtə zwal udzəm damwa ntəfu kamnyar udzəmayeri na ar hila tent ni, na təbwar ramta ni.

²⁸Ka mdə kadlu udzəm kadləngkər ni ata ɗəffu, ka saɓəlkurərni mzhi paktə udzəm na abwani ka na abwanda.

²⁹Ka gə hartə dza udzəmayeri ni ka dinar, ka gə namtə lenduwayeri ar dinar kamnyar ka da kəsi udzəm kadləngkər ni. Tsuwa ka gə hartə dza udzəm kadləngkər ni ka dinar.

³⁰Antə ka gə namtə tentər vəngkər səli ni tsu apa tə mdə ku ncanta ala ga ata gar ni.”

³¹“Ka gə namtə lapəli na ola ka lilin na kalar zarkina, ka kalar yar ndləngi həng'ha, ka puwa mamza, ka lilin na ɗəmɗəmari ɓɗaku. Ka masku laga ɗahətə ni ka dludzər kerubayeri ɓɗak laga.

³²Ka gə hahəi ni ata liyar hatə ɗa natə mdə nam ka dinar, natə mdə kukwata ata zhimbwalayeri nfwar tə mdə nam ka udzəm akashiya ka hartə dza ɗa ka dinar, ka ncimta səla ɗa ata su nfwar tə nam ka adzərfa.

³³Ka gə hahəi lapəli na ol ni ata liyar hatə ɗa ni. Aghəla nda ka gə ləmbwa ka Akwati Alkawal ni, ka gə vəi ni abwahila lapəli ni. Antə lapəli na ol ni ata ndəkəmta daɓwa Vəi na Ɓɗakkarkara ka Vəi na Ɓɗakkarkar ta shang.

³⁴Ka gə hartə Akwati Alkawal na akwa Vəi na Ɓɗakkarkar ta shang ni ka sur hartə mnyari.

³⁵Antə akwa tent ni, ka gə vəi tebər ni aɓəlaɓəla lapəli ni təbwar yala, ka gə vəi zwalər kəsi pitəla ni təbwar anəm ka da wuldzi.”

³⁶“Tsuwa ka gə namtə lapəliyir nyarmbwar tent ni ka lilin na kalar zarkina, ka na kalar yar ndləngi həng'ha, ka ulu na mamza, ka lilin na ɓɗaku. Ka mdə putə kəthlər na ɓɗaku ata lapəli ni.

³⁷Ka gə namtə udzəm zhimbwal ntəfu ka akashiya, ka gə hartə dza ɗa ka dinar, ka namtə sur kəsi səla ɗa akwa di ntəfu ka əmza, ka putə liyar hatə su ar dinar, ka gə hatə lapəli na ol ni ata.”