Read bura-pabir Səɓəlari 27 Bible Online

Səɓəlari 27 - bura-pabir bible

Səɓəlari 27

¹“Ka gə namtə bagaɗi ar hamta saɗaka mbamba ka udzəm akashiya, ka baukurari ka saɓəlkurari ndzi shang duku. Ka saɓəlkurari ndzi dzartsi ntəfu, ka baukurari ndzi dzartsi ntəfu, ka nalkurari ndzi dzartsi makər.

²Ka gə namtə təmbəl akwa shanga kuɗəmayeri nfwar ar bagaɗi ni, ka təmbəl ni ndzi su duku ka kuɗəma ni. Tsuwa ka mdə hartə dza bagaɗi ni shang ka əmza.

³Ka gə namtə tasayeri kamnyar famta pənju, ka tebər famta su, ka tasayeri na ol'ola, ka cagwaliyayeri na ka kuleng, ka tasayeri ar u'u, shang ka əmza.

⁴Tsuwa ka gə namtə wayar ptsa kum ka əmza aka bagaɗi saɗaka ni, ka gə namtə lenduwar əmza nfwar akwa kuɗəmayeri nfwar ar bagaɗi saɗaka ni.

⁵Ka gə vu wayar ptsa kum ni akwa kuta bagaɗi ni, ka tsa ndzi aghəi akwa retar nalkur bagaɗi ni.

⁶Ka gə namtə zwalayeri ar kəl bagaɗi ni ka udzəm akashiya, ka hartə dza ɗa ka əmza.

⁷Ka gə hau zwalayeri ni akwa gular lenduwayeri na ata thlimbəla bagaɗi ni, kamnyar ma sakatə mda ata kəlari ka mdə kəthlər ka zwalayeri ni.

⁸Ka gə namtə bagaɗi ni ka udzəm na bau bau, tsuwa ka gə namtə ni apa akwati na ka kərari bwang kula su akwa, tsu apa tə I ncanta ala ga ata kəra gar ni.”

⁹“Ka gə namtə bəbal kamnyar tentər vəngkər səli, ka kalaktə bəbal ni ka lapəli tə mdə tsa ka lilin. Atəbwar anəm, ka saɓəlkur lapəli ni ndzi dzartsi aru pal.

¹⁰Ka mdə hatə lapəli ni ata zhimbwalayeri sərkumari tə mdə ncigəi ata sur kəsi səla ɗa sərkumari tə mdə nam ka liyar əmza. Ka gə namtə liyar hatə lapəli ata zhimbwalayeri ni ka adzərfa.

¹¹Tsu apani antə ga ata hara aka bəbal na təbwar yala. Ka mdə kalaktə bəbal ni ka lapəli natə saɓəlkurərni dzartsi aru pal, ka hahəi ni ata zhimbwalayeri sərkumari tə mdə ncigəi ata kira ɗa sərkumari tə mdə nam ka liyar əmza. Ka mdə namtə liyar hatə lapəli ata zhimbwalayeri ni ka adzərfa.

¹²Baukurər bəbal na təbwar ramta ni, ka mdə kalaktə ni ka lapəli natə saɓəlkurərni dzartsi ntəfkumari. Ka mdə hahəi lapəli ni ata zhimbwalayeri kuma tə mdə ncigəi ata sur kəsi səla ɗa kuma.

¹³Akwa bwa raghəi, təbwar səɓəlar pci, baukur bəbal ni ata ndzi dzartsi ntəfkumari.

¹⁴Lapəliyir nyarfu na pal, saɓəlkurari ata ndzi dzartsi kumnya ntəfu. Antə mda ata hahəi ni ata zhimbwalayeri makər natə mdə ncigəi ata sur kəsi səla ɗa makər.

¹⁵Tsu apani antə mda ata hara aka nyarfu damwa. Mda ata hahəi lapəli na ka saɓəlkurərni dzartsi kumnya ntəfu, ata zhimbwalayeri makər natə mdə ncigəi ata kira ɗa pal pal makər.

¹⁶Akwa nyarfur ləvəi akwa bəbal ni, ka mdə namtə saɓəlkur lapəliyari ka tsa ndzi dzartsi sərkumari. Tsuwa ka mdə tsatə lapəli ni ka puwar nggira ar lilin na ɓɗaku, ka mdə putə kəthlər dəɓa ka puwa na kalar zarkina, ka na ka kalar yar ndləngi həng'ha, ka puwa mamza. Ka mdə hatə lapəli ni ata zhimbwalayeri tə mdə ncigəi ata sur kəsi səla ɗa nfwar.

¹⁷Shanga zhimbwalayeri na kalaktə bəbal tent ni, ka mdə namta ala ɗa sur kəsi səla ɗa akwa di ni ka əmza, ka namtə liyayeri ar hatə lapəli ni ka adzərfa.

¹⁸Ka saɓəlkur lapəliyir bəbalər tent ni ndzi dzartsi aru pal, ka baukurari ndzi dzartsi ntəfkumari, ka nalkurər lapəliyir katanggari ndzi dzartsi ntəfu. Tsuwa ka mdə tsatə lapəliyayeri ni ka puwar nggira ar lilin na ɓɗaku. Ka mdə hatə lapəliyayeri ni ata zhimbwalayeri tə mdə nam sur kəsi səla ɗa akwa di ni ka əmza.

¹⁹Shanga kariyayeri tə mda ata hara kəthlər kəgari akwa tent ni, purəm kəga makukwar kukwi tent ni, ka na ar nci kəla bəbalər tent ni, ka mdə hara ɗa shang ka əmza.”

²⁰“Ka gə tsawa aka mjir Israila ka da səntə mal zaitun natə mdə ku thləlɓəla ɓɗaku kamnyar mba akwa pitəla, kamnyar ka pitəla hamta parakəu tədəku.

²¹Ka mdə vəi zwalər kəsi pitəlayeri ni aɓəlaɓəla lapəliyir hartə vəi Akwati Alkawal ni. Ka Haruna kəga maɗashilərni wulwul pitəla ni baɗitə ka tahaku har ɗəɗəpa, kamnyar ka pitəlayeri ni ləkəma ka mba akəma MTHLAKU. Ngəni an tsawu na ba saka madi natə ka mjir Israila ɓəlata akwa shanga zamanayeri arɗa.”