Read bura-pabir Səɓəlari 3 Bible Online

Səɓəlari 3 - bura-pabir bible

Səɓəlari 3

¹Vir laga sakatə Musa akwa ɓəla təma kəga kwiyir kəsayirni Yethro na prist ar Midiyan, antə tsa ku təra ka mwaɓiyayeri ni ka ləkwa mtaku, har ka mzhitə Horeb, Gar na ar Hyel.

²Azi antə mdərthlentər MTHLAKU ku wutədzi alari akwa kyanggyara u'u na səɓəla akwa nfu na raka. Musa akwa wul u'u ni akwa mba akwa nfu na raka ni, amma nfu na raka ni aɗi akwa mbamtadzi wa.

³Antə Musa pəla akwa ɗəffari, “Ndzi kəi shahədzi kəi wulɓəla surndatə ngəni, kəi nggaɓəla su na hara tə nfwayeri ni aɗi akwa mbamtadzi wa ni.”

⁴Sakatə MTHLAKU ku wutə Musa akwa mwari kudzəhə ka tsa wulɓəla su ni, antə MTHLAKU kəga ni akwa nfu na raka ni abbər, “Musa! Musa!” Antə Musa shinau ka pəla, “Naam! Nggədza ra.”

⁵Antə Hyel pəla, “Ga aɗiya shahədzi kudzəha azi wa! Ntsui ɓaɓiyir nga, kamnyar vəi tə ga athləthlata ata ni, tsa Vəi na Ɓɗakkarkara.

⁶I an Hyelər kəkayeri ar nga, Hyelər Ibrahim, Hyelər Ishaku, Hyelər Yakub.” Antə Musa hartə kəmari kamnyar tsa akwa thlivər wul Hyel.

⁷Antə MTHLAKU pəla, “Jiri I ku wutə jili bwani tə mjirna akwa ɗarari akwa Masar. I ku nggatə tuwar ɗa kamnyar bwani tə da akwa sari akəla helmayeri arɗa. Jiri, I asəndə jili bwaniyayeri tə da akwa.

⁸Antə I səghəi kamnyar kəi msərantə ɗa akwa tsiya mjir Masar, kəi fwaɓəla ɗa akwa Masar, kəi mwantə ɗa akwa tsəɗi na ɓɗaku ka bəbal ola, tsəɗi na ɓɗaku, na ata ya su. I ata mwantə ɗa akwa tsəɗi mjir Kanana, ka mjir Hitti, ka mjir Amor, ka mjir Perizzi, ka mjir Hivi, ka mjir Yebusi.

⁹Antə kulini I ku nggatə tuwar mjir Israila. Tsuwa I ku wutə laku tə mjir Masar akwa hara ala ɗa bwani akwa.

¹⁰Kulini I ata thlentə nga adzə kuthli, kamnyar ka gə ra fwaɓəla mjirna na mjir Israila kazhar tsəɗi Masar.”

¹¹Amma Musa pəla aka Hyel, “I wa ri, tə I ata mzhi mwari adzə kuthli kəi fwaɓəla mjir Israila kazhar Masar ni?”

¹²Antə Hyel pəla, “Amma I ata ndzi adzə nga. Antə ngəni an seɗa na ata ncanta ala ga abbər I an thlentə nga. Watau ma sakatə ga ku fwaɓəla mjir Israila kazhar Masar, ata gar ngəni antə giri ata si vəngkər səli aka Hyel.”

¹³Amma Musa pəla aka Hyel, “Ma sakatə I ku mwari ka pəla aka mjir Israila abbər, ‘Hyel natə kəkayeri ar giri nuwa an thlentə ra adzə giri.’ Tsuwa ma da ku yu ra abbər, ‘Thləmari mə ri?’ Man tə kəi pəla ala ɗa ri?”

¹⁴Antə Hyel pəla aka Musa, “I AN APA TƏ I AƊI. Ngəni an su tə ga ata pəla aka mjir Israila, ‘IYA an thlentə ra adzə giri.’ ”

¹⁵Tsuwa Hyel ku jaktə pəla aka Musa, “Pəla aka mjir Israila abbər, ‘MTHLAKU na Hyelər kəkayeri ar giri, watau Hyelər Ibrahim, ka Hyelər Ishaku, ka Hyelər Yakub, an thlentə ra adzə giri.’ “Ngəni an thləmi har ba saka madi, ka thləm ngəni antə mda ata ɗangtə ra akwa shanga zamanayeri na akəma.”

¹⁶“Mwari kara tsaptə mji ol'ola ar Israila, kara pəla ala ɗa, ‘MTHLAKU na Hyelər kəkayeri ar giri, watau Hyelər Ibrahim, ka Ishaku, ka Yakub, an wutədzi ali.’ ” Tsa pəla, “I ku wutə giri ka su tə mjir Masar akwa hara ala giri.

¹⁷Antə I hara alkawal abbər I ata fwaɓəla giri kazhar bwani tə giri akwa ɗarari akwa Masar, kəi mwantə giri akwa tsəɗiyir mjir Kanana, ka mjir Hitti, ka mjir Amor, ka mjir Perizzi, ka mjir Hivi, ka mjir Yebusi, tsəɗi na ɓɗaku, na ata ya su.”

¹⁸“Antə mji ol'olər Israila ni ata psi thləm ala ga. Antə ga kəga mji ol'ol ni ata mwari adzə kuthlir Masar, ka giri pəla alari, ‘MTHLAKU na Hyelər mjir Ibrani ku ncantə kərni ala yeru. Antə kulini yeru akwa kiɗə nga ka ra na ala yeru laku, ka yeru mwar vir makər akwa mtaku, kamnyar ra hamta saɗaka aka MTHLAKU na Hyelər yeru.’

¹⁹I asənda abbər kuthlir Masar aɗi ata si zhar giri ka giri təra wa, tar ma I vu ni dwali ka tsa hara.

²⁰Apani I ata haptə tsi, kəi ɗi mjir Masar ka asarayeri na ata thlivərantə ɗa. Aghəla nda antə tsa ata zhar giri ka giri təra.”

²¹“Tsuwa I ata vu ka mjirna ni ndzi ka daraja ata nca mjir Masar, natə ma sakatə giri ata təra, giri aɗi ata təra ka tsiya giri shwalang wa.

²²Kəlara mwala ata ra yutə sur dəɓa tə mdə nam ka dinar wala adzərfa, kəga ləptər ha akəla mwala Masar na ntəwulərni ka na akwa kəyirni. Antə giri ata hadzə kariyayeri ni aka maɗa' giri shili ka mwanki. Apani antə giri ata famnya gənar mjir Masar.”