Read bura-pabir Səɓəlari 30 Bible Online

Səɓəlari 30 - bura-pabir bible

Səɓəlari 30

¹“Ka gə namtə bagaɗi ka udzəm akashiya kamnyar mba sur shiwura.

²Ka saɓəlkurari ndzi dzartsi pal, ka baukurari ndzi dzartsi pal, watau ka baukurari ndzi kalkal ka saɓəlkurari. Ka nalkurari ndzi dzartsi suɗa, ka təmbəla kuɗəmayeri ni ndzi su duku ka bagaɗi ni.

³Ka gə hartə dza bagaɗi ni ka dinar shini, kərari, ka thlimbəlayerari, ka təmbəlayerari ni. Ka gə kalaktə tengari ka dinar tsuwa.

⁴Ka gə namtə lenduwar dinar suɗa aka bagaɗi ni. Ka gə putə ɗa ata aghəya mnya tengayerari na suɗa, na akwa wuldzi ni. Antə lenduwayeri ni ata kəsi zwalayeri ar kəl bagaɗi ni.

⁵Ka gə namtə zwalayeri ngəni ka udzəm akashiya ka hartə dza ɗa ka dinar.

⁶Ka gə vəi bagaɗi mba tulari ɗuza ngəni akəma lapəli na nggamta Akwati Alkawal ni, akwati tə sur hartə mnyari an vəi kələmta biku, akwa vəi tə I ata gari ka ga.

⁷Kəlara viri sakatə Haruna ata si ɗəɗəpa kamnyar namtə pitəlayeri ni, ka tsa mba tulari ɗuza ata bagaɗi ni.

⁸Tsuwa kəlara tahaku tə tsa ata namtə pitəla ni, ka tsa jaktə mba tulari ɗuza ni. Antə giri ata ləkəma ka mba tulari ɗuza ngəni akəmi akwa shanga zamanayeri ar giri.

⁹Ga aɗiya hamta tulari ɗuza na dlimbur ata bagaɗi ngəni wa, wala hamta saɗaka mbamba, wala saɗakar mthli, wala saɗakar sur sa ata kər wa.

¹⁰Ka duku daci akwa məva, antə Haruna ata kəcimta bagaɗi ni atar ɗatə mamshir mwaɓi saɗakar tifəmtar biku ata təmbəla bagaɗi ni. Mda ata ləkəma ka hara ngəni ka pal akwa məva, akwa shanga zamanayeri na ar giri. Mdə ku hamta bagaɗi ngəni ka tsa ndzi ali, I na MTHLAKU.”

¹¹Antə MTHLAKU pəla aka Musa,

¹²“Ma sakatə ga ata jikatə mjir Israila, ka kəlara mda akwa nca ɗa ntəmta su aka MTHLAKU kamnyar pəli mpikari, ta shilku laga na mwavər asə wutə ɗa akwa sakar jika ni.

¹³Kəlara mdə natə mdə ku jikatə ni akwa jika ni, tsa ata ntəmta retar liyar adzərfa, ata sur ngkər su tə mda ana kəthlər kəgari akwa Vəi na Ɓɗakkarkara

¹⁴Kəlara mdə sal tə mdə ku jikatə ni, natə məvari ku hara sərkumari ka ləmta, tsa ata ntə su tə mdə thlamta ni aka MTHLAKU.

¹⁵Ma sakatə giri ata hamta saɗaka ngəni aka MTHLAKU kamnyar pəli mpika giri, mdər gəna aɗiya ntə su hang ta su tə mdə thlamta ni wa. Tsuwa mdər bwani aɗiya ntə su na raka ta su tə mdə thlamta ni wa.

¹⁶Ka gə dlu kwaba ngəni akəla mjir Israila, ka mdə kəthlər kəgari akwa wul tent ar vəngkər səli ni. Antə tsəma ngəni ata ndzi sur ɗangtə aka mjir Israila akəma MTHLAKU abbər da ku pəli mpika ɗa.”

¹⁷Antə MTHLAKU pəla aka Musa,

¹⁸“Ka gə namtə tasa na ola ka liyar əmza kamnyar kəcimta tsi ka səl, tsuwa ka gə namtə sur vətə tasa ni ka əmza. Ka gə vəi ni akwa daɓwa tent ni ka bagaɗi ni, ka gə pu yimi akwa.

¹⁹Anda antə Haruna ka maɗashilərni ata kəcimta tsiya ɗa ka səla ɗa,

²⁰akwabə da aləkwa tentər vəngkər səli wala mwari adzə bagaɗi ni, ta da asə mta. Tsuwa ma sakatə da akwa mwari adzə bagaɗi ni kamnyar hamta saɗaka tə mdə hamta ka u'u aka MTHLAKU ni,

²¹ka da kəcimta tsiya ɗa ka səla ɗa ta da asə mta. Ngəni ata ndzi tsawa aka Haruna ka kəkayeri arni akwa shanga zamanayeri arɗa.”

²²Antə MTHLAKU pəla aka Musa abbər,

²³“Ka gə fatə kari yaji na ɓɗakta shang, watau yimər mur ar shekel aru ntəfu, ka sinamon na ka shiwur msəra ar shekel aru suɗa ka ntəfkumari, ka kusar na ana shiwur msəra ar shekel aru suɗa ka ntəfkumari,

²⁴ka akashiya na ana shiwur msəra ar shekel aru ntəfu, shang ata sur ngkər su tə mda ana kəthlər kəgari akwa Vəi na Ɓɗakkarkara, ka mal zaitun galan pal.

²⁵Ka su nayeri ni antə ga ata namtə mal ar hamta mda aka Hyel na ɓɗakkarkara, natə mdə namta apatə mdər gwar tulari ana hara. Antə tsa ata ndzi mal ar hamta mda aka Hyel na ɓɗakkarkara.

²⁶Ka gə ɗatə mal ngəni ata tentər vəngkər səli, ka Akwati Alkawal,

²⁷ka tebər ka shanga kariyirni, ka zwalər kəsi pitəlayeri ka shanga kariyirni, ka bagaɗi ar mba tulari ɗuza,

²⁸ka bagaɗi saɗaka mbamba ka kariyirni, ka tasa na ola ar kəcə tsi ka sur vətari.

²⁹Ka gə hamta ɗa ali akwa laku ngəni, antə da ata ndzi ɓɗakkarkara ka duna, tsuwa kəlara su na ku tsəkwar ɗa tsa ata ndzi ɓɗakkarkara.

³⁰Ka gə ɗangkər mal aka Haruna ka maɗashilərni, ka gə namtə ɗa ka da ndzi ɓɗakkarkara, kamnyar ka da ndzi pristayeri ar hara kəthlər ali.

³¹Ka gə pəla aka mjir Israila abbər, ‘Ngəni an mal ar hamta mda aka Hyelərna na ɓɗakkarkara, natə giri ata kəthlər kəgari tədəku akwa shanga zamanayeri ar giri.

³²Antə mda aɗiya ɗangkər mal ngəni aka kəlara mdə wa, tsuwa giri aɗiya namtə mal na jili ngəni kəra wa. Kamnyar tsa ɓɗakkarkara, antə tar ka giri namta abbər tsa ɓɗakkarkara.

³³Kəlara mdə na ku namtə mal na jili ngəni, wala tsuwa ma tsa ku ɗangkər aka mdə laga na aɗi prist wa, mda ata ndəkəmta ni ka mjirni.’ ”

³⁴Antə MTHLAKU pəla aka Musa, “Tsaptə kari yaji na ka shiwurər ɗa msəra, apa stakte, ka onika, ka galbanum, ka yajir luban na msəra, ka hangkurər ɗa shang ndzi kalkal.

³⁵Ka gə namtə tulari ɗuza na kiskisu kəgari, apa tulari ɗuza tə mdər nam tulari ana hara, tsuwa ka gə pungkər alari una. Antə tsa ata ndzi tulari ɗuza na kəcəkəcari ka ɓɗakkarkara.

³⁶Ka gə kətsə raka, ka gə hadli ni liktikti apa mpwa, ka gə kuktəmta akəma Akwati Alkawal na akwa tentər vəngkər səli, akwa vəi tə I ata kəɓa ka ga. Antə tulari ɗuza ngəni ata ndzi ala giri ɓɗakkarkara ta shang.

³⁷Giri aɗiya nam tulari ɗuza na jili ngəni aka kəra giri wa. Tsa ata ndzi aka MTHLAKU, antə tar ka giri namta abbər tsa ɓɗakkarkara.

³⁸Kəlara mdə na ku namtə jili tulari ɗuza ngəni ka hara kəthlər kəgari aka kər ni, mda ata ndəkəmta ni ka mjirni.”