Read bura-pabir Səɓəlari 32 Bible Online

Səɓəlari 32 - bura-pabir bible

Səɓəlari 32

¹Sakatə mji ni ku wuta abbər Musa ku fəi dzau ata kəra gar ni, antə da ku tsaptədzi adzə Haruna ka pəla alari, “Namta ala mburu hyelayeri na ata mwa akəma mburu. Kamnyar mburu aɗi səndə su na hara aka Musa na fwaɓəla mburu akwa Masar ni wa.”

²Antə Haruna pəla ala ɗa, “Fwaɓəla giri surthləm ar dinar na akwa thləma mwankir giri, kəga ar maɗa' giri shili ka mwanki, ka giri sənta ali.”

³Antə shanga mji ku fwaɓəla surthləm ar dinar na akwa thləma ɗa, ka səntə ɗa aka Haruna.

⁴Antə Haruna ku dlu surthləmayeri ni akəla ɗa, ka juwi ɗa, ka namtə haptu laga akwa dludzər ɓzəra gyal. Sakatə mji ni wutə su ni, antə da pəla, “Mjir Israila, ngəni an haptu na fwaɓəla giri akwa Masar!”

⁵Sakatə Haruna wuta abbər ɗəffa mji ku ndzi msəra ala ɗa, antə tsa həntə bagaɗi akəma ɓzəra gyal ni, ka psəmnya ala ɗa abbər, “Ɗəpə mda ata hara kucali aka MTHLAKU.”

⁶Antə da dli thlatə səɓəla ɗəpari ka hamta saɗaka mbamba ka saɗakar jakə mwardzi. Aghəla nda antə mji ku ndzəndzi ka səm ka sa ka thlatə har ka ləkwa ɓathla.

⁷Antə MTHLAKU pəla aka Musa, “Mwa ka gə ləghəi taktar! Kamnyar mjir nga natə gə fwaɓəla ɗa akwa Masar ni ku hara dlərpəkur.

⁸Da ku pəramta kazhar laku natə I pəla ala ɗa ka da nu ni kasha. Da ku namtə haptu na dludzər ɓzəra gyal, akwa vəngkər səli alari, har ka hamta alari saɗaka. Har da akwa pəla, ‘Mjir Israila, ngəni an hyel na fwaɓəla giri akwa Masar!’

⁹I ku sənda abbər mji nayeri ni kəra ɗa ɓəɓal.

¹⁰Antə kulini zhar ra, ka ɗəffi mbwa ata kəra ɗa, kəi mbamta ɗa shang. Amma ar nga ata vəya ndaga, I ata namtə ka durər nga ndzi ola.”

¹¹Amma Musa ku kiɗa akəla MTHLAKU na Hyelərni abbər, “MTHLAKU, kamnyar mi tə ga ata zhar ka ɗəffa ga mbwa ata kəra mjir ngə ri, mji tə gə fwaɓəla akwa Masar ka dunar kuthlikur nga na ola ka tsiya gə na ka duna?

¹²Kamnyar mi tə ga ata vu mjir Masar ka da pəla abbər, ‘Ai ka ɗimikur akwa ɗəffari antə tsa fwaɓəla ɗa, kamnyar ka tsa kurəmta ɗa akwa garayeri, ka tsarəmta ɗa karkar kazhar kəra duniya?’ Peri ɗəffa ga! Pali dzamər hara asar ata kəra mjir ngə ni. Ga aɗiya sənta asar ata kəra ɗa wa.

¹³Ɗangtə Ibrahim, ka Ishaku, ka Yakub, mjir nga natə gə ka kər nga an kətə alkawal ala ɗa abbər, ‘Durər giri ata sə yatədzi ka ndzi apa sasəlkayeri na amtazi, ka apa wuyakər mnya manda. Tsuwa shanga tsəɗi ngəni tə I kətə alkawalər hamtari aka kəkayeri ar giri ni, da ata ndzi mthlakari ba saka madi.’ ”

¹⁴Antə MTHLAKU ku pali su tə tsa ɗəmhə ni, tsa aɗi sənta asar tə tsa ɗəmha ata kəra mjirni ni kəra wa.

¹⁵Antə Musa ku shinar kəmari ka ləghəi ata gar ni ka allowayeri suɗa akwa tsiyari, na ka tsawayeri rəbutə rəbutari ata bwakəma ka bwahili.

¹⁶Tsuwa Hyel ka kərari an nam allowayeri ngəni. Rəbutə ni ma rəbutər Hyel, tə tsa ɗahəɓəla ata pelayeri ni.

¹⁷Sakatə Joshuwa ku nggatə mji akwa hara kuraku, antə tsa pəla aka Musa abbər, “Apa I akwa ngga apa kurakər mpa akwa vəi fəli ni.”

¹⁸Amma Musa pəla, “Ai ngəni aɗi dludzi ka kurakər mji na ku nggyari su wa, tuwar mji natə mdə ku səm ɗa wa, amma tsa kurakər ha antə I akwa nggari!”

¹⁹Sakatə Musa ku hara kudzəhə ka vəi fəli ni, təng tsa wutə ɓzəra gyal ka mji akwa ɓathla. Apani ɗəffari ku ɓzi ka duna, antə tsa ndzəhəmta allowayeri na akwa tsiyari ni ata kusar gar ni, antə da jaɓumtadzi.

²⁰Antə tsa kətə dludzər ɓzəra gyal tə da namtə ni, ka mbamta, ka hadli mpwari, ka kuktəmta ata kəra yimi, ka vu tə mjir Israila sa yimi ni.

²¹Antə Musa pəla aka Haruna, “Man su tə mji nayeri ni hara ala gə ri? Man tə da hara har tə vu nga akwa ndəkərəngkər ala ɗa biku ngəni ol nə ri?”

²²Antə Haruna shinau ka pəla, “Zanuwa, ɗəffa ga aɗiya ɓzi ka duna wa. Gə ma ga səndə mji ngəni cau, ka laku tə da hir hara ɗimikur.

²³Ai da pəla ali, ‘Namta ala mburu hyelayeri na ata mwa akəma mburu. Kamnyar mburu aɗi səndə su na hara aka Musa na fwaɓəla mburu akwa Masar ni wa.’

²⁴An su na hara tə I pəla ala ɗa, ‘Kəlara mdə na ka dinar, ka tsa sənta ali!’ Antə da ku hamta ali, antə I ku pu akwa u'u, antə ɓzəra gyal ngəni ku səɓəla akwa.”

²⁵Sakatə Musa wuta abbər Haruna ku zhar mji ni tə da hara su kula dzama, har tə da ndzi sur kumshi akəma dawayeri arɗa,

²⁶antə Musa thləthlata akwa nyarfur vəi fəli ni, ka haptə kurakari ka pəla, “Wan ar MTHLAKU akwa nca giri nə ri? Ka mdari si adzə ra.” Antə shanga mjir Lawi ku mwari ka tsaptədzi adzə ni.

²⁷Antə tsa pəla ala ɗa, “MTHLAKU na Hyelər Israila akwa pəla, ‘Ka kəlara mda akwa nca giri hatə katsakarərni ata thlimbəlari! Ka giri ləkwa vəi fəli ni, ka kəlara mdə tsi ɓzərma'ni, ka pazhirni, ka ntəwulərni, baɗita akwa nyarfur ngəni har ka tsadza aka nyarfu ndaga.’ ”

²⁸Antə mjir Lawi ni ku hara tsu apatə Musa ku pəla ala ɗa. Antə vir nda mdə ku tsəgəi mji apa dəpu makər.

²⁹Antə Musa pəla aka mjir Lawi ni, “Ashina giri ku hamta kəra giri mjir kəthlər aka MTHLAKU, təng tə kəlara mda akwa nca giri ku kələngkər alari har ka hara asar ɓzərni, wala ɓzərma'ni ni. Atar apani giri ku wutə barka aka kəra giri ashina.”

³⁰Səɓəla ɗəpari antə Musa pəla aka mji ni, “Giri ku hara biku na ol laga. Amma kulini I ata ləmta adzə MTHLAKU ata gar ni, nuhum I amzhi kiɗə kərari ka tsa tifəmta ala giri bikər giri.”

³¹Antə Musa ku ngka adzə MTHLAKU ka pəla, “Kaai! Mji nayeri ni ku hara biku na ola! Da ku namtə haptər dinar aka kəra ɗa.

³²Amma kulini I akwa kiɗə kəra ga, abbər ka gə tifəmta ala ɗa bikər ɗa. Ma aɗi hara ala gə wa, usa, kara cajimta thləmi akwa kakaɗə tə gə rəbutə ni.”

³³Amma MTHLAKU shinau ka pəla aka Musa, “Kəlara mdə na ku hara ali biku, I ata cajimta thləmari akwa kakaɗər na.

³⁴Antə kulini, thlatə ka gə pwar mji nayeri ni ka gə mwantə ɗa akwa vəi tə I pəla ala ga. Tsuwa mdərthlentərna ata pwar nga. Wala apani ma vir shariya ku si, I ata ɗi ɗa kamnyar bikər ɗa.”

³⁵Antə MTHLAKU ku thlentə shilku ata kəra mji ni kamnyar tə da ku vu Haruna tə tsa namta ala ɗa dludzər ɓzəra gyal.