Read bura-pabir Səɓəlari 35 Bible Online

Səɓəlari 35 - bura-pabir bible

Səɓəlari 35

¹Musa ku tsaptə shanga mjir Israila ata kəma duku, ka pəla ala ɗa, “Nayeri ni an suayeri tə MTHLAKU ku tsawa ala giri ka giri hara.

²Ka mdə hara kəthlər akwa virayeri na ngkwa ni, amma vir na murfəkur an Vir Ghərəmtaghəra na ola, vir tə mdə ku namtə ni ɓɗakkarkara aka MTHLAKU. Antə kəlara mdə na ku hara kəthlər vir nda, mda ata tsi ni.

³Giri aɗiya mba u'u akwa kəyayeri ar giri Vir Ghərəmtaghəra wa.”

⁴Antə Musa pəla aka shanga mjir Israila abbər, “Ngəni an su tə MTHLAKU ku tsawa.

⁵Ka giri kəɓəla su laga akwa nca su na akəla giri, ka giri hamta aka MTHLAKU. Ka kəlara mdə səntə sur hamta natə tsa an hir ka thlamta akwa ɗəffari, wala dinar, wala adzərfa, wala əmza,

⁶wala puwa na lipəla, wala na kalar yar ndləngi həng'ha, wala na mamza, wala lilin na ɓɗak laga, wala shishir kwi,

⁷wala kəsəm gam natə mdə putə ni mamza, wala udzəm akashiya,

⁸wala mal zaitun kamnyar pitəlayeri, wala yaji kamnyar mal ar hamta mda aka Hyel, wala tulari ɗuza na ka shiwurari msəra,

⁹wala pelayeri ar oniks, wala pelayeri damwa na ka daraja, natə mda ata mzhi patari ata efod ka ata zhaɓər dlipwayeri ar kərathlu.”

¹⁰“Ka shanga mji na akwa nca giri na masəku akwa kəthlər ar tsi si ka da hara shanga su tə MTHLAKU ku tsawa abbər ka mdə hara.

¹¹Watau ka da hara kəthlər ar tentər vəngkər səli ni, ka sur hartə kərari, ka liyayeri ar hatə su, ka udzəmayeri ar nyarmbwari, ka udzəmayeri ar kadləngkər, ka zhimbwalayerari, ka sur kəsi səlayerari akwa di,

¹²ka Akwati Alkawal ka zwalayerari, ka sur hartə mnyari, natə tsa an vəi kələmta watsəɓər biku, ka lapəliyari ar nyarmbwayerari,

¹³Ka tebər ka zwalayerari, ka shanga kariyayerari, ka Buradi ar vəi Akəmi,

¹⁴ka zwalər kəsi pitəlayeri kamnyar hamta parakəu, ka kariyayerari, ka pitəlayerari, ka malər pu pitəlayeri ni,

¹⁵ka bagaɗi ar mba tulari ɗuza ka zwalayerari, ka mal ar hamta mda aka Hyel, ka tulari ɗuza na msəra, ka lapəliyir nyarmbwar ləkwa tent ni,

¹⁶ka bagaɗi ar hamta saɗaka mbamba, ka rariyar əmza na akwa kutari, ka zwalayerari, ka kariyayerari shang, ka tasa na ola ka sur vətari,

¹⁷ka lapəliyayeri ar kalaktə bəbal ni, ka zhimbwalayerari, ka sur kəsi səla ɗa, ka lapəliyir nyarfur ləvəi akwa bəbalər tent ni,

¹⁸ka makukwayeri ar nci tent ni, ka makukwar kəla bəbalər tent, ka səwayeri, arɗa,

¹⁹ka ləptayeri tə mdə tsatə ɓɗaku laga kamnyar kəthlər akwa Vəi na Ɓɗakkarkara, ka ləptayeri na ɓɗakkarkara aka prist Haruna, ka ləptayeri aka maɗashilərni kamnyar hara kəthlər pristkur.”

²⁰Antə shanga mjir Israila ku təra kazhar Musa.

²¹Antə shanga mji natə ɗəffa ɗa ku hir ala ɗa, ka mji tə mambələr Hyel ku tsəkwar ɗəffa ɗa, ku ngka ka səntə sur hamta arɗa aka MTHLAKU, kamnyar ka mdə kəthlər kəgari akwa tentər vəngkər səli ni, ka shanga kəthlərayeri na akwa, kəga ləptayeri na ɓɗakkarkara.

²²Antə mji shili ka mwanki natə ɗəffa ɗa ku hir ala ɗa, ku ləkəma ka səntə sur hamta arɗa na ar sur dəɓa tə mdə nam ka dinar aka MTHLAKU. Da hamta pinayeri, kəga surthləmayeri, kəga lenduwayeri ar kuleng tsi, kəga gənar wulya, ka kari dəɓayeri zumzum natə mdə hara ka dinar.

²³Shanga mji na ka zhaɓi na kalar lipəla, wala kalar yar ndləngi həng'ha, wala puwa mamza, wala lilin na ɓɗaku, wala shishir kwi, wala kəsəm gamayeri natə mdə namtə ɓɗaku, wala kəsəm kwi na ɓɗaku ku səntə ɗa.

²⁴Shanga mji na ku mzhi hamta sur hamta ar adzərfa wala əmza, ku səntə ka hamta aka MTHLAKU. Shanga mji na ka udzəm akashiya na ata mzhi kuri wujir akwa kəthlər ni ku sənta.

²⁵Shanga mwanki na masəkur shə puwa ka tsi, ku səntə puwa tə da sha, na ka kalar lipəla, ka na kalar yar ndləngi həng'ha, da puwa mamza, ka lilin na ɓɗaku.

²⁶Tsuwa shanga mwanki natə ndər ni ku tsəkwar ɗəffa ɗa, mwanki na masəkur shə puwa ka shishir kwi, ku namtə puwa ka shishir kwi.

²⁷Antə mji ol'ola ata kəra ɗa ku səntə pelayeri ar oniks ka pelayeri damwa na ka daraja kamnyar ka mdə putə efod ka zhaɓər dlipwayeri ar kərathlu ni.

²⁸Tsuwa da ku səntə kari yaji, ka mal zaitun kamnyar pitəla, ka mal ar hamta mda aka Hyel, ka tulari ɗuza na msəra.

²⁹Shanga mjir Israila shili ka mwanki natə ndər ni ku tsəkwar ɗəffa ɗa ku səntə su na ata dlara akwa hara kəthlər natə MTHLAKU ku tsawa aka Musa ka tsa hara ni. Da ku səntə sur hamta arɗa na ar hirər ɗəffu aka MTHLAKU.

³⁰Antə Musa pəla aka mjir Israila, “Nggədza, MTHLAKU ku carɓəla Bezalel na ɓzər Uri kəkar Hur na akwa nyarmbwar Yahuda.

³¹Hyel ku nghyantə ni ka mambələrni, ka masəkukur, ka na alari kər, ka sənda akwa shanga jili kəthlərayeri tə mda ana hara ka tsi,

³²kamnyar ka tsa mzhi namtə ɗahayeri na ɓɗakɓɗaku, ka mzhi namtə su ka dinar, ka adzərfa, ka tsuwa ka əmza,

³³tsuwa ka tsa mzhi marəmta pelayeri ka patə ɗa, ka marəmta udzəm, ka hara shanga jili kəthlərayeri ar masəkukur.

³⁴MTHLAKU ku hamta aka Bezalel ka Oholiyab na ɓzər Ahisamak na akwa nyarmbwar Dan ɗəɗukur ar thlipə su aka mji damwa.

³⁵MTHLAKU ku nghyantə ɗa ka səndər nam kəlara su ka tsi, apa kəthlər ɗaha, ka marəmta su, ka ndəɓur tsi ar dəɓa ka puwa lipəla, ka na kalar yar ndləngi həng'ha, ka puwa mamza, ka lilin na ɓɗaku. Antə da ku ndzi masəku akwa hara kəlara kəthlər tə mda ana hara ka tsi.”