Read bura-pabir Səɓəlari 37 Bible Online

Səɓəlari 37 - bura-pabir bible

Səɓəlari 37

¹Antə Bezalel ku namta akwati ka udzəm akashiya. Saɓəlkurari dzartsi suɗa ka reta, baukurari dzartsi pal ka reta, nalkurari dzartsi pal ka reta.

²Tsa fəi dzari na avivi japu ka na aɓəlaɓəla ka dinar shini, ka dəɓatə mnyari ka dinar.

³Tsa namtə lenduwar dinar nfwar, ka puta ata səlayerari na nfwar ni, lenduwa suɗsuɗa ata kəlara thlimbəlari, na abwani ka na abwanda.

⁴Tsuwa tsa ku namtə zwalayeri ka udzəm akashiya ka hartə ɗa ka dinar,

⁵ka hagau zwalayeri ni akwa lenduwayeri na ata thlimbəla akwati ni kamnyar kəlari.

⁶Antə tsa namtə sur hartə kərari, natə tsa an vəi kələmta watsəɓər biku ni, ka dinar shini. Saɓəlkurari dzartsi suɗa ka reta, baukurari dzartsi pal ka reta.

⁷Tsa namtə dludzər kerubayeri suɗa ka dinar tə mdə ɓdlətə ni, pal pal ata thlimbəlayerari na suɗə ni.

⁸Antə tsa namtə dludzər kerub pal ata thlimbəlari pal, ka damwa pal ata thlimbəlari na dukwari. Tsa namtə ɗa pakpakari ka sur hartə kəra akwati ni.

⁹Antə kəma kerubayeri ni akwa wuldzi, akwa wul sur hartə kəra akwati ni, ka ɓəɓəka ɗa kəlarkəlarari amta akwa hamta shanggur aka sur hartə kəra akwati ni, natə tsa an vəi kələmta watsəɓər biku ni.

¹⁰Antə Bezalel ku namtə tebər ka udzəm akashiya. Saɓəlkura tebər ni dzartsi suɗa, baukurari dzartsi pal, nalkurari dzartsi pal ka reta.

¹¹Antə tsa hartə dzari ka dinar shini, ka dəɓatə tengari shang ka dinar.

¹²Antə tsa namtə udzəm ar kalaktə tenga tebər ni, baukurari apa mandaɓar tsi pal, ka dəɓatə tengari ka dinar.

¹³Tsa namtə lenduwayeri nfwar ka dinar, ka putə ɗa akwa kuɗəmayeri ar tebər ni, akwa vəi tə səlayerari na nfwar ni ata.

¹⁴Lenduwayeri na kəsi zwalər kəl tebər ni, tsa pwi ɗa kudzəhə ka zwal udzəm tebər ni.

¹⁵Tsa nam zwalayeri ar kəl tebər ni ka udzəm akashiya, ka hartə dza ɗa ka dinar.

¹⁶Tsuwa ka dinar shini antə tsa namtə parantiyayeri, ka tasayeri ar mba tulari ɗuza, ka tasayeri na ol'ola, kəga samtalayeri kamnyar ɗamta saɗakar sur sa.

¹⁷Antə Bezalel ku namtə zwalər kəsi pitəlayeri ni ka dinar shini. Tsuwa tsa namtə zwal ni, ka kirari ni, ka kapayeri tə mdə nam akwa dludzər pukdlər almon ni, ata kəma duku ka thləma pukdlə ni, ka ɗəɗarni, shang tə da ndzi ata kəma duku.

¹⁸Tsa namtə zwalər kəsi pitəlayeri ni tə tsa ndzi ka tsiyayerari ngkwa, tsiyayerari makər ata thlimbəlari na abwani, tsiyayerari makər ata thlimbəlari na abwanda.

¹⁹Tsuwa kəlara tsiya zwalər kəsi pitəlayeri ni ka kapayeri makər tə mdə namtə pukdlər almon, japu ka thləma pukdlə ni ka ɗəɗarni.

²⁰Ata dza zwalər kəsi pitəlayeri ka kərni, tsa namtə kapayeri nfwar na dludzə ka pukdlər almon, japu ka thləma pukdlə ni kəga ɗəɗarni.

²¹Tsa namtə pukdlə na haɗa səɓəla pal akwa kira kəlara tsiya zwal ni suɗa, antə da ku ndzi makər akira tsiyayerari na ngkwa ni.

²²Antə pukdlə na haɗa ɗəɗa ni, ka tsiyayerari ni, ka zwalər kəsi pitəlayeri ni, tsa ɓdlətə ɗa ka dinar shini tə ndzi shang su duku.

²³Tsa namtə pitəlayeri murfa kamnyar zwalər kəsi pitəlayeri ni, ka məksa, ka parantiyayeri na ol'ola, shang ka dinar shini.

²⁴Tsa namtə zwalər kəsi pitəlayeri ni, ka kariyayerari shang ka dinar shini, natə kəgəɓkurari ku mwantə kilogram makkumari ka ntəfu.

²⁵Antə Bezalel ku namtə bagaɗi ar mba tulari ɗuza ka udzəm akashiya. Saɓəlkurari dzartsi pal, baukurari dzartsi pal, watau saɓəlkurari ka baukurari shang kalkal. Nalkurari tsuwa dzartsi suɗa. Tsuwa akwa shanga kuɗəmayeri nfwar ar bagaɗi ni tsa ku namtə təmbəl na pakpakari ka bagaɗi ni.

²⁶Tsa hartə dza bagaɗi ni, ka kərari, ka thlimbəlayerari, ka təmbəlayerari shang dinar shini, ka dəɓatə tengari shang ka dinar.

²⁷Antə tsa namtə lenduwayeri suɗa ka dinar, ka dləɓtə ɗa aghəya tenga thlimbəlayerari na suɗə ni, tə da akwa wuldzi. Lenduwayeri ni an ata kəsi zwalayeri ar kəl bagaɗi ni.

²⁸Tsuwa zwalayeri ngəni ni tsa nam ɗa ka udzəm akashiya, ka hartə dza ɗa ka dinar.

²⁹Antə tsa namtə mal ar hamta mda aka Hyel na ɓɗakkarkara, ka tsuwa tulari ɗuza na kiskisu ka duna natə mdə namtə ni akwa laku mdər nam tulari ana hara.