Read bura-pabir Səɓəlari 38 Bible Online

Səɓəlari 38 - bura-pabir bible

Səɓəlari 38

¹Antə Bezalel ku namtə bagaɗi ar hamta saɗaka mbamba ka udzəm akashiya. Saɓəlkur bagaɗi ni dzartsi ntəfu, baukurari dzartsi ntəfu, watau saɓəlkurari ka baukurari shang kalkal. Nalkurari tsuwa an dzartsi makər.

²Antə tsa namtə təmbəl pal pal akwa kəlara kuɗəmayeri na nfwar ar bagaɗi ni tə da ndzi su duku ka bagaɗi ni. Antə tsa hartə dza bagaɗi ni ka əmza.

³Tsuwa tsa ku namtə tughum liya kamnyar tsaptə pənju ar bagaɗi ni, ka tebərayeri ar famta su, ka tasayeri na ol'ola, ka cagwaliyayeri na ka kuleng, ka tasayeri ar hakthlir u'u. Shanga kari kəthlər nayeri ni, tsa nam ɗa ka əmza.

⁴Antə tsa namtə wayar ptsa kum ka liyar əmza, ka vu akwa kuta bagaɗi ni, ka tsa ndzi aghəi akwa retar nalkur bagaɗi ni.

⁵Tsuwa tsa ku namtə lenduwayeri nfwar ata mnya wayar ptsa kum ni, akwa kuɗəmayeri na nfwar ni, kamnyar hagau zwalayeri ar kəl bagaɗi ni.

⁶Tsa namtə zwalayeri ar kəl bagaɗi ni ka udzəm akashiya, ka hartə dza ɗa ka əmza.

⁷Antə tsa hagau zwalayeri ni akwa lenduwayeri na ata thlimbəla bagaɗi ni, kamnyar kəlari. Tsa nam bagaɗi ni ka katakowayeri na baubau, tsa namtə ni ka gula akwa kutari, apa akwati na bwang.

⁸Antə Bezalel ku namtə tasa na ola ka əmza, ka namtə sur vətari ka əmzər kutəramayeri natə mwankir kəthlər akwa nyarmbwar Tentər Kəɓa ni an sənta.

⁹Antə Bezalel ku namtə bəbal na kalaktə Tentər vəngkər səli ni. Tsa namtə lapəliyayeri ka lilin na ɓɗaku kamnyar kəla bəbal na təbwar anəm. Saɓəlkur lapəli ni dzartsi aru pal.

¹⁰Tsa hahəi lapəliyayeri ni ata zhimbwalayeri sərkumari natə mdə nam ka əmza, ka ncimta ɗa ata sur kəsi səla ɗa sərkumari tə mdə nam ka əmza. Mdə nam lenduwar zhimbwalayeri ni ka liyar hatə ɗa shang ka adzərfa.

¹¹Tsuwa mdə ku namtə lapəli kamnyar kəla bəbal na təbwar yala, saɓəlkur lapəli ni dzartsi aru pal. Antə mdə ku hahəi lapəli ni ata zhimbwalayeri ar əmza sərkumari, tə mdə ncimta ata sur kəsi səla ɗa sərkumari tə mdə nam ka əmza. Mdə nam lenduwar zhimbwalayeri ni ka liyar hatə ɗa shang ka adzərfa.

¹²Ata kəla bəbal na təbwar ramta, mdə ku namtə lapəli natə saɓəlkurari dzartsi ntəfkumari. Antə mdə hahəi lapəli ni ata zhimbwalayeri kuma, natə mdə ncimta ata sur kəsi səla ɗa kuma. Mdə nam lenduwar zhimbwalayeri ni ka liyar hatə ɗa shang ka adzərfa.

¹³Ata kəla bəbal na təbwar raghəi tsuwa, atar bwar nyarmbwa ni, mdə ku namtə saɓəlkur lapəli dzartsi ntəfkumari.

¹⁴Saɓəlkur lapəliyir nyarfu na palari dzartsi kumnya ntəfu, ka zhimbwalayerari makər ka sur kəsi səla ɗa makər.

¹⁵Tsu apani antə mdə hara aka nyarfu na palari ni, mdə hahəi lapəli na ka saɓəlkurər ni dzartsi kumnya ntəfu. Tsuwa mdə hahəi lapəli ni ata zhimbwalayeri makər natə mdə ncimta ata sur kəsi səla ɗa na makər ni.

¹⁶Shanga lapəliyayeri natə mdə kalaktə kuta bəbal kəgari ni, mdə tsa ka puwar nggira ar lilin na ɓɗaku.

¹⁷Mdə nam shanga sur kəsi səla zhimbwalayeri ni ka əmza, tar lenduwar zhimbwalayeri ni ka liyar hatə ɗa antə mdə nam ka adzərfa. Mdə hartə kəra zhimbwalayeri ni ka adzərfa.Tsuwa shanga zhimbwalayeri na kalaktə bəbalər Tent ni mdə namtə sur kəsi səla ɗa ka adzərfa.

¹⁸Nyarfu ar ləkwa bəbal ni, mdə namta alari lapəli na ka saɓəlkurari dzartsi sərkumari, ka baukurari dzartsi ntəfu, kalkal ka lapəliyir kəla bəbal ni. Tsuwa mdə dəɓatə lapəli ni ka ndəɓur tsi tə mdə hara ka puwar tsa su na lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku.

¹⁹Antə mdə hahəi lapəliyayeri ni ata zhimbwalayeri nfwar, na ka sur kəsi səla ɗa nfwar tə mdə nam ka əmza, ka liyar hatə lapəliyayeri ni ka əmza. Tsuwa mdə nam kəra zhimbwalayeri ni ka liyayeri na akwa shang ka adzərfa.

²⁰Antə shanga makukwar nci Tent ni ka na ar nci kəla bəbalər Tent ni mdə hara ɗa purəm ka əmza.

²¹Nayeri ni an hangkur suayeri tə mdə hara kəthlər kəgari akwa nam Tentər vəngkər səli, watau vəi tə mdə vəi allowayeri ar Alkawal, natə da an allowayeri ar Tsawayeri na Kum ni. Musa ku tsawa abbər ka mdə səndə hangkurari, antə mjir Lawi ku jikatə hangkurari akira mdər pwar ɗa, Ithlamar na ɓzər Haruna na prist.

²²Antə Bezalel na ɓzər Uri kəkar Hur, na akwa nyarmbwar Yahuda ku haratə shanga su tə MTHLAKU ku tsawa aka Musa.

²³Mdə na hara kəthlər ata kəma duku ka tsa an Oholiyab na ɓzər Ahisamak na akwa nyarmbwar Dan. Tsa masəku akwa hara kəthlər tsi apa ɗaha, marəmta pela, ka ndəɓur dəɓa ar tsi ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku.

²⁴Kəgəɓkur shanga dinar natə mji tsaptə kamnyar ka mdə kəthlər kəgari akwa la Tentər vəngkər səli aka MTHLAKU ni an kilogram dəpu pal, ata sur ngkər su tə mda ana kəthlər kəgari akwa Vəi na Ɓɗakkarkara ni.

²⁵Hangkur adzərfa natə mji tsapta an kilogram dəpu makər ka aru nfwar ka makkumari, ata sur ngkər su tə mda ana kəthlər kəgari akwa Vəi na Ɓɗakkarkara ni.

²⁶Shanga mji natə mdə ku jikata, natə məva ɗa ku hara sərkumari har ka ləmta, ku hamta retar aunar adzərfa, ata sur ngkər su tə mda ana kəthlər kəgari akwa Vəi na Ɓɗakkarkara ni. Antə hangkur mji ni ku mwantə mji shili dəpu aru ngkwa ka makər, ka aru ntəfu ka ntəfkumari.

²⁷Mdə ku hara kəthlər ka adzərfa ar kilogram dəpu makər ka aru nfwar akwa sur kəsi səla zhimbwalayeri ka udzəmər hahəi lapəliyayeri ar Tent ni. Mdə kəthlər ka adzərfa ar kilogram makkumari ka nfwar akwa kəlara sur kəsi səla zhimbwal pal.

²⁸Mbila adzərfa na kilogram makkumari ni, Bezalel shamta akwa nam liyayeri ar hatə lapəli na ata zhimbwalayeri, ka kəra zhimbwalayeri, ka liyayeri.

²⁹Əmza natə mji hamta ku hara kilogram dəpu suɗa ka aru nfwar ka sərkumari ka ntəfu.

³⁰Antə mdə ku kəthlər kəgari akwa nam sur kəsi səla zhimbwalayeri ar nyarmbwar ləkwa Tentər Kəɓa ni, ka bagaɗi saɗaka ni, ka wayar ptsa kum ni, ka shanga kari bagaɗi saɗaka ni,

³¹ka sur kəsi səla zhimbwalayeri tə mdə ncimta akwa kəla bəbalər Tent ni, ka na ar nyarfur ləkwa bəbal Tent ni, ka shanga makukwayeri ar nci Tent ni, ka na ar nci kəla bəbal ni.