Read bura-pabir Səɓəlari 39 Bible Online

Səɓəlari 39 - bura-pabir bible

Səɓəlari 39

¹Mdə tsatə ləptayeri ar mjir kəthlər akwa Vəi na Ɓɗakkarkara ni ka puwa lipəla, ka na kalar yar ndləngi həng'ha, ka puwa mamza, ka dəɓatə ɗa ɓɗaku. Mdə tsatə ləptayeri na ɓɗakkarkara aka Haruna, akwa laku tə MTHLAKU tsawa aka Musa.

²Mdə tsatə efod ni ka puwar dinar, ka na lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku.

³Mdə tasəmta dinar tə tsa ndzi thlaptar apa zhaɓi, ka ntəntau ni miɗiɗi apa puwar nggira, ka mnyar paktə tsatə ɗa ata kəma duku ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku. Antə mdə ku tsatə ni ɓɗak laga.

⁴Mdə namtə səwa ata mnya efod ni kamnyar hahəi efod ni ata pathlaha mda, antə mda ata kadləɓəla səwayeri ni ka mdə ndəli amta.

⁵Tsuwa mdə na masəkur tsa su an tsatə sur mbwidzi, mdə tsatə tsu akwa laku tə mdə tsa efod ni, watau ka puwar dinar, ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku, tsu akwa laku tə MTHLAKU tsawa aka Musa.

⁶Antə mdə fatə pela daraja suɗa ar oniks ka rubwamta thləma maɗa' Israila ata da, akwa laku tə mdər mar pela daraja ana ɗahəi seɗa ata pela. Antə mdə pu ɗa akwa kur dinar tə mdə namta.

⁷Antə mdə dləɓtə ɗa ata sur hahəi efod ni ata pathlahəu, kamnyar ka da ndzi pelar ɗangtə maɗa' Israila, apatə MTHLAKU ku tsawa aka Musa.

⁸Antə mdə ku namtə zhaɓər dlipwayeri ar kərathlu. Mdə nam ni tsu akwa laku tə mdə nam efod ni, watau ka puwar tsa su ar dinar, ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku. Antə mdə tsatə ni ɓɗak laga.

⁹Zhaɓi tə mdə tsatə ni shanga thlimbəlayerari kalkal kəga nvwa ɗa, watau saɓəlkurari mandaɓar tsi pal, baukurari mandaɓar tsi pal. Tsuwa mdə paktə ni nca kəma suɗa, kamnyar ka tsa ndzi dlipur kərathlu na ar efod.

¹⁰Antə mdə putə layi nfwar ar pela daraja ata. Nggədza laku tə mdə pau pelayeri ni akwa, “Akwa layi na ntangkəma, karneliyan, ka topaz, ka emeral.

¹¹Akwa layi na suɗkur, emeral, ka sapfiya, ka daimon.

¹²Akwa layi na makərkur, yasinth, ka agat, amethlis.

¹³Akwa layi na nfwarkur, beril, ka oniks, ka jaspa.” Tsuwa kəlara pela mdə vu ni akwa ku tə mdə nam ka dinar.

¹⁴Tsuwa mdə ku rubwamta thləma maɗa' Israila na kumnya suɗə ni ata nyarmbwa ata nyarmbwa, ata pelayeri ar daraja ngəni kumnya suɗə ni. Mdə thlaɓəla thləma ɗa ata pela ni apa seɗa ar tsiya kuthli.

¹⁵Antə mdə namtə sarka ka dinar shini, kamnyar hahəi zhaɓər dlipwayeri ar kərathlu ni.

¹⁶Antə mdə namtə kuayeri laga ka dinar vəyari suɗa, ka namtə lenduwayeri suɗa ka dinar tsuwa, natə mdə pwi akwa kuɗəmayeri suɗa na amta ar zhaɓər kərathlu ni.

¹⁷Antə da ku dləɓta sarkar dinar na suɗə ni ata lenduwayeri na ata kuɗəmar zhaɓər dlipwayeri ar kərathlu ni.

¹⁸Antə mdə ku paktə mnya sarka na suɗə ni ata mnya kur dinar na mbili suɗə ni, ka putə ɗa ata sur hahəi su na suɗa abwakəma zhaɓər kərathlu ni.

¹⁹Antə mdə namtə lenduwa damwa suɗa ka dinar, ka putə ɗa ata mbila kuɗəmayeri suɗa, aghəi avivi adzə zhaɓər kərathlu ni.

²⁰Antə mdə jaktə namtə lenduwa damwa suɗa ka dinar, ka putə ɗa pal pal ata sur hahəi zhaɓər kərathlu ni təbwakəma, aghəya japwa pathlaha efod, kudzəhə ka vəi kəɓar ɗa ka sur mbwadzi tə mdə tsatə ɓɗaku ni.

²¹Mdə mbwahə zhaɓər kərathlu ni atar mbwahə lenduwar zhaɓə ni ka lenduwar efod ni ka səwu lipəla. Mdə hara apani kamnyar ka zhaɓər kərathlu ni pəpəi ləpu kula mpələmtadzi kazhar efod ni, tsu akwa laku tə MTHLAKU tsawa aka Musa.

²²Mdə tsatə ləptu laga saɓəl na kalar lipəla swakti, ka hangkər efod.

²³Mdə thlaɓəla wulya ləptu ni ka tsatə mnyari tə tsa ndzi kəkəsu, ta tsa asə kwaha.

²⁴Antə mdə dəɓatə mnya ləptu ni ka dludzər yar rumman ka puwar tsa su na lipəla, ka na kalar ndləngi həng'ha, ka puwa mamza, ka puwar nggira ar lilin na ɓɗaku.

²⁵Tsuwa mdə ku ɓdlətə kyangkyangayeri ka dinar shini, ka patə ɗa akwa layi, watau aghəla kəlara yar rumman pal, mda mbwatə kyangkyang pal. Apani antə mdə hara har ka kalaktə mnya ləptu ni ka da.

²⁶Antə mdə patə ɗa shang akwa layi, ngəni akwa nu ghəla nvwa ni, watau aghəla kəlara dludzər yar rumman pal mdə mbwatə kyangkyang pal. Antə mdə hara apani har ka kalaktə mnya ləptər kəthlər ni ka da, tsu akwa laku tə MTHLAKU tsawa aka Musa.

²⁷Antə mdə tsatə ləptu na kwadangari ɓɗak laga ka lilin na ɓɗaku aka Haruna kəga maɗashilərni.

²⁸Antə mdə tsatə dzakwar prist, ka dzakwayeri na raka raka, ka hwandauwayeri na kwadang kwadang, shang ka lilin na ɓɗaku.

²⁹Antə mdə tsatə sur mbwadzi ni ka puwar nggira ar lilin na ɓɗaku, ka puwar lipəla, ka na kalar yar ndləngi həng'ha, ka puwa mamza, kalkal apatə MTHLAKU tsawa aka Musa.

³⁰Antə mdə namta allo laga raka ka dinar shini, ka mbuta ata dzakwa na ɓɗakkarkara ar prist. Tsuwa mdə ku thlaɓəla rəbutə laga apa seɗar kuthlikur ata allo ni abbər, “MDƏ KU HAMTA NI ƁƊAKKARKARA AKA MTHLAKU.”

³¹Antə mdə ndəltə səwu laga tə mdə tsa ka puwa lipəla ata allo na raka ni, kamnyar ka mdə mzhi mbwatə ni ata dzakwar prist ni, apatə MTHLAKU ku tsawa aka Musa.

³²Apani antə mdə ku kuri shanga kəthlərayeri ar Tentər Kəɓa ni. Mjir Israila ku hara shanga su apa tə MTHLAKU ku tsawa aka Musa.

³³Antə da səntə shanga suayeri ni aka Musa. Da sənta alari Tent ni ka shanga kari kəthlərari, ka liyayeri ar hatə su arni, ka udzəmayerari, ka zwalayerari, ka zhimbwalayerari ka sur kəsi səla ɗa,

³⁴ka sur hartə kəra Tent tə mdə nam ka kəsəm gamayeri tə mdə tatə mamza, ka sur hartari na aɓəlaɓəla tə mdə namtə ka kəsəm na ɓɗaku, ka lapəli na ola ar Vəi na Ɓɗakkarkara,

³⁵ka Akwati Alkawal ka zwalayerari, ka sur hartə mnyari, watau vəi kələmta watsəɓər biku,

³⁶ka tebər ka shanga kariyayerari, ka Buradi tə Mdə Ku Hamta,

³⁷ka zwalər kəsi pitəlayeri tə mdə nam ka dinar shini, ka pitəlayerari, ka shanga kariyayerari, ka mal ar pitəlayeri ni,

³⁸ka bagaɗi tə mdə nam ka dinar, ka mal ar hamta mda aka Hyel, ka tulari ɗuza na kiskisu, ka lapəli ar nyarmbwar Tent ni,

³⁹ka bagaɗi tə mdə nam ka əmza, ka wayari tə mdə nam ka əmza kamnyar ptsa kum, ka zwalayerari, ka shanga kariyayerari, ka tasa na ola ka sur vətə ni,

⁴⁰ka lapəliyayeri ar bəbalər Tent ni, ka zhimbwalayerari, ka sur kəsi səla ɗa, ka lapəliyir nyarfur ləkwa bəbalər Tent ni, ka suwayerari, ka makukwayerari, ka shanga kari kəthlər akwa Tentər Kəɓa ni,

⁴¹ka ləptayeri tə mdə nduɓtə ɓɗaku ka tsi kamnyar hara kəthlər akwa vəi na Ɓɗakkarkara, ka ləptayeri na ɓɗakkarkara aka Haruna na prist, ka ləptayeri ar maɗashilərni kamnyar kəthlər pristkur.

⁴²Apani antə mjir Israila ku kuri shanga kəthlər ar Tent ni kalkal apatə MTHLAKU ku tsawa aka Musa.

⁴³Sakatə Musa ku wulhə shanga kəthlər ni, ka wuta abbər jiri shanga su ku ndzi kalkal apatə MTHLAKU ku tsawa, antə Musa ku vədza ala ɗa barka.