Read bura-pabir Səɓəlari 40 Bible Online

Səɓəlari 40 - bura-pabir bible

Səɓəlari 40

¹Antə MTHLAKU pəla aka Musa.

²“Akwa vira thliya ntang ar thliya na ntangkəma ka gə nci Tentər Kəɓa ni.

³Vu Akwati Alkawal ni akwa, ka gə nggamta ni ka lapəli.

⁴Ka gə səntə tebər ni akwa, ka gə ɗəmhə shanga kariyayeri arni kalkal ata kər. Ka gə səmbwa ka zwalər kəsi pitəlayeri, ka gə putə pitəlayeri ni akwa vəi ndzəndziyir ɗa.

⁵Ka gə vəi bagaɗi ar dinar kamnyar mba tulari ɗuza akəma Akwati Alkawal ni, aghəla nda ka gə hahəi lapəli akwa nyarmbwar Tent ni.

⁶Ka gə vəi bagaɗi ar hamta saɗaka mbamba ni anyarmbwar Tentər Kəɓa ni.

⁷Tsuwa ka gə vəi tasa na ola tə mdə nam ka əmza ni akwa daɓwa Tentər Kəɓa ni ka bagaɗi ni, ka gə nghyantə ni ka yimi.

⁸Ka gə ncimta zhimbwalayeri na ata kalaktə bəbal ni, ka hahəi lapəliyayeri ata da, kambəla gə hahəi lapəliyir nyarfur ləkwa kuta bəbal ni.”

⁹“Ka gə kətə mal ar hamta mda aka Hyel, ka gə pshitə dza Tent ni, ka shanga kariyayeri na akwa kutari. Ka gə hamta ni ali ka shanga kariyayeri na akwa kutari. Atar apani antə da ata ndzi ɓɗakkarkara.

¹⁰Tsuwa ka gə pshitə mal ni aka bagaɗi mbamba ka shanga kariyayerari, ka gə hamta ni ali ka tsa ndzi ɓɗakkarkara. Apani antə bagaɗi ni ata ndzi ɓɗakkarkara ka duna.

¹¹Tsuwa ka mdə pshitə tasa na ola ka sur vətari ka mal ar hamta mda aka Hyel, ka gə hamta ni ali.”

¹²“Ka gə səntə Haruna ka maɗashilərni anyarmbwar Tentər Kəɓa, ka mdə pərantə ɗa ka yimi.

¹³Ka gə hatə ləptayeri na ɓɗakkarkara aka Haruna, ka ɗangkər mal ni ata kərari, ka gə hamta ni ali, kamnyar ka tsa mzhi hara kəthlər pristkur ali.

¹⁴Ka gə səntə maɗashilərni akəma, ka gə hata ala ɗa ləptayeri na kwadang kwadang.

¹⁵Ka mdə ɗangkər mal ni ata kəra ɗa tsu akwa laku tə gə hara aka baba' ɗa, kamnyar ka da hara kəthlər pristkur ali. Atar mal ngəni tə mdə ɗangkər ala ɗa ni, mdə ku namtə ɗa tə da ku ndzi zum kamnyar hara kəthlər ar pristkur ba saka madi akwa shanga zamanayeri arɗa.”

¹⁶Antə Musa ku hara shanga su kalkal apatə MTHLAKU ku tsawa alari.

¹⁷Antə akwa vir na ntang ar thliya na ntang akwa məva na suɗkur, antə mdə nci Tentər vəngkər səli ni.

¹⁸Antə Musa thlentə Tent ni. Tsa nci sur kəsi səla udzəmayeri, ka thlentə udzəmayerari ata, ka putə udzəm kadləngkər, ka thlentə zhimbwalayerari.

¹⁹Antə tsa pungkər sur hartə kəra Tent ni, ka pungkər sur hartə kərari na aɓəlaɓəla ni kalkal apatə MTHLAKU ku tsawa alari.

²⁰Antə tsa kəta allowur Seɗar Alkawal, watau Tsawayeri na Kuma ni, ka vu akwa Akwati Alkawal ni. Antə tsa fatə zwalayeri ka hagau akwa lenduwayeri ar akwati ni, ka hartə ka sur hartə kərari, watau vəi kələmta watsəɓər biku.

²¹Antə tsa ləmbwa ka Akwati Alkawal ni akwa Tentər vəngkər səli, ka mbugəi lapəli kamnyar nggamta kəma Akwati Alkawal, kalkal apatə MTHLAKU ku tsawa alari.

²²Antə Musa vəi tebər ni akwa Tentər Kəɓa təbwar yala ka Vəi Na Ɓɗakkarkar ni, akəma lapəli na ola,

²³ka patə Buradi tə Mdə Hamta aka MTHLAKU ni ata kəra tebər ni, kalkal apatə MTHLAKU ku tsawa alari.

²⁴Antə tsa vəi zwalər kəsi pitəlayeri ni akwa Vəi na Ɓɗakkarkara təbwar anəm, awul tebər ni.

²⁵Antə tsa njiu u'u akwa pitəlayeri akəma MTHLAKU, kalkal apatə MTHLAKU ku tsawa alari.

²⁶Antə tsa vəi bagaɗi dinar ni akwa Vəi na Ɓɗakkarkara abwakəma lapəli na ol ni,

²⁷ka mba tulari ɗuza na kiskisu, kalkal apatə MTHLAKU ku tsawa.

²⁸Antə tsa kətə lapəli ni ka mbwi akwa nyarmbwar ləkwa Tent ni,

²⁹ka kətə bagaɗi mbamba ni ka vəi anyarmbwar Tent ni, ka hamta saɗaka mbamba, ka ar mpwa, kalkal apatə MTHLAKU ku pəla alari.

³⁰Antə tsa kətə tasa na ola ka vəi akwa daɓwa Tentər Kəɓa ka bagaɗi ni, ka nghyantə ka yimər kəcudzi,

³¹natə Musa, ka Haruna ka maɗa'ni ana kəcimta tsiya ɗa ka səla ɗa kəgari.

³²Da ana kəcimtadzi kəlara sakatə da ləkwa Tentər Kəɓa, ka sakatə da ku mwari adzə bagaɗi ni, kalkal apatə MTHLAKU ku tsawa aka Musa.

³³Antə Musa ku ncigəi zhimbwalayeri na kalaktə bəbal tə Tent ka bagaɗi akwa ni, ka hahəi lapəli akwa nyarfur ləkwa ɓəɓal ni. Apani antə Musa ku kuri kəthlər ni.

³⁴Antə dlamba na kəkəsu ku hartə Tentər Kəɓa, tə parakər səliyir MTHLAKU ku nghyantə Tent ni.

³⁵Musa aɗi mzhi ləkwa Tentər Kəɓa ni wa, kamnyar dlamba na kəkəsu ku səghəi ata kəra Tent ni, parakər səliyir MTHLAKU ku nghyantə Tent ni.

³⁶Akwa shanga mwayeri arɗa, kəlara sakatə dlamba na kəkəsu ni ku thlatə kazhar kəra Tent ni, mjir Israila ana thlatə kazhar vəi fəliyir ɗa ni ka psi laku.

³⁷Ma dlamba ni aɗi thlatə kazhar kəra Tent ni wa, da ma da aɗi ata thlatə wa, tar vir tə tsa ku thlata.

³⁸Kamnyar akwa shanga mwar ɗa, dlambar MTHLAKU ni ana ndzi ata kəra Tent ni təpci, ma aviri tsuwa u'u andər ndzi akwa dlamba ni ata nca shanga mjir Israila.