Read bura-pabir Səɓəlari 6 Bible Online

Səɓəlari 6 - bura-pabir bible

Səɓəlari 6

¹Antə MTHLAKU pəla aka Musa, “Kulini ga ata wutə su tə I ata hara aka kuthli. I ata vu ni dwali ka tsa zhar mjirna ka da təra. Kula nuhum, I ata kəthlər ka duni kəi vu ni dwali ka tsa kədləɓəla ɗa kazhar tsəɗiyirni.”

²Hyel ku jaktə gari aka Musa ka pəla, “I an MTHLAKU.

³Aka Ibrahim, ka Ishaku, ka Yakub, I ku ncantə kərna Hyel na ka duna ta shang. Amma karapur thləmi MTHLAKU ni, I aɗi hara tə da səndə wa.

⁴I ku hara alkawal ala ɗa tsuwa abbər I ata hamta ala ɗa tsəɗi Kanana, tsəɗi tə da ku ndzi mətəpi akwa.

⁵Kulini I ku nggatə nggyinggyir mjir Israila, mji tə mjir Masar namtə ɗa ka mafa. Tsuwa I ku ɗangtə alkawalərna.

⁶Antə kara pəla aka mjir Israila abbər, ‘I an MTHLAKU. Antə I ata fwaɓəla giri akwa bwani tə mjir Masar akwa hara ala giri, kəi msərantə giri akwa mafakur tə giri akwa harari ala ɗa. I ata pəli giri atar surndatayeri na ol'ola kəi thlamta shariya na mwavər ata kəra ɗa.

⁷I ata namtə giri ka giri ndzi mjirna, antə I ata ndzi Hyelər giri. Antə giri ata sənda abbər I an MTHLAKU na Hyelər giri na msərantə giri akwa mafakur akira mjir Masar.

⁸Antə I ata səntə giri akwa tsəɗi tə I kətə alkawal abbər I ata hamta aka Ibrahim, aka Ishaku ka aka Yakub. I ata na giri tsəɗi ni ka tsa ndzi ar giri ka mnya giri. I an MTHLAKU.’ ”

⁹Antə Musa ku pəla ndər ngəni aka mjir Israila, amma da aɗi psi thləm alari wa, kamnyar dza ɗa ku mti ka duna ata kəra mwavərkur mafakur tə da akwa.

¹⁰Aghəla nda antə MTHLAKU pəla aka Musa,

¹¹“Mwari kara pəla aka kuthlir Masar abbər ka tsa zhar mjir Israila ka da ləɓəla kazhar tsəɗiyirni.”

¹²Amma Musa shinau aka MTHLAKU abbər, “Wula, təng tə mjir Israila aɗi psi thləm ali wa, apa madi tə kuthli an ata psi thləm ali ri, I natə mnyi ana pəlaɓəla su wa?”

¹³Antə MTHLAKU gari aka Musa ka Haruna, ka tsawa ala ɗa abbər, “Ngka giri adzə mjir Israila ka kuthlir Masar, ka giri pəla ala ɗa abbər I ku na giri laku, ka giri fwaɓəla mjir Israila kazhar tsəɗi Masar.”

¹⁴Nayeri ni an mji na ol'olər kutakəyayeri na akwa nyarmbwar Israila. Maɗashilər Ruben na yarakəma Israila, da an Hanok, ka Pallu, ka Hezron, ka Karmi. Da an nyarmbwar Ruben.

¹⁵Maɗashilər Simeyon an Yemuwel, ka Yamin, ka Ohad, ka Yakin, ka Zohar, ka Shawulu natə ngkwar Kanana an ya ni, Da an nyarmbwar Simeyon.

¹⁶Nayeri ni an thləma maɗashilər Lawi ata ola ata ola. Da an Gershon, ka Kohath, ka Merari. Lawi ku hara məva aru pal ka makkumari ka murfa akwa ndzəndziyir mpikari.

¹⁷Maɗashilər Gershon an Libni, ka Shimeyi na yangkura ɗa.

¹⁸Maɗashilər Kohath an, Amram, ka Izhar, ka Hebron, ka Uzziyel. Antə Kohath ku hara məva aru pal ka makkumari ka makər akwa ndzəndziyir mpikari.

¹⁹Maɗashilər Merari an Mahli, ka Mushi. Da an nyarmbwar Lawi akwa zamanayeri arɗa.

²⁰Amram ku kəl Yokebed na ngkwarma' baba'ni, antə tsa ku yaɓəla alari Haruna ka Musa. Amram ku hara məva aru pal ka makkumari ka murfa akwa ndzəndziyir mpikari.

²¹Maɗashilər Izhar an Kora, ka Nefeg, ka Zikri.

²²Maɗashilər Uzziyel an Mishayel, ka Elzafan ka Sithri.

²³Haruna ku kəl Elisheba na ngkwar Amminadab tsuwa ngkwarma' Nashon. Antə tsa ku yaɓəla alari Nadab, ka Abihu, ka Eleyazar, ka Ithlamar.

²⁴Maɗashilər Kora an Assir, ka Elkana, ka Abiyasaf. Da an nyarmbwar Kora.

²⁵Eleyazar na ɓzər Haruna ku kəl pal akwa nca maɗankwiyir Putiyel. Antə tsa ku yaɓəla alari Finehas. Da an mji ol'ola na akwa nyarmbwar Lawi waskəi ka kutakəyirni.

²⁶Nayeri ni an Haruna ka Musa natə MTHLAKU ku gari ka da abbər, “Ka giri fwaɓəla mjir Israila akwa Masar atar nyarmbwa ata nyarmbwa.”

²⁷Da an mji na gari aka kuthlir Masar kamnyar ka tsa psi mjir Israila ka da ləɓəla kazhar Masar.

²⁸Sakatə MTHLAKU gari aka Musa,

²⁹akwa tsəɗi Masar tsa pəla, “I an MTHLAKU. Ka gə pəla aka kuthlir Masar shanga su tə I pəla ala ga.”

³⁰Amma Musa pəla aka MTHLAKU abbər, “Ai mnyi ana mzhi pəlaɓəla su wa. Antə apa madi tə har kuthli ni ata sə psi thləm ali ri?”