Read bura-pabir Səɓəlari 8 Bible Online

Səɓəlari 8 - bura-pabir bible

Səɓəlari 8

¹Aghəla nda antə MTHLAKU pəla aka Musa, “Mwari adzə kuthli kara pəla alari, ‘Zhar ka mjirna təra, ka da ra vəngkər səli ali.

²Ma ga ku nggəlar ta psi ɗa, I ata ɗi tsəɗiyir nga, I ata hartə shanga tsəɗiyir nga ka hwambayeri.

³Nayil ata nghyi ka hwambayeri har ka da puɓəladzi ka mwari akwa kəi kuthlikur ar nga, ka mwari ba akwa mbwar piyir nga, ka ata dəkələr nga, ka ləkwa kəyir kwakunayeri ar nga ka shanga kəyayeri ar mjir nga. Tsuwa da ata ləkwa lindayeri ar nga, kəga kwatamər susəmər nga.

⁴Hwambayeri ni ata fəltə nga, kəga kwakunayeri ar nga, ka shanga mjir nga.’ ”

⁵Antə MTHLAKU pəla aka Musa, “Pəla aka Haruna ka tsa haptə tsiyari na ka zwalər ɓəla ni ka tsa ndərari ata kəra thlyaghayeri, ka thluhwayeri, kufayeri, ka tsa hara ka hwambayeri ni səɓəla ka da hartə tsəɗi Masar.”

⁶Antə Haruna ku ndərar tsiyari na ka zwal ni ata kəra yimayeri na akwa tsəɗi Masar, tə hwambayeri ku ləkəma ka puɓəladzi ka hartə tsəɗi Masar.

⁷Amma ɗeaghayeri tsuwa ku hara ɗeaghakurər ɗa ka səɓəla ka hwambayeri ata kəra tsəɗi Masar.

⁸Antə kuthli ni kəga Musa ka Haruna ka pəla ala ɗa, “Kiɗə gir MTHLAKU ka tsa famta hwambayeri ni kazhar ra kəga mjirna, antə I ata zhar mjir ngə ni ka da təra ra hamta saɗaka aka MTHLAKU.”

⁹Antə Musa pəla aka kuthli ni, “I ku kələngkəri. Ka barkar nga thlamta ali saka natə kəi hara adduwa kamnyar nga, ka kwakunayeri ar nga, ka mjir nga, kamnyar ka hwambayeri ni ndəkə ka giri, kəga kutakəyir giri. Wala ma na ata mbila, ka data akwa Thlyagha Nayil.”

¹⁰Antə kuthli ni pəla, “Ata ndzi ɗəpa.” Antə Musa pəla, “Ɓɗaku! I ata harari apa su tə gə pəla. Antə ga ata sənda abbər Hyel damwa aɗi apa MTHLAKU na Hyelər yeru ni wa.

¹¹Antə shanga hwambayeri ni ata ndəkəmtadzi ka ga, ka kwakunayeri ar nga, ka mjir nga. Hwamba na ata mbila an tar na akwa Nayil daci.”

¹²Aghəla tə Musa ka Haruna ku ləɓəla kazhar kuthli, antə Musa ku kiɗə ka tuwa aka MTHLAKU abbər ka tsa famta hwambayeri tə tsa ɗi kuthli kəgari ni.

¹³Antə MTHLAKU ku hara apatə Musa ku kiɗa. Antə hwambayeri na akwa kutakəyayeri, ka na akwa bəbalayeri na kalaktə kutakəi, ka na akwa mtakayeri shang ku mtəgəmtadzi.

¹⁴Antə mdə ku tsaptə mshiyir hwambayeri ni mbwa mbwa, antə da ku hartə tsəɗi ni ka shiwur na ɗimi.

¹⁵Sakatə kuthli wuta abbər hwambayeri ni ku mtəgəmtadzi antə tsa jaktə hara kər ɓəɓalkur. Tsa aɗi psi thləm aka Musa ka Haruna wa, kalkal apatə MTHLAKU pəla.

¹⁶Antə MTHLAKU pəla aka Musa, “Pəla aka Haruna ka tsa haptə zwalərni ka tsa tsa bərbər di kəgari antə shanga bərbər na akwa Masar ata shin ka jangkar.”

¹⁷Antə Musa ka Haruna ku hara tsu apatə mdə pəla ala ɗa. Haruna ku haptə tsiyari na ka zwal ni ka tsa bərbər di ka zwal ni, antə jangkar ku si ata dza mji kəga mwaɓi. Shanga bərbər na akwa tsəɗi Masar ni shin ka jangkar.

¹⁸Antə ɗeaghayeri ni ku hara ɗeaghakurər ɗa abbər ka jangkar wutədzi tsuwa, amma da aɗi mzhi wa. Antə jangkarayeri ku pungkərdzi ata kəra mji kəga mwaɓi shang.

¹⁹Antə ɗeaghayeri ni pəla aka kuthli ni abbər, “Diya, dunar Hyel akwa su ngəni.” Amma kuthli ni ku namtə ɗəffari ɓəɓal, antə tsa aɗi psi thləm aka Musa ka Haruna wa, kalkal apatə MTHLAKU pəla.

²⁰Antə MTHLAKU pəla aka Musa ka tsa thlatə ɗəɗəpə mbing, ka tsa mwari adzə kuthli ata sakatə kalkal tsa akwa mwari akwa zərkəu, ka gə pəla alari, “MTHLAKU pəla, ‘Zhar mjirna ka da təra, ka da ra vəngkər səli ali.

²¹Ma ga aɗi zhar ɗa ka da təra wa, I ata thlentə dlamar ciri ata kəra ga, ka kwakunayeri ar nga, ka mjir nga. Tsuwa shanga kəyir mjir Masar ata nghyantədzi ka ciri, har ka cirayeri ni hartə kəra di tə da ana mwa ata.

²²Amma ar tsəɗi Goshen, vəi tə mjirna ata, ndərari ata ndzi zum, ciri aɗi ata wutədzi anda wa. Apani antə ga ata sənda abbər I na MTHLAKU, I ka duna akwa tsəɗi ngəni.

²³Apani I ata vu kəla akwa daɓwa mjirna ka mjir nga. Antə ga ata wutə seɗar surndatə ngəni ɗəpa.’ ”

²⁴Tsuwa apani antə MTHLAKU ku hara. Tsa thlentə dlamar ciri tə da puvidzi akwa kəyir kuthli, ka kəyir kwakunayeri arni, ka akwa kəlara vəi na akwa tsəɗi Masar. Antə tsəɗi Masar ku hilantədzi kamnyar nggəukur ciri.

²⁵Antə kuthli ku kəgatə Musa ka Haruna ka pəla ala ɗa, “Mwar giri, ka giri hamta saɗaka aka Hyelər giri tsu azi akwa tsəɗi ni.”

²⁶Amma Musa pəla, “Apani aɗi ata ndzi kalkal wa. Kamnyar saɗakayeri tə yeru ata hamta aka MTHLAKU na Hyelər yeru ni ata ndzi sur cika aka mjir Masar. Antə ma yeru hamta saɗakayeri ngəni azi ata nca ɗa, da aɗi ata ndzəndzəh yeru ka pela wa ya?

²⁷Dwali ka yeru mwa mnyar vir makər akwa mtaku kamnyar ra hamta saɗaka aka MTHLAKU na Hyelər yeru tsu apatə tsa ku tsawa ala yeru.”

²⁸Antə kuthli ni pəla, “I ata zhar giri ka giri mwari ra hamta saɗaka aka MTHLAKU na Hyelər giri akwa mtaku, amma giri aɗiya mwari ciju akwa mtaku wa. Antə kulini mwa giri ja ka giri hara ali adduwa.”

²⁹Antə Musa pəla, “Təkəma ma I ku ləɓəla azi, I ata hara adduwa aka MTHLAKU kamnyar ɗəpa ka cirayeri ni təra kazhar nga, ka kwakunayeri ar nga, ka mjir nga shang. Amma ga aɗiya jaktə pwaktə yeru, ka ngkatə yeru mwari akwa hamta saɗaka aka MTHLAKU wa.”

³⁰Antə Musa ku təra kazhar kuthli ni, ka təra ra hara adduwa abbər ka MTHLAKU famta cirayeri ni.

³¹Antə MTHLAKU ku hara apatə Musa ku kiɗa. MTHLAKU ku famta cirayeri ni kazhar kuthli, ka kwakunayeri arni, ka mjirni shang. Wala ciri duku aɗi mbili akwa tsəɗi ni wa.

³²Amma wala apani, akwa saka ngəni kuthli ku jaktə hara kər ɓəɓalkur, tə tsa aɗi zhar ka mjir Israila ni təra wa.