Read bura-pabir Ayuba 10 Bible Online

Ayuba 10 - bura-pabir bible

Ayuba 10

¹“I aɗi ata bara ndzi ka mpikə kəra wa. I ata psi hangkali kəi gari apatə I ata barari, kəi pəla su na akwa damitə mpikəi.

²I ata pəla aka Hyel, ‘Ga aɗiya nggəlar ra kula suari aɗi wa, pəla ali su na hara tə ga aɗi akwa hir ra wa ni.’

³Man riɓa tə ga ana wuta akwa hara bwani aka mji, rutəmta su tə ga an nam ka tsiya ga, ka hu su tə mji na ɗimi an hara nə ri?

⁴Ga ana wul su apatə mdə na kum ka mamshi ana wul su akwa ya?

⁵Mpika gə kwadang apa mpika mdə ya, nənga məva gə kalkal ka məva mdə ri?

⁶Har tə ga akwa bara kara wutə vəi sharna, ka bara wutə vəi ɗimikurərna ri?

⁷Wala tə ga asənda abbər I kula biku, mdər mzhi mbuli ra akwa tsiya ga aɗi wa.

⁸Gan həntə ra ka namtə ra ka tsiya ga, amma kulini ga ku shinardzi akwa hilantə ra.

⁹Ɗangtə bu abbər ka həi antə gə namtə ra, antə kulini ga ata jaktə shinantə ra ka bərbər ya?

¹⁰Ga ku ɗau ra apa uwa akwa kuta mama'na, ka vu tə dzi baɗitə kəla akwa kutari.

¹¹Ga ku mbwahə ɗethlayeri arna ka pərɗayeri, ka hartə ɗa ka kum ka kəsəm.

¹²Ga ku ni mpika ka hir ra ka hirkur na ana palidzə wa, ka tsəlpitə ra, ka zhar ra ka mpika.

¹³Amma kulini I ku nggaɓəla abbər təng ɗəm, ga ku ɗəmhədzər hara ali su nayeri ni.

¹⁴Ma I ku hara biku, ga ana putə nca ga ata iya, tsuwa ga aɗi ana aɗi ata tifəmta ali wa.

¹⁵Ma I an ku hara biku, sha ku wutə ra, ma I an ku hara ɓɗaku, I awutə vəi haptə kəri wa, kamnyar tar bwani ka sur səli an ata wutə ra.

¹⁶Tsuwa ma har I ku haptə kəri, ga ata pakə ra apa su tə tsəngi ana hara, ka hara surndatə na ata dəkəi ra.

¹⁷Ga ana səntə seɗayeri na ana pəla su na ɗimi ata kəri, ka vərantə ɗəffə ɓzəɓzəkurər nga ata kəri, ga ana tsaɓəngkər ali mjir mpa ata kər ata kər.

¹⁸“Shang kamnyar mə tə gə zhar tə mdə yaɓəla ra ri? Sakani I ku mtə təng ɗəm kwabə mda awutə ra.

¹⁹Ma abbər thlatərna akwa kuta mama'na sai kula, sakani I aɗi ata kəɓa ka ndziyir bwani ngəni wa.

²⁰Shang mpikəi ni aɗi kwadang wa ya? Zhar ra bu apani kəi sarar shambar raka,

²¹akwabə ya təra mwari akwa di tə mda ana ngka wa, di na zhim ka kuthlə pələku.

²²Tsəɗi na ka kuthlu pələku apa kərathlər viri, vəi tə shanga su wuɓzi daci, vəi tə parakə ni surni ma tsa kuthlu.”