Read bura-pabir Ayuba 11 Bible Online

Ayuba 11 - bura-pabir bible

Ayuba 11

¹Antə Zofar na mdər Naama shinau aka Ayuba, abbər,

²“Ka mdə zhar jikamnyayeri ngəni kula mdə shinangkər ya? Gariyirni ni ngəni hang ni akwa ncanta apa tsa ka jiri ya?

³Ayuba, gə na wuta apa jikamnya tə ga akwa harari ni ata mzhi vu ka mdə dləɓ səri ya? Tsuwa ma ga akwa mnya ɗimi ata kəra Hyel ai dwali ka mdə vu nga akwa sur səli.

⁴Kamnyar ga akwa pəla abbər thlipər ngə ni kəcəkəcari, abbər gə kula biku akəma Hyel.

⁵Amma ma abbər Hyel an ata shinangkər ala ga, ma abbər tsa an ata kəlar mnyari ka gari ala ga,

⁶sakani tsa ku pəla ala gə ashirayeri ar ɗəɗukur! Kamnyar ɗəɗukur na jiri ka mnyari hang, Antə ka ra sənda abbər Hyel akwa ɗi nga aghəya su na kalkalər bikər nga.

⁷“Ga ata amzhi səndə ashira Hyel ya, wala mzhi nggaɓəla datər kuthlikurərni?

⁸Səndərni ku hara miu ta vəyayeri na amtazi, antə man tə ga ata harari adzə ri? Zurang ta duniya na akira di, ar ngə man tə gə səndə ri?

⁹Tsa saɓəl ta saɓəlkur duniya, ka bau ta baukur manda.

¹⁰Ma Hyel pəla tsa ata ngkəi mda ka vu ni akwa pərsəna, wala mwantə ni akwa mbwar shariya, wan ata mzhi ngkatə nə ri?

¹¹Kamnyar Hyel asəndə mji na kula ampani, tsa ana wul shanga ɗimikur tə da ana hara, ka kəsi akwa ɗəffari.

¹²Tar ma sakatə kwaramtaku ku baɗitə yaɓəla mda, kambəla kəgaɓu baɗitə ndzi ɗəɗu.

¹³“Ngkahə hangkala ga ata vəi duku, Ayuba, ka gə haptə tsiya ga alari akwa adduwa.

¹⁴Ma ga ku hara biku kara tubi, ga aɗiya hir ka mda avəyarngkiri jaktə hara biku wa.

¹⁵Antə ga ata hara su parak kəra ga, kula sur səli, ga ata hara su ka hangkala ga kula thlivəra.

¹⁶Antə ga ata fwari ata kəra shanga bwaniyayeri na wutə nga, apa yimi na ku huyimta tə mda aɗangtə kəra wa.

¹⁷Ndzəndziyir nga ata ndzi ka parakəu apa mbələr pcir təpkər, antə kuthlər nga ata sə mbila apa pcir balti.

¹⁸Ga ata hara su parak kəra ga, ka vu su akwa ɗəffu, Hyel ata ngkamta ala ga asar, antə ga ata ndzi lapiya.

¹⁹Ga ata pəpəi ka hangkala ga, kula thlivər su, antə mji hang ata bara dlara akəla ga.

²⁰Amma kəmanggarayeri aɗi ata wutə su tə da mwaɓtə wa, tsuwa da aɗi ata wutə lakur msər wa. Su tə da ata vəkər kari ka da wuta an sai mta.”