Read bura-pabir Ayuba 12 Bible Online

Ayuba 12 - bura-pabir bible

Ayuba 12

¹Antə Ayuba pəla,

²“Usa, an ar giri shanga su giri ana sənda, antə ma giri ku mti an mtər ɗəɗukur.

³Amma diya I ka səndə tsu apa giri, su aɗi tə giri təramta ra akwa wa. Wan asəndə shanga suayeri tə giri akwa pəlari ni wa ri?

⁴Wala pazhayeri arna akwa kumshi ra kulini, I na ana ndəra aka Hyel ka tsa shinau ali, I natə I kalkal kula biku, an ndzi sur kumshi aka mji kulini.

⁵Mji na akwa ngga msəra andər kumshi mji na akwa bwani, mji na akwa ɗar bwani andər jaktə kəɓa ka asarayeri.

⁶Amma kutakəyir mjir thla laku ana ndzi lapiya, tsuwa su aɗi na ana damitə mji na ana ɓzamtə ɗəffa Hyel wa, wala tə haptər ɗa tə da ana kəsi akwa tsiya ɗa an duna ɗa.

⁷“Amma yu mwaɓiyayeri ka da thlipa ala gə su ata kəra Hyel, yu ɗikayeri ar mtakəu ka da pəla ala gə su ata kəra Hyel.

⁸Ga ata mzhi thliptə su atar wul su na ka mpika akwa duniya, wala kəlfayeri ar manda ata ngkəra ala ga.

⁹Shanga ɗa asənda abbər MTHLAKU an namtə ɗa ka tsiyari.

¹⁰Shanga su na ka mpika an akwa tsiyari, mpika mji shang tsuwa akwa tsiyari.

¹¹Apatə kyanggyar ana ɗar susəma ka nggaɓəla wala msəra wala ɗəɗahəu, antə thləm ana nggatə ndər katagu.

¹²Diya ɗəɗukur ana thlata akəla olkur, tsuwa sənda ana thlata akəla hangkur məva.

¹³“Amma ɗəɗukur ka duna na jirari ana thlata akəla Hyel, tsa an ka sauri ka səndə na ɓɗak ta shang.

¹⁴Ma tsa ku huzamta, mdər jaktə həntari aɗi wa, ma tsa ku hartə mda ambwa, mdər kəlarari aɗi wa.

¹⁵Ma Hyel ku kəsəmta yimərhyel shanga su ata ula, ma tsa ku psi yimi ni avava ata famta garayeri.

¹⁶Jiri, Hyel an ka duna ka ɗəɗukur na jirari mdər pwaktə mda ka mdə tə mdə pwaktə japu akwa tsiyari.

¹⁷Tsa ana dlutsə səndər mjir hamta sauri aka tsəɗi, ka vu ka alkaliyayeri hara su caku caku.

¹⁸Tsa ana fəi kuthlyayeri ata olkur, ka hadza ala ɗa ləptər mafakur.

¹⁹Tsa ana fəi pristayeri ata olkur, ka dlutsə dunar mji na ka olkur.

²⁰Tsa ana hartə mnya mjir hamta sauri na ka jirkur, ka dlutsə dzam na kalkal ar mji na ol'ola.

²¹Tsa ana vu ka mji kumshi mji na ol'olər tsəɗi, ka dlutsə kari mpar mji na ɓəɓal.

²²Hyel ana kəlar suayeri na akwa ashir ka da ndzi ata bəbal, ka səntə suayeri na akwa kuthlu ka da ndzi akwa parakəu.

²³Tsa ana namtə tsəɗiyayeri ka da ndzi ka duna, ka ɓdləmta ɗa ka damwa, tsa ana vu ka tsəɗiyayeri kəla, ka jaktə shamta ɗa.

²⁴Tsa ana vu ka kuthlyayeri na akwa duniya ndzi kəgaɓu, ka zhar ɗa ka da kadla akwa mtakəu.

²⁵Antə da ana tətəm su akwa kuthlu kula parakəu, ka mwa ka ndla apa mji na wikəwikari.”