Read bura-pabir Ayuba 13 Bible Online

Ayuba 13 - bura-pabir bible

Ayuba 13

¹“Wula, I ku wutə shanga su nayeri ni təng ɗəm, I ku nggatə ka nggaɓəla shanga su tə giri akwa pəlari ni.

²Shanga su tə giri səndə ni I ma I asənda, su aɗi tə giri təramta ra akwa wa.

³Amma ai damitədzərna ni adzə na ka Duna ta Shang, I ata hir ka yeru putə gari ni ka Hyel surni.

⁴Ar giri, giri akwa fəi dzi ka thlandərayeri daci, giri ndzi apa liktayeri na amzhi kuri shilku wa.

⁵Kuji ma giri an dləɓ səri, ka mdə kəta abbər giri ɗəɗu.

⁶Antə kulini psi giri thləma giri aka su tə I ata pəlari, ka giri psi thləma giri aka kiɗərna.

⁷“Giri akwa mbul Hyel ka thlandər ri? Giri ana wuta apa thlandərər giri ni ata dlar ni ya?

⁸Giri akwa bara nca zumzumkur alari ya? Giri akwa bara mbul Hyel akwa mpa ni ya?

⁹Ma Hyel an pəla tsa ata pashə vəi ɗimikur giri, giri ata msər ya? Nənga giri ata mzhi pwaktə ni apatə giri ana pwaktə mdə ya?

¹⁰Ai ma giri pəla giri ata mbwa kir alari akwa ɗuwari, tsa ata mpa ala giri.

¹¹Shang giri athlivər jili olkur ka duna tə tsa kəgari wa ya? Ar giri, giri aɗi ana thlivər ni wa ya?

¹²Ɗəɗukur giri shang ku ndzi apa pənju na kula ampani, jikamnyayeri tə giri akwa harari ni aɗi ka kir wa.

¹³“Dləɓ giri səri, ka giri ni laku kəi gari, kəlara su na ata hara ali ka tsa hara.

¹⁴Shanga su na ata wutə ra I ata dluwari, wala I an ata shamta mpikəi I ata gari.

¹⁵Ma Hyel hir ka tsa tsi ra, I aɗi akwa vəkər ka su shang wa. Wala apani tsu I ata jikamta alari su na damitə ra.

¹⁶Ngəni ma an su na ata mbantə ra, kamnyar mdər biku amwari akəmari ka msər wa.

¹⁷“Antə kulini psi gir thləma giri ɓɗaku, ka giri nggatə su tə I ata pəlari ala giri.

¹⁸I ku ɗəmhədzi ɓɗaku ka su na damitə ra, I ka səndari abbər I ata ndzi kula biku.

¹⁹“Nənga wan ata mzhi ncanta abbər I ka biku ri? Ma aɗi, I ata ndzi səri kəi mta.”

²⁰“Su suɗa daci antə I ata kiɗə ka gə dlar ra kəgari, antə I ata mzhi si akəma ga kəi nggatə nga.

²¹Zhar ɗi ra bu apani, ga aɗiya jaktə thlivərantə ra wa.

²²“Antə apani ga ata gari, kəi shinangkər, ma apani wa zhar ra kəi gari ntangkəma, ka gə shinangkər.

²³Man bikərna ri, tsuwa man suayeri tə I ɓzamtə ri? Pəla ali bikərna ka suayeri tə I ɓzamtə ni kəi sənda.

²⁴Kamnyar mə tə ga akwa ɗuwar kəma ga ali ri? Kamnyar mə tə gə namtə ra apa dawar ngə ri?

²⁵Kamnyar mə tə ga ana bara thlivərantə ra ri, I na ndzi apa thlali ul'ula daci ni? Kamnyar mə tə ga akwa kədlə ghəla ɓaɓiya tə shambar ana kəla ri?

²⁶Kamnyar ga akwa rəbutə suayeri na ɗimi ɗimi ata kəri, ka vu ra akwa ɗar bwani kamnyar suayeri tə I hara akwa ngkyarkur.

²⁷Ga akwa tsau səli akwa gang, ka wul shanga mwarna, ka thlamta kəla vəi tə səli ata mwari akwa.

²⁸Mda ana hila ka ndzi apa su hiɗa hiɗa, apa zhaɓi tə ləma kwasəmnya.”