Read bura-pabir Ayuba 14 Bible Online

Ayuba 14 - bura-pabir bible

Ayuba 14

¹“Kəlara mdə yar mwala, kula duna, mpikari an kwadang ka ncir bwani.

²Tsa ana səɓəla apa pukdla ka tətəɓumtadzi, tsa ana hwi ka sha apa shanggur.

³Antə ga ata shamta sakar nga akwa wul mda apa i'i ya, har ka gə hara shariya ka tsa.

⁴Mda aɗi na kəcəkəcari wala duku wa, antə laku aɗi tə su na kəcəkəcari ata mzhi səɓəla akwa su na dlimbur wa.

⁵Ga ku ɗəmhə saɓəlkur farni akwa duniya, ka hangkur thliya tə tsa ata harari. Ga ku ɗəmhə saɓəlkur mpika mda, ka thlamta kəla vəi tə tsa amzhi təramtari wa.

⁶Kəli nca ga ata tsa bu ka gə psi lakurni, ka tsa hartə kəthlərərni vir nda kula damitədzi apa mdər kəthlər lebərakur.

⁷“Kamnyar wala ma mdə ku nthləmta nfwa, tsu sur vəkər aɗi alari, abbər tsa ata jaktə thləla ka hara tsi hang.

⁸Wala tə nggilangayerari ana hala akwa di, ka gwagwarni hiɗa,

⁹ma shiwur yimi ku tsəkwar ni tsa ata ɗəɗa ka damwa, ka hara tsi bilən bilən apa ɓzər nfwa.

¹⁰Amma ar mda tsa ana mta, ka ndzi kula duna, ma tsa ku mti, giri akəɓa kəra wa.

¹¹“Mpika mdə ndzi tsu apa manda na ana shiwa afaku, apa manda na ana ula.

¹²Antə ma mdə ku mti tsa aɗi ana thlatə kəra wa, tsa aɗi ata jaktə thlata kəra wa. Mda aɗi jaktə thlatə kəra wa wala ka tsa thlata akwa heni wa, har ka duniya kura.

¹³“Kuji ma ga an ɗuwar ra akwa duniyar mji mtəmta, har tar ma ɗəffa gə ku pwi ata kəri. Ka gə thlamta ali sakatə I ata harari, ka gə ɗangtə kəɓəla ra.

¹⁴Ma mdə ku mti, tsa ata mzhi thlatə ka damwa ya? Ai ma ana apani sakani I ata nggitari kəi ləkəma ka səkari akwa shanga virayeri ar kəthlər arna, har tar ma mdər msərantə ra akwa bwani ni ku si.

¹⁵Aghəla nda ga ata sə kəga ra, antə I ata ndəra, ga ata sə bara wutə ra, su tə ga an nam ka tsiya ga.

¹⁶Kamnyar ga ata sə wul mwarna, amma ga aɗi ata damitədzi ata kəra bikərna wa.

¹⁷Mda ata hartə bikərna akwa thləvu, antə ga ata hartə kəra shanga su tə I ɓzamta.

¹⁸“Apatə gar ana ndla ka huzamtadzi, ka pela na ola mbwalɓəladzi ka təri,

¹⁹apatə yimər zərkəu ana dzarəmta pelayeri, ka yimi na ka duna tsarəmta kəra di, antə ga ana tsi məyir mda akwa su.

²⁰Ga ana təra duna mda ba saka madi, ka tsa mta ka sha ata kəra duniya. Ga ana pali kəmari atar mta, ka kədləmta ni ka tsa təra.

²¹Mji ata sə nar olkur aka maɗa'ni, amma tsa aɗi ata səndari wa, wala ma da an ləkwa sur səli tsa aɗi ata səndari wa.

²²Su tə tsa asənda an dzari na akwa kətə ni daci, antə tsa ata tuwa kərni.”