Read bura-pabir Ayuba 15 Bible Online

Ayuba 15 - bura-pabir bible

Ayuba 15

¹Antə Elifaz na mdər Teman pəla abbər,

²“Ayuba, aɗi kalkal mdə na ɗəɗu hamta amsa ka ndərayeri na kula kər wa, wala nghyantə kərni ka shambarkur wa.

³Tsa aɗi ata beɗi na kula dlar wa, wala pəla su na kula ampani wa.

⁴Ga aɗi akwa thlivər Hyel apa na waci wa, tsuwa ga akwa ngkatə mji ta hara adduwa alari.

⁵Kamnyar bikər nga ana akwa pəla kərni akwa mnya ga, antə ga akwa pwaktə mji ka kyanggyar na msəra.

⁶Suayeri tə gə pəla ka mnya ga, ana akwa burkatə nga, aɗi I wa, kyanggyara ga an akwa ncaɓəla abbər gə ka biku.”

⁷“Ga an mdə tə mdə baɗitə yari akwa duniya ya, nənga sakatə Hyel akwa pwi garayeri ga aɗi ri?

⁸Ga ku nggatə sauri tə Hyel ɗəmhə kəga mjirthlentərni ya? Tsuwa ga ana wuta apa gan ka ɗəɗukur daci ya?

⁹Man su tə ga asənda amma yeru asəndə wa nə ri? Man su tə ga asənda, amma suari aɗi ata bəbal ala yeru wa ri?

¹⁰Mji na ka shishi mwapu kəga mji na ku sa yimi shang aɗi akwa nca yeru, mji na ol'ol ta baba' nga.

¹¹Apa kəmar tə Hyel akwa hara ala gə ni ku hara raka kamtə ya? Nənga ndərərni tə mdə pəla ala gə ka hangkal ni an hara raka kamtə ri?

¹²Kamnyar mə tə ɗəffa ga akwa mbu ri? Tsuwa kamnyar mə tə hərtə kəma ga apani nə ri?

¹³An su na hara tə ɗəffa ga akwa ɓza adzə Hyel, har tə jili ndərayeri ngəni səɓəla akwa mnya gə ni.

¹⁴“Apa madi tə mda ata mzhi ndzi kəcəkəcari ri? Mda aɗi na yar mwala na ata mzhi ndzi kalkal akəma Hyel wa.

¹⁵Kamnyar ma har Hyel aɗi mbərsa ka mjirthlentərni wa, tsuwa ma vəyayeri na amtazi aɗi kəcəkəcari akəmari wa.

¹⁶apa madi tə mdə na sur cika ka ɗəffari mənggəl, mdə na hir hara ɗimikur apatə mdə hir sa yimi, ata ndzi kəcəkəcari akəmari ri?

¹⁷“Psi thləma ga ali bu kəi pəla ala gə su, antə I ata ncaɓəla ala gə su tə nci wuta,

¹⁸su tə mji na ɗəɗu ku pəla waci, su tə da thlipta akəla kəkayeri arɗa tsuwa da aɗi ɗuwar ashir na akwa wa.

¹⁹Da an mji tə Hyel hamta ala ɗa tsəɗi ni, waci akəmata mətəpiyayeri asəkwa nca ɗa.

²⁰“Kəmanggar ana ɗar bwani akwa shanga ndzəndziyirni, shanga məvayeri arni an ndzi kula kula kətadza ka ncir bwani.

²¹Kurakər thlivərantə mda andər nghyantə thləmari, wala akwa sakatə shanga su lapiya alari, dəkalayeri ana pungkərdzi alari.

²²Tsa aɗi tamata abbər tsa ata jaktə səɓəla akwa kuthlu ni kəra wa, kamnyar katsakar akwa səkə ni.

²³Tsa ana kadla, ka ndzi apa susəmər kutəkcivi, tsa asənda abbər aɗi ata fəi wa mda ata tsi ni.

²⁴Bwani ka ɗəffə ɓzəɓza akwa thlivərantə ni, da ana mula alari ka duna apa kuthli na akwa ɗəmhədzi kamnyar mpa.”

²⁵“Kamnyar tsa ku haptə tsiyari ar mpa ka Hyel, tsa tsarar kərathlari aka Duna ta Shang.

²⁶Tsa ana kətə partauwurni na ka duna akwa tsiyari, akwa haptə kər ka hara kər ɓəɓalkur alari.

²⁷Wala tə tsa ku ndlə ka təksa, tə kutari ku kəla kamnyar səm msəra,

²⁸tsa ata sə ndzi akwa diyayeri na kula mda, akwa kəyayeri na aɗi kalkal ka mdə ndzi akwa wa, kəyayeri na abaka huzamtadzi.

²⁹Tsa aɗi ata ndzi mdər gəna ba saka madi wa, tsuwa gənarni ni ata fəi wa wala ka gənarni ni pu səl akwa tsəɗi ni wa.

³⁰Tsa aɗi ata msər ta kuthlə wa. Tsa ata ndzi apa nfu tə u'u ata mbamta tsiyayerari, ka shambar Hyel fimta pukdlərni.

³¹Tsa aɗiya pwaktə kərni atar mbərsa ka su gapani wa, kamnyar tsu su gapani ni an ata sə watsəɓər ni.

³²Akwabə virərni akura tsa ata uləmtadzi, apa tsiyari aɗi ɗar hara thlali shang wa.

³³Tsa ata ndzi apa nfur anap natə yarni ana ɓumtadzi kwabə da ang'ha, apa nfur zaitun natə pukdlərni ana ɓumta ata di.

³⁴Kamnyar mji na ana thlivər Hyel wa aɗi ata wutə kəkayeri wa, tsuwa u'u ata mbamta kəyayeri tə mdə hən ka kwabar dzəɓə mnya.

³⁵Da ana ɗəmhə ɗimikur ka hara asar aka mda, parang da akwa ɗəmhə thlandəra.”